91 Psaumes traduits en Ife

Les 91 Psaumes traduits en Ifè

Agbɔ́ɔ̀lú fú Ɔ̀ɖáyé wɛɛ́wo-ire

1 Bí ɔ̀nyà-kã̀ wà,

tsí kà gbɔ́ ɛ̀kɔ́-ɔ̀nyà-íbàɖí ŋa,

tsí ń tsitsɛ́ tse,

tsí kà ɖɔ́ɔ̀há-adzàbi ŋa,

tsí kà dzɛ má amú Ɔ̀ɖáyé tse ŋa,

ɛnɛ nyɛ̀ŋɛ̀ wɛɛ́wo-ire.

2 Kà kàa bɛ́ɛ̀ ɛ́,

ɛnɛ nyɛ̀nɛ̀ náa dzáfɔ̀-ɛ̀kɔ́-Ɔlɔ́dzɔ́ tó bɛ́ɛ̀.

Náa ń si ńǹsérè si,

tsí náa wà tédzú-ɛ̀ òsã́-kã̀, òrù-kã̀.

3 Ɛnɛ̀ŋɛ̀ náa wà kíbí egi-etíɖò.

Náa so si ńǹwèrè,

tsí ewé-ɛ̀ ŋa náa tù si mɛ̀mɛ̀mɛ̀.

Bí ɛnɛ̀ŋɛ̀ kɛ́ ɛŋgã, náa ɖi èdzì fúu.

4 Ó ɖi fee, kà lɔ bɛ́ɛ̀ fú atseébàɖí ŋa.

Àŋa òŋu, à wà kíbí nyàngbò,

tsí awu náa túùŋkã́-ŋa wérí.

5 Iŋɛ́ yèé tse tsí nɔ́dzɔ-ɛdzɔ́ kpíkpè ɛ́,

à kà gba atseébàɖí ŋa á ńnɛ̀ɛ́.

Tsí ìɖì kà wà fú adzàbi ŋa

náaŋírĩ-agbɔ́ɔ̀lú fú Ɔ̀ɖáyé ŋa.

6 Ɔlɔ́dzɔ́ náa tɔ́dzú ayé-agbɔ́ɔ̀lú fúu ŋa.

Ó ɖi, atseébàɖí ŋa òŋu,

ɔ̀nà-amúnɛ lɔ nɛ́ɛ̀rá ní à náa fà á.

Ɛnɛ yèé Ɔ̀ɖáyé tsã̀, tsí mɔ́wɔ́ tɛ̀ ɛ́,

ólú-ìtalɛ̀ bí ŋa kàkó nyáa tóòsũ̀-ɛ̀

1 Kí tse tsí ìlú ŋa

wà tse dzàdzàdzà tó bɛ́ɛ̀ ná?

Tsí ɔ̀nyà-ìlú ŋa wà tsètò ŋa,

tsí ètò ŋa á sì dzɛ́ akpotu kpó ná?

2 Ólú-ìtalɛ̀ bí ŋa òŋu ɔ̀gã́-ìlú ŋa ǹɖe,

tsí wà kpaɖí ní àŋa kó dzogu bá

Ɔlɔ́dzɔ́ òŋu ólú yèé ó tsã̀ á.

3 Tsí à ní:

Okù yèé ŋa à ń ɖe àŋa si ɛ́,

àŋa kó túu.

Wɔ̀rɔ̀ yèé ŋa,

à ń ɖe àŋa si ɛ́,

àŋa nákó túu sɔ taánù.

4 Ɔlɔ́dzɔ́, òŋu yèé dzokó si

náàntã̀-oyè-ɛ̀ nɔ́ɔ̀rɔ̃ ɛ́,

ó rã́ã̀rĩ́ fú ŋa,

tsí mú ŋa tse ni.

5 Ɔlɔ́dzɔ́ mú inɔ́ bínɔ́-ɛ̀ wíìnyɛ̀ fú ŋa.

Inɔ́ bíbí-ɛ̀ mú dzidzi mú ŋa.

6 Ó ní: Ólú, ɛnɛ yèé òŋu tsã̀ á,

òŋu wà múu dzoyè ńǹtá-òkè-Sìyɔ́nì,

òkè-tòŋu ká-òŋu.

7 È dzɔ̀ɔ́, tsí n dzíkɔ̀-Ɔlɔ́dzɔ́. ^*

Ó fɔ̀ fú mi ní: '' Ti nɔ́mbɛ́ ɛ́,

ɔma-mi ní ò dzɛ́ ɛ́,

tsí èmi gbo, ǹ dzɛ́ boba-ɛ̀ɛ. ^*

8 Bí ò bèrè mí ní

èmi kó kɛ́ ìlú ŋa kpó bɔwɔ́-òŋu,

màa mú ŋa bɔwɔ́-ɛ̀ɛ,

tsí à nákó ɖi tɛ̀ɛ.

Àdzàkáyé ɛ́ kpó nákó ɖi tɛ̀ɛ.

9 Nàa mú ɔ̀kpá-oyè-irɛ̃,

tsí ń gbɛ̃́ ŋa òŋu ikpá.

Kíbí à náa fɔ́ɔ̀kòkò-amà bɛ́ ɛ́,

bɛ́ɛ̀ ní nàa fɔ́ ŋa á. ''

10 Báàyí ɛ́, ólú ŋa, è tsifɛ̀ɛ́nɔ́.

Ɛ̀ŋɛ yèé dzɛ́ agbɛ̃́nɛ ńǹtalɛ̀ bí ŋa á,

è tsɔ́ éwo-ara-ŋɛ́.

11 Fee, è sɛ̃ Ɔlɔ́dzɔ́ òŋu àrísá.

È wà táyè, tsí wà ń nyɛ̀ɛ́,

tsí e wà ŋá kpó kpàkpàkpà.

12 È kálɛ̀ nódzú-ɔma á. ^*

Bí kò tsi bɛ́ɛ̀, nákó bínɔ́,

tsí è nákó tsɛ̀rá kpó.

Inɔ́ bíbí-ɛ̀ náa gbã̀ fũ̀m kíbí iná bɛ́ ni.

Asáɖúkù ńɖi-Ɔlɔ́dzɔ́ ŋa,

à wɛɛ́wo-ire.

Ɔ̀tɛ̀ ŋa ró mi má si

1 Orĩ-Ɖàfíɖì. Ńǹwèrè yèé Àbìsàlómì ɔma-ɛ̀

lée soko ɛ́ ní ó tsɔ́rĩ yèé bɛ́ ɛ́.

2 Ɔlɔ́dzɔ́, ɔ̀tɛ̀-mi ŋa ní kpɔ̀ tó bɛ́ ɛ́ɛ̀?

Awoóbàɖí fú mi ŋa kpɔ̀ góró.

3 Awíìnyɛ̀ ti nára-mi ŋa ní

Ɔ̀ɖáyé kàkó nyáa gbà mí là ró, à kò tsɔ̀nyà-ɔma.

Sɛ́là

4 Ó ɖi, Ɔlɔ́dzɔ́, ìwɔ fee,

ò dzɛ́ àkpó fú mi,

tsí dzɛ́ olíyì-mi,

Nà burɔ̃ si néwo fú mi.

5 Mà ɖúgbe kpe Ɔlɔ́dzɔ́,

tsí náa dzɔ́ŋù fú mi ti ńǹtá-òkè yèé dzɛ́ tɛ̀ɛ̀

akpá akpá, ɛsɛ̀ ɛsɛ̀ ɛ́.

Sɛ́là

6 Mà sũ̀, tsí sɔ̃rũ taánù lɔ kéɖéɖéé,

tsí mà dzí, iŋɛ́ tse ɛ́,

Ɔlɔ́dzɔ́ ní dzɛ́ abanɛ́-mi ɛ́.

7 Bí ɔ̀nyà-ɛ̀gbɛ̀lɛ́ɛ̀gbɛ̀ ró mi má si,

tsí wà wo ká kpa mí, ɛ̀ɖɔ̃̀ kà ɖá mi.

8 Ɔlɔ́dzɔ́, Ɔ̀ɖáyé-mi, ǹɖe,

tsí o gbà mí là ɖé!

Kpàgbètí fú ɔ̀tɛ̀-mi ŋa,

tsí o tsɛ́nyí fú atseébàɖí ŋa.

9 Ńɖi-Ɔlɔ́dzɔ́ ní ɔlà náa ti ɛ́.

Ɔlɔ́dzɔ́, tu kùsɛ̀ɛ̀ fú ɔ̀nyà-ìlú-ɛ̀ɛ ŋa.

Sɛ́là

Ɔlɔ́dzɔ́ wà nyàkúta-mi

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ ɛ́ ní. À náa taɖùrù si ńnɛ̀ ni.

2 Ɔ̀ɖáyé, olóòtítɔ́-mi, bí ǹ ɖúgbe kpèɛ́,

nà dzɔ́ŋù fú mi ɖé!

Ńǹwèrè yèé mà wà nóòfò si ɛ́,

nà gbà mí dzɔ̀ɔ́.

Rí ànyínɔ́ fú mi, tsí o gbɔ́ irewúwú-mi ɖé!

3 Ɛ̀ŋɛ ɔ̀nyà ŋa,

è ké wà sɔ iyì-mi ɖi iŋɛ́-anɔ́ làkóò géè?

Ɛ̀ŋɛ́ ɔ̀nyà ŋa,

è ké wà ńŋɛ́-akpotu ŋa wíwò si làkóò géè?

Ɛ̀ŋɛ ɔ̀nyà ŋa,

è ké wà nóòɖòbò tsítse si làkóò géè? Ó tó bɛ́ɛ̀!

Sɛ́là

4 È rí mà ní fee, Ɔlɔ́dzɔ́ tsã̀nyà-kã̀,

tsí àkaralé wà ńǹtá-ɛ̀.

Bí ǹ ɖúgbe kpe Ɔlɔ́dzɔ́, náa gbɔ́.

5 Bí è bínɔ́, è máa dzàbi.

È náa kpa wííí si ńǹtá-aní-ŋɛ́,

tsí wà wíìnyɛ̀ ńnɔ́ńnɔ́.

Sɛ́là

6 È tsɛbɔ yèé dzɔ ɛbɔ ɛ́,

tsí e wà mí kã Ɔlɔ́dzɔ́.

7 Ɔ̀nyà ŋa wà fɔ̀ ní:

''Nɛ̀ɛ́ nákó nyáa mú wa wɛ éwo-ire?''

Óò, Ɔlɔ́dzɔ́, tse tsí mímá-àtɛ̀dzú-ɛ̀ɛ

kó má wérí wa kpó ŋàà.

8 Mú ayè títɛ́ si ńnɔ́-mi,

tsí kó láre ayè títɛ́ tiŋa ńǹwèrè-ìkpaɖí-bèléè ^*

òŋu èso-egi-ɔtí ŋa.

9 Mà sũ̀, tsí sɔ̃rũ taánù lɔ ńtútùúrɔ̀,

iŋɛ́ yèé tse ɛ́, Ɔlɔ́dzɔ́, ìwɔ níìkã̀ntso ní dzɛ́

atsɛ́wébòmí ńǹɖìgbé-mi ɛ́.

Ɔlɔ́dzɔ́, gbɛ̃́ mi si nɔ́ɔ̀nà-ɛ̀ɛ

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ ɛ́ ní. À náa fɔ̃ fèrè si ńnɛ̀ ni.

2 Ɔlɔ́dzɔ́, gbɔ́ afɔ̀-mi ŋa ɖé,

tsí o rí kíbí ǹ wà gbɔ́ ɖíɖɔ̃̀ tó gé!

3 Ólú-mi, Ɔ̀ɖáyé-mi, gbɔ́ igbe-mi ɖé!

Ìwɔ ní ǹ wà wúùre fú ɛ́.

4 Ɔlɔ́dzɔ́, náàwúùrɔ̀, nà gbɔ́ŋù-mi,

tsí mà fodzú taɛ́ si, tsí wà ɖóro ɖèɛ́,

5 iŋɛ́ yèé tse ɛ́, ò dzɛ́ Ɔ̀ɖáyé,

tsí ò kà dzáfɔ̀-íbàɖí tsítse.

Atseébàɖí kò nɛ́ɛ̀ɖìgbé ńɖɔ̀-ɛ̀ɛ,

6 tsí atsekɛ́rɛ́kɛ́rɛ́ ŋa kà nyáa ɖóro nódzú-ɛ̀ɛ.

Ò kà dzàfɔ̀-atsòkṹnù ŋa.

7 Nà mú atsòɖòbò ŋa kpó tsɛ̀rá.

Ɔlɔ́dzdɔ́, iŋɛ́-akpanɛ ŋa òŋu arúnɛ ŋa kà rũ̀ kpaɛ́.

8 Ó ɖi èmi òŋu fee, ò tsore ɔ̀fɛ́-ɛ̀ɛ fú mi,

tsí mà lɔ nɔ́gbà-ilé-ɛ̀ɛ,

tsí káà kálɛ̀, tsí mú érí kãlɛ̀ fɛ́ɛ,

tsí mú àrísá yèé dzɔ ní ká ń fɛ́ɛ ɛ́, tsí ń bɔwɔ́-ɛ̀ɛ.

9 Ɔlɔ́dzɔ́, ò dzɛ́ atsòtítɔ́.

Gbɛ̃́ mi ɖé, àtsùgbé ɔ̀tɛ̀-mi ŋa,

tsí ifò kpó kó rɛ̃́ɖí nɔ́ɔ̀nà-ɛ̀ɛ yèé ǹ wà gbà á,

10 iŋɛ́ yèé tse ɛ́, afɔ̀ kà gãgã nárũ-tiŋa.

Ká bàdzɛ́ iŋɛ́ gé ní náa kpã́ ŋa nódzú si ɛ́.

Afɔ̀-arũ-ŋa, ikú gé ní náa bí wá fúnɛ́ ɛ́.

Arũ-ŋa kò ɖɔ̃̀ náfɔ̀ bɔ̀!

11 Óò, Ɔ̀ɖáyé! Fɔ̀ fú ŋa ní

àŋa ní wà bá íbàɖí wá á.

Ètò yèé à wà tse ŋa á kó ɖá ŋa taánù.

Lé ŋa soko, àtsùgbé-àbi ɛ̀gbɛ̀lɛ́ɛ̀gbɛ̀ yèé à dzɛ́ ɛ́

òŋu kíbí à dzàgaramatã si ɛ́.

12 Ḿbɛ̀ɛ́, ayè nákó wà tɛ́ amíkɛ̃̀ɛ̃́ ŋa.

À nákó wà náyè títɛ́ si nɔ́dzɔ́ kɔ́dzɔ́,

tsí nàa wà tsɛ́wé bò ŋá.

Adzáfɔ̀-ɛ̀ɛ kpó ŋa nákó wà náyè títɛ́ si náàtsùgbé-ɛ̀ɛ.

13 Iŋɛ́ yèé tse ɛ́, nà tu kùsɛ̀ɛ̀ fú atsòtítɔ́.

Ɔlɔ́dzɔ́, ore-ɔ̀fɛ́-ɛ̀ɛ náa wà kíbí àkpó bɛ́, tsí wà tsɛ́wé bòó.

Ɔlɔ́dzɔ́, ò dzàre, máa kɔ̀ mí ɖé!

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ ɛ́ ní. À náa taɖùrù si ńnɛ̀ ni.

2 Óò, Ɔlɔ́dzɔ́! Máa mú inɔ́bíbí-ɛ̀ɛ,

tsí ń fɛtí fú mi ɖé.

Máa mú inɔ́ bíbí-ɛ̀ɛ,

tsí ń tsɔ̀ mí ńkòtsã́.

3 Ɔlɔ́dzɔ́, rí ànyínɔ́ fú mi ɖé.

Iŋɛ́ yèé tse ɛ́,

àmí-kã̀ kò sí nɔ́wɔ́-mi ró.

Bɔ mí, iŋɛ́ yèé tse ɛ́,

Ǹ wà dzèkpéèkpè-ikú.

4 Àyɛ̀-mi ròmá si gé ni.

Óò, Ɔlɔ́dzɔ́, nàa dzɔ̀ɔ́ mi,

tsí màa wà bɛ́ si làkóò géè?

5 Ɔlɔ́dzɔ́, sɛ̃̀ wáa gbà mí dzɔ̀ɔ́ ɖé.

Tsàtsùgbée ore tsítse-ɛ̀ɛ, tsí gbà mí là.

6 Iŋɛ́ yèé tse ɛ́,

ńkú, à kà tédzú-ìwɔ Ɔlɔ́dzɔ́ bɛ̀.

Ńlé-ikú, à kà kɔ̃rĩ nyɛ̀ɛ́ bɛ̀?

7 Ǹ wà gbɔ́ ɖíɖɔ̃̀-ara-mi góró.

Omi-inyɔ́kṹ gé ní mà wà mɔ

ńǹtá-aní-mi nóoru-kã̀kã̀ á.

Mà wà nɔ́kṹ si hɛ̃̀hɛ̃̀hɛ̃̀ si gé ni.

8 Ìsérè kpa mí títí odzú-mi ɖɛ̀ kpó.

Ɔ̀tɛ̀-mi ŋa wà tse bá mi títí ǹ kò wà rírã ró.

9 È sɔ́ ǹɖe ńɖɔ̀ mi bí! Ɛ̀ŋɛ atseébàɖí ŋa.

Igbe-ɔkṹ-tèmi dzì nétí-Ɔlɔ́dzɔ́.

10 Tsí ó gbàkálɛ̀-mi ŋa,

tsí tɔ́wɔ́ méèdzì, tsí gba ìrewúwú-mi gbo.

11 Ɔ̀tɛ̀-mi ŋa kpó, à dzanɔ́,

tsí wà ŋá kpàkpàkpà.

Ɛ̀sɛ̀ yèé à ń tsúwá á, à kó ń ɖí ànyì,

tsí anɔ́ nákó kílɛ̀ fú ŋa.

Ɔlɔ́dzɔ́, tèmi nòkṹnù ni, gbà mí ɖé!

1 Orĩ yèé Ɖàfíɖì mú Kútsì,

tsí ń kɔ̃ fú Ɔlɔ́dzɔ́ ɛ́.

Orĩ ɛ́ ní. Kútsì ɛ́,

ɔ̀nyà-aro-bɛ̃̀dzàmɛ́nì ŋa ni.

2 Ɔlɔ́dzɔ́, Ɔ̀ɖáyé-mi,

ńɖɔ̀-ɛ̀ɛ ní mà sá ɖúkù ɛ́.

Gbà mí nɔ́wɔ́-atsoróbámi ŋa kpó,

tsí nyà mí nɔ́wɔ́-ŋa.

3 Bí kò tsi bɛ́ɛ̀,

à nákó fà mí ya dzɛ

kíbí dzàntá náa fa ɛrã ya dzɛ ɛ́ bɛ́,

tsí ɔ̀nyà-kã̀ kpókpó kàkó nyáa gbà mí nɔ́wɔ́-ŋa.

4 Ɔlɔ́dzɔ́, Ɔ̀ɖáyé-mi, bódzɛ́ ní fĩ́ĩ́

ǹ tse iŋɛ́ yèé ŋa nyí!

Bódzɛ́ ní òkṹnũ̀ kpɛ́tɛ-ɔwɔ́-mi,

5 bódzɛ́ ní ǹ mú ànyì-ɔwɔ́ ɖɔ́kpɛ́ fú ɔ̀nyà-kã̀, ^*

nàmí awokú-mi nóòkṹnù ŋa,

bódzɛ́ ní fĩ́ĩ́ èmi gbo ǹ rú ŋa dzɛ ńǹrɔ́-kã̀,

6 ni ɔ̀tɛ̀-mi kó lé mi títí bá mi.

Kó mú mi tsã́lɛ̀,

tsí mú iyì yèé wà nára-mi ɛ́ kĩ́rĩlɛ̀.

Sɛ́là

7 Ɔlɔ́dzɔ́, ǹɖe, tsí o nya inɔ́ bíbí-ɛ̀ɛ ɖíre.

Dza ɔ̀tɛ̀-mi ŋa yèé bínɔ́ si tó bɛ́ɛ̀ ɛ́.

Tsɛ́wé bò mí ɖé,

ìwɔ yèé náa dzáfɔ̀-òtítɔ́ tsítse ɛ́.

8 Ɔ̀nyà-ìlú ŋa ká wáa sú wérí-ɛ̀ɛ kpó,

tsí ìwɔ òŋu, o kã́rũ-ŋa ti náàntã̀-oyè-ɛ̀ɛ.

9 Ɔlɔ́dzɔ́, ò dzɛ́ àkpɛ̀dzɔ́ fú ɔ̀nyà-ìlú ŋa.

Kpɛdzɔ́ fú mi ńǹrɔ́-kíbí mà tsòtítɔ́,

tsí mà rɛ̃̀ si nɛ́kpa-ɛ̀ɛ ŋa á.

10 Kũ arũ íbàɖí yèé atséebàɖí ŋa wà tse ɛ́,

tsí o mú àmí ko atsòtítɔ́ ŋa.

Ɔ̀ɖáyé kà tsòkṹnù ní ò dzɛ́ ɛ́.

Ìwɔ ní náa tã̀sérè òŋu inɔ́-ɔ̀nyà wò ɛ́.

11 Ìwɔ ní dzɛ́ àkpó-mi ɛ́.

Ɔ̀nyà kpó yèé ŋa à náa ma afɔ̀-arũ-ŋa á,

Ɔ̀ɖáyé náa gbà ŋá là.

12 Ɔ̀ɖáyé kò dzɛ́ àkpɛ̀dzɔ́-òkṹnù.

Ó ɖi, náa nya inɔ́bíbí-ɛ̀ ɖíre nɔ́dzɔ́ kɔ́dzɔ́.

13 Bí ɔ̀nyà-kã̀ kò nyí sɛ̃̀ wá ńɖɔ̀-ɛ̀,

ɔ̀tɛ̀ náa lɔ tàsú-ɛ̀ hɛ́hɛ́hɛ́ si,

tsí fa ɔfà-ɛ̀ ɖíŋúú, tsí gbeɖè si.

14 Náa kpaɖí iŋɛ́-ìdzògu ŋa si,

tsí náa tɔ́tse ɔfà-iná ŋa si kpó.

15 Náa nɛ́fũ̀-íbàɖí tsítse si,

tsí àtsubi náa kɔ̃́nɔ́-ɛ̀ si tɛ́tɛ́tɛ́,

tsí náa wáa mú òɖòbò, tsí ń bí.

16 Náa ɖɛ̃ ɔ̀fɛ̀ lákṹ gbògòlòò-kã̀ si.

Ó ɖi, àbìtì yèé náa sɔ si nyɛ̀ŋɛ̀ ɛ́,

òŋu ká-ɛ̀ ní náa ré kpa á.

17 Íbàɖí kpó yèé ó tse ɛ́ sɛ̃̀ dzì néwo-ɛ̀,

tsí líle yèé ó tse bánɛ ɛ́ sɛ̃̀ dzì náàgàràdzú-ɛ̀.

18 Màa nyɛ Ɔlɔ́dzɔ́ òŋu yèé kà tsòkṹnù ɛ́.

Màa mú orĩ ŋa, tsí ń nyɛ Ɔ̀ɖáyé Oléwo.

Iyì-ɔ̀nyà kò tì sɔ́má iyì-Ɔ̀ɖáyé

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

À náa taɖùrù-Gátì ^* si ńnɛ̀ ni.

2 Ɔlɔ́dzɔ́, Ɔlɔ́dzɔ́-wa,

ńǹtalɛ̀ bí ɛ́, ɛ́kɔ-ɛ̀ɛ níyì.

Àfɛ́ŋú-ɛ̀ɛ kpàtà lé ńǹtá-àfɛ́ŋú-ìgbèrí.

3 Ò kɛ́ oŋù-ɔma tsígíɖí ŋa

òŋu ɔma nɔ́wɔ́ ŋa,

tsí wà ń nyakpá-ɛ̀ɛ ɖíre fú ɔ̀tɛ̀-ɛ̀ɛ ŋa.

Ḿbɛ̀ɛ́, náa tse tsí ɔ̀tɛ̀-ɛ̀ɛ ŋa,

adzàbɛ́ɛ nɔ́dzɔ́ kɔ́dzɔ́ ŋa,

à náa kpa húwííí.

4 Mà módzú tó ìgbèrí yèé ò mɔ́wɔ́-ɛ̀ɛ tse ɛ́.

Odzú-mi náa tó òtsùkpá

òŋu àrã̀wo ŋa kíbí ò tò ŋá si gbà á.

5 Mà bere ara-mi ní:

Ɔ̀nyà iŋɛ́ tútù ɛ́ fee,

kí ó dzɛ́, tsí nà tédzú-ɛ̀ ná?

Kí ɔ̀nyà àwáàyɛ̀ dzɛ́, tsí nà tɔ́dzú-ɛ̀ ná?

6 Ɔ̀ɖáyé, kíbí ò tse ɔ̀nyà á,

ó bɔɖé tsɛ̃́, tsí ó má ɖé bá adzítsɛ́-ɔ̀rɔ̃ ŋa.

Ò mú iyì òŋu àfɛ́ŋú, tsí ń tsòkúkú-oyè fúu.

7 Ò fúu ńkpá ní kó kã́rũ-iŋɛ́ ɔ̀kã̀lɔ́ɔ̀kã̀ kpó yèé ò ɖá á.

Ò mú iŋɛ́ ŋa á bɔwɔ́-ɛ̀, tsí ó kã́rũ-ŋa.

8 Ó kã́rũ-àgùɖã̀, ó kã́rũ-abó, ó kã́rũ-lalá.

Ó kã́rũ-ɛrã-kóko ŋa kpó.

9 Ó kã́rũ-ɛyɛ ŋa. Ó kã́rũ-ɛdzã ŋa ńnɔ́-àhũ.

Ó kã́rũ-iŋɛ́ ɔ̀kã̀lɔ́ɔ̀kã̀ kpó yèé wà gbà náhũ ɛ́.

10 Ɔlɔ́dzɔ́, Ɔlɔ́dzɔ́-wa,

ńǹtalɛ̀ bí ɛ́, ɛ́kɔ-ɛ̀ɛ níyì.

Ɔlɔ́dzɔ́ agbàfúnɛ

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

Aɖùrù oŋù fíníní ní à náa ta si ńnɛ̀ ɛ́.

2 Màa wà nyɛ Ɔlɔ́dzɔ́ ti ńnɔ́-mi kpó,

Tsí iŋɛ́ lákṹ kirim kirim yèé ŋa ò tse ɛ́,

màa wà kpɛ̀rɔ́-ŋa.

3 Màa táyè, tsí ayè-ɛ̀ɛ nákó wà tɛ́ mi.

Mà wà múɛ kɔ̃rĩ, ìwɔ Ɔ̀ɖáyé Oléwo.

4 Ɛsɛ̀ yèé ɔ̀tɛ̀-mi ŋa ńtsúwá á, à ń ɖáànyì.

À tsubúlɛ̀ kpó, tsí tsɛ̀rá nódzú-ɛ̀ɛ.

5 Ò dzokó si náàntã̀-oyè-ɛ̀ɛ,

tsí wà kpɛdzɔ́ òŋu òtíttɔ́.

Ò dzà gbè fú mi, tsí ɖáàre fú mi.

6 Ìlú yèé kò dzɛ́ ɔma-Ìyúɖà ŋa á, nà mú ŋa tsɛ̀rá.

Ò tse tsí atseébàɖí kò wà ró.

Ò nɔ ɛ́kɔ-ŋa ǹɖe títí lɔ náàrìmáa tã́.

7 Ɔ̀tɛ̀ ŋa kò sí ró. Ìɖìkíìɖì ɖìkpofò

títí lɔ náàrìmáa tã́.

Ìlú yèé ŋa ò ra á,

kò tsi ká tédzú-ŋa láyé ró ni.

8 Ɔlɔ́dzɔ́ dzokó si nóyè-ɛ̀ títí lɔ fú àrìmáa tã́.

Ó kpaɖí àntã̀-oyè-ɛ̀ gúlɛ̀ si kìrì fú ɛdzɔ́ kpíkpè.

9 Òŋu, kà kpɛdzɔ́-òkṹnù fú ayé gbaŋgba á.

Ó ɖi, náa làbilàre fú ɔ̀nyàlú ŋa òŋu òtítɔ́.

10 Ɔlɔ́dzɔ́ kó tsɛ́wé bo olíìréré ŋa òŋu ikpá.

Kó tsɛ́wé bonɛ ńǹwèrè-òfò ŋa.

11 Ɔlɔ́dzɔ́, amàɛ́ ŋa fee,

ká karalé si ńǹtá-ɛ̀ɛ.

Ò kà kɔ awòɛ́ ŋa dzɔ̀ɔ́.

12 È kɔ̃rĩ nyɛ Ɔlɔ́dzɔ́.

Ó dzokó si nóyè-ɛ̀ ńSìyɔ́nì.

È fɔ iŋɛ́ lákṹ kirim kirim yèé ŋa ó tse ɛ́ fú ɔ̀nyàlú ŋa.

13 Ɔlɔ́dzɔ́ lérí kpanɛkpanɛ ŋa si.

Kò gbàgbé ɛnɛ yèé à kpa nóòkú ŋa á.

Igbe-oláànyínɔ́ ŋa wà dzì nétí-ɛ̀.

14 Ɔlɔ́dzɔ́, inɔ́-mi kó nyɔ́ɛ̃ ɖé!

Rí kíbí ǹ méwo dzó si fú ɔ̀tɛ̀-mi ŋa si gé!

Fà mí fùɖá nárũ-ɔ̀nà-ilé-ikú.

15 Tsí ayè ìtɛ́kitɛ́ kó wà tɛ́ mi wérí ńSìyɔ́nì.

Mà wà náyè títɛ́ si fú kíbí ò gbà mí là á.

16 Ɔ̀fɛ̀ yèé ìlú-àledzò ŋa ɖɛ̃ si ɛ́,

àŋa ká-ŋa, à bɔ́ dzì ńnɛ̀.

Àbìtì yèé à sɔ ɖúkù si ɛ́ ré kpa ŋá.

17 Ɔlɔ́dzɔ́ nya iŋɛ́ yèé ó dzɛ́ ɛ́ ɖíre.

Ó làbilàre fúnɛ.

Àbìtì yèé atseébàɖí sɔ si ɛ́, ré kpaá.

Sɛ́là

18 Atseébàɖí ŋa ka fodzú fú ilé-ikú.

Ìlú kpó yèé dzɛ́ amú Ɔ̀ɖáyé tsìgbàgbé ŋa á nákó ra.

19 Ɔ̀ɖáyé nákó wáa tédzú oláànyínɔ́ gé ní ó dzɛ́ ɛ́.

Odzú yèé olákèmà gbo ń si nɔ́ɔ̀nà si ɛ́, kàkó rá.

20 Ɔlɔ́dzɔ́, ǹɖe!

Ɔ̀nyà kó máa dzɛ́ olíkpá làkóò si gé.

Ká kpɛdzɔ́ mú ìlú-àledzò ŋa nódzú-ɛ̀ɛ.

21 Ɔlɔ́dzɔ́, tse tsí dzidzi kó mú ŋa.

Ɔ̀nyà-ìlú-àledzò ŋa kpó ká mà ní fee,

iŋɛ́ tútù ní àŋa dzɛ́ ɛ́.

Sɛ́là

Ɔlɔ́dzɔ́ ní náa tsɛ́wé bonɛ ɛ́

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa. Orĩ ɛ́ ní.

Ńɖi-Ɔlɔ́dzɔ́ ní mà sá ɖúkù ɛ́.

N sá lɔ ńǹtá-òkè ŋa fee, mà dzɛ́ ɛyɛ-ɛ̀ɛ̀?

Bí è máà wí fú mi bɛ́ɛ̀ fáà!

2 Rí atseébàɖí ŋa banɛ́ ɔfà si gé!

À fàá si ɖíŋúú,

tsí ká ń ta olínɔ́ mímá ŋa nábɛ́tù.

3 Bí ìlú bàdzɛ́, tsí kò néwo ró fe,

kí atsòtítɔ́ nákó nyáa tse ni?

4 Ɔlɔ́dzɔ́ wà ńnɔlé yèé dzɛ́ tɛ̀ɛ̀ akpá akpá, ɛsɛ̀ ɛsɛ̀ ɛ́ si.

Nɔ́ɔ̀rɔ̃ ní àntã̀-oyè-ɛ̀ wà á.

Ó wà módzú tónɛ,

tsí wà rí inɔ́-ɔ̀nyà ŋa lɔ ńŋɔ́nɔ́ŋɔ́-ɛ̀.

5 Ɔlɔ́dzɔ́ ná kpanɔ́-atsòtítɔ́ ŋa

òŋu atseébàɖí ŋa wò.

Tsí náa nya ɛnɛ́ náa dzáfɔ̀-ká tse líle bánɛ ŋa á kãdzú.

6 Ìyɛná kɛ̀wùù ní

Ɔlɔ́dzɔ́ nákó rɔ̀ ɖà ńǹtá-atseébàɖí ŋa á.

Iná gbo, iná-ìkúlé-odzúùrɔ̃̀ gbo

má nára-awu gbígboná gbo,

ní nákó dzɛ́ akpálà tiŋa yèé à nákó gbà á.

7 Iŋɛ́ yèé tse ɛ́,

Ɔlɔ́dzɔ́ fee, ó dzɛ́ atsòtítɔ́.

Náa dzáfɔ̀-òtítɔ́ tsítse.

Olínɔ́ mímá ŋa gé ní náa nyáa ródzú-ɛ̀ ɛ́.

Ayé bàdzɛ́ kpó

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ ɛ́ ní. À náa taɖùrù si ńnɛ̀ ni.

2 Ɔlɔ́dzɔ́, gbà mí ɖé!

Àkaralé kò wà ńǹtá-ɔ̀nyà ró.

Atsòtítɔ́ ŋa kò sí ró.

3 Òɖòbò tsítse òŋu arũ ɖíɖɔ̃̀ sɔ̃́ŋú gé ní à bɔ̀ si fú ɛ́.

Banɛ́ná banómi ŋa náà ɖà si ɛ́.

4 Ɔlɔ́dzɔ́ kó mú olárũ ɖíɖɔ̃̀ tsɛ̀rá kpó.

Kó kpa afɔkpá ŋa nóòkú.

5 Ɛnɛ yèé ŋa wà fɔ̀ ní:

"Arũ kó wà, tsí ɔlá-ɛ̀ kó bàdzɛ́ɛ̀?

Arũ-aŋa wà si. Nɛ̀ɛ́ nɔ̀gá-àŋa á, mú ŋa tsɛ̀rá."

6 Ó ɖi, náàtsùgbé kíbí à wà ɖí olákèmà ŋa si,

tsí adzìyàkú ŋa wà náàlàárò si ɛ́ fee,

èmi Ɔlɔ́dzɔ́ ǹ wà fɔ̀ɔ́, ǹ bòkó dzɛ́konɛ ńǹkɛ̀ɛ́.

Ɛnɛ́ à wà síso-arũ fú ɛ́, màa gbà fúu.

7 Afɔ̀-Ɔlɔ́dzɔ́ ŋa náa má kérékéré ni.

Ná wà kíbí mímá-irɛ̃ kpikpa

yèé à ń bɔ̀ ńná gbà méedze ɛ́ bɛ́.

8 Ɔlɔ́dzɔ́, nàa tse tsí ɛ̀ya kàkó ya wá.

Nàa gbà wá nɔ́wɔ́-ɔ̀nyà kò sã̀ nyɛ̀ŋɛ̀ ŋa.

9 Bí òtítɔ́ tsítse tã́ ɖínɛ,

atseébàɖí ŋa náa gbàɖìkíìɖì kpó.

Ɔlɔ́dzɔ́, tsí nàa gbàgbé mi si bɛ́ géè?

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Óò! Ɔlɔ́dzɔ́, tsí nàa gbàgbé mi si bɛ́ géè?

Nákó ɖè tã́ nɔ́dzɔ́-kã̀ báàyíì?

Ò kàa tsódzú wò mí gbo róò?

Nákó ɖè tã́ nɔ́dzɔ́-kã̀ báàyíì?

3 Tsí ìsérè náa lárè mí si nɔ́dzɔ́ kɔ́dzɔ́ tó bɛ́ɛ̀ɛ̀?

Rí kíbí ǹ wà gbɔ́ ɖíɖɔ̃̀-ara-mi tó gé!

Nákó ɖè tã́ nɔ́dzɔ́-kã̀ báàyíì?

Tsí ɔ̀tɛ̀-mi tédzú wà gu éwo-mi tsu ńǹkɛ̀ɛ́ɛ̀?

Nákó ɖè tã́ nɔ́dzɔ́-kã̀ báàyíì?

4 Óò! Nɔ́dzɔ́ si nákó tã́ yá?

Tsódzú wò mí, tsí o dzɔ́ŋù fú mi ɖé.

Ò dzàre ɖé, tsódzú-mi, tsí n rĩ́rã,

bí kò tsi bɛ́ɛ̀, màa sɔ̃rũ-àsũ̀kã̀.

5 Ɔ̀tɛ̀-mi nákó bugbe ta ní:

'' Èmi kí nɔ́wɔ́-òŋu.''

Bí ǹ tsubú, ayè nákó tɛ́ ɔ̀tɛ̀-mi ŋa kadzá.

6 Ó ɖi, èmi òŋu,

ǹ karalé ní ò nɛ́ àmúɖɔ̃̀ fú mi tó bɛ́ɛ̀.

Ayè wa tɛ́ mi, iŋɛ́ yèé tse ɛ́, ò gbà mí là.

Ɔlɔ́dzɔ́, màa kɔ̃rĩ, tsí ń nyɛ̀ɛ́,

àtóoríi ore yèé ò tse fú mi ɛ́.

TƆ̀ɖáyé ŋa wà náàŋírĩ-atseébàɖí ŋa si

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

Ɛnɛ́ éwo kò sí fú ŋa á náa fɔ̀ ní: "Ɔ̀ɖáyé kò wà." ^*

Ó ɖi, à dzɛ́ atsìtsekíìtse ŋa si.

Tsí ìlò-ŋa sɔ́wɔ́-ayé ɛ́ si kpó.

Ɔ̀nyà-kã̀ kpókpó kò wà, tsí wà tsere.

2 Ɔlɔ́dzɔ́ wà módzú tó ɔ̀nyà ŋa ti nɔ́ɔ̀rɔ̃ wá ńǹtalɛ̀,

tsí kó rí káyí ní fee,

ɔ̀nyà dzídziná-kã̀ wà,

tsí wà sɛ̃ Ɔ̀ɖáyéè?

3 Àŋa kpó, à yagbo, tsí ɖi atsewérewère ŋa.

Ɔ̀nyà ɔ̀kã̀ntso gìɖì kò tì wà, tsí wà tsere.

4 Ɔlɔ́dzɔ́ ní: ''Àŋa atseébàɖí ŋa á fee,

à kí náàrìmà si niì?

Ɔ̀nyàlú-òŋu ŋa ɖi ìdzɛ̀ndzɛ si fú ŋa,

tsí à kò wà sɛ̃ òŋu Ɔlɔ́dzɔ́ ró."

5 Odzo ní nákó tse ŋá á,

tsí à kó wà ŋá kpó ɛ́.

Iŋɛ́ yèé tse ɛ́, ìbìmbí-atsòtítɔ́ ŋa òŋu,

Ɔlɔ́dzɔ́ wà náànyì-ŋa si.

6 È náa wà módzú bínɖí wo ètò-olákèmà ŋa.

Ɔlɔ́dzɔ́ ní wà tsɛ́wé bò ŋá á.

7 Nɛ̀ɛ́ nákó ti títí ńSìyɔ́nì,

tsí wáa gba Ìsàràyɛ́lì là ná?

Ńǹwèrè yèé Ɔlɔ́dzɔ́ nákó sɛ̃̀ gbɛ̃́ tɛ̀ɛ̀

yèé ogu mú lɔ ŋa á bɔ̀ wá á,

ɔmalɔ́ma-Yákúbà ŋa nákó wà náyè títɛ́ si,

tsí ayètítɛ́ nákó wà ńǹlú-Ìsàràyɛ́lì.

Nɛ̀ɛ́ Ɔlɔ́dzɔ́ nákó nyáa gbà si ńnɔlé-ɛ̀?

1 Orĩ-Ɖàfíɖì.

Ɔlɔ́dzɔ́, nɛ̀ɛ́ dzɔ ní o gbà si ńnɔlé-ɛ̀ɛ?

Nɛ̀ɛ́ nákó nyáa gbé ńǹtá-òkè yèé dzɛ́ tɛ̀ɛ

akpá akpá, ɛsɛ̀ ɛsɛ̀ ɛ́?

2 Agbé ńnɔlé-ɛ̀ɛ fee,

náa nɛ́ɛ̀lò-ire.

À kà rí íbàɖí-kã̀ fɔ̀ nára-ɛ̀.

Òtítɔ́ náa gbé nárũ-ɛ̀.

3 Kà kpɛɛ́kɔ-nɛ.

Kà tseébàɖí bá enìkéèdzì-ɛ̀.

Kà tseŋɛ́-anɔ́ bá enìkéèdzì-ɛ̀ ŋa.

4 Kà módzú gbà fú ɔ̀nyà-íbàɖí.

Ó ɖi, náa bu ìɖì si fú arí Ɔ̀ɖáyé sá ŋa.

Kà tàlé-kã̀ náàrìmáa sãã́.

Bí ó le fúu nɔ́ɔ̀kã̀lɔ́ɔ̀kã̀ gìɖì,

náa saã́ kpoŋu gé ni.

5 Bí ó ŋɛ́ owó fúnɛ,

kà bere èrè si ńǹtá-ɛ̀.

À kà múŋɛ́ ki arũ fúu,

tsí kó dzɛ́ gbàá.

Bí ɔ̀nyà-kã̀ wà tse bɛ́ɛ̀,

kà kílɛ̀ láyé.

Ayè wà tɛ́ ɛnɛ yèé Ɔ̀ɖáyé gba dzɔ̀ɔ́ nárũ-ikú ɛ́,

1 Orĩ-Ɖàfíɖì.

Óò! Ɔ̀ɖáyé, tsɛ́wé bò mí ɖé.

Ńɖɔ̀-ɛ̀ɛ ní ǹ sá ɖúkù si ɛ́.

2 Mà fɔ̀ fú Ɔlɔ́dzɔ́ ní:

Ò dzɛ́ Ɔlɔ́dzɔ́-mi, tsí ire-kã̀ kpókpó

kò wà ńǹɖì-kã̀ fú mi náanyì-ìwɔ níìkã̀ntso.

3 Ɛnɛ yèé ŋa dzɛ́ ti Ɔ̀ɖáyé akpá akpá,

ɛsɛ̀ ɛsɛ̀, tsí wà ńǹtalɛ̀ ɛ́

òŋu olíkpá ŋa á,

iŋɛ́-ŋa náa dzɔdzú-mi tó bɛ́ɛ̀.

4 Ó ɖi, asɛ̃ŋɛ ŋa òŋu,

òfò ní nákó wà bá ŋa làkóò gé ɛ́.

Ókò! Èmi kó kpɛrã tsɛbɔ fú iŋɛɛ̀?

Láyé! Ɛ́kɔ-iŋɛ gìɖì kàkó tì bɔ́ nárũ-mi.

5 Kíbí à náa kpɛ̃́ŋɛ́ bɔwɔ́-nɛ ɛ́,

Ɔlɔ́dzɔ́ ní èmi ǹ gbà á.

Ɔlɔ́dzɔ́ ní dzɛ́ akpálà yèé èmi ǹ gbà á.

Àbèrèwá-mi wà nɔ́wɔ́-ɛ̀ si.

6 Ìɖì yèé Ɔlɔ́dzɔ́ kpũ̀rã̀ fú mi ɛ́,

ó tɛ́ mi náyè héŋú.

Ɔ̀yà àfɛ́ŋú ní ó tse fú mi ɛ́.

7 Ǹ wà ɖɔ́kpɛ́ fú Ɔlɔ́dzɔ́,

ɛnɛ yèé wà fú mi ńfɛ̀ɛ́nɔ́ ɛ́.

Nóoru gìɖì gbo ɛ́,

ìsérè-mi náa wíǹyɛ̀ fú mi.

8 Odzú-mi náa kí ńǹtá-Ɔlɔ́dzɔ́ si gé ni.

Ɔlɔ́dzɔ́ wà náànyì-mi si.

Ɛ̀ɖɔ̃̀ kà ɖá mi.

9 Mà wà náyè títɛ́ si gé ni.

Àyɛ̀-mi náa wà táyè.

Ɔlɔ́dzɔ́ náa wà tsɛ́wé bò mí.

10 Ɔlɔ́dzɔ́, ò kàkó kɔ̀ mí dzɔ̀ɔ́,

tsí n kí ńlé-ikú.

Ò kàkó kɔ̀ mí dzɔ̀ɔ́,

èmi yèé dzɛ́ tɛ̀ɛ akpá akpá, ɛsɛ̀ ɛsɛ̀ ɛ́,

tsí odzú-mi kó kã isà gìɖì.

11 Ɔ̀nà yèé à náa fà, tsí lɔ náàyɛ̀ ɛ́,

nàa ɖíreé fú mi.

Ńɖɔ̀-ɛ̀ɛ fee, ayè títɛ́ gé ní náa wà si ɛ́.

Ire kà tã́ ńɖɔ̀-ɛ̀ɛ láyé.

Ɔlɔ́dzɔ́, tèmi nòkṹnù ni

1 Ìrewúwú-Ɖàfíɖì.

Ɔlɔ́dzɔ́, ìkálɛ̀-mi wà ńǹɖì-ɛ̀. Gbɔ́ɔ ɖé!

Rɛ̃tígbè, tsí o gbɔ́ àbo rírã́-mi.

Tsétí si ńǹrewúwú-mi.

Kò tsi arũ-òɖòbò ní wúùre fɛ́ɛ ɛ́.

2 Ká ɖáko-ɛdzɔ́ fú mi fee,

ńɖɔ̀-ɛ̀ɛ ní náa ti ɛ́.

Wòó nóòtítɔ́ ní tèmi nòkṹnù ni.

3 Ò kpanɔ́-mi wò.

Nóoru, ò tsɔ́mi wò.

Ò tsàɖã́wò fú mi, ò kò sì rí iŋɛ́-kã̀.

Ìsérè-íbàɖí tsítse kà fùɖá nárũ-mi,

4 tsí bí ǹ wà rí ìtsèntse-ɔ̀nyà ŋa,

mà kɛ́ afɔ̀-arũ-ɛ̀ɛ ŋa,

tsí wà ń banɛ́ ara-mi.

Ǹ kà fa ɔ̀nà-atseébàɖí ŋa.

5 Ɛkpa-ɛ̀ɛ ŋa túɖúɖúú ní ǹ fà á,

ǹ kò sé ŋa.

6 Óò! Ɔ̀ɖáyé-mi!

Ǹ wà ɖɔ̃́ kpèɛ́,

iŋɛ́ yèé tse ɛ́, nàa dzɔ́ŋù fú mi.

Rɛ̃tígbè, tsí o gbɔ́ŋù-mi.

7 Nya lílákṹ-àmúɖɔ̃̀-ɛ̀ɛ ɖíre fú mi.

Ìwɔ amúkpá gba asáɖúkù ńɖɔ̀-ɛ̀ɛ ŋa

nárũ-atsoróbánɛ ŋa.

8 Tsɛ́wé bò mí kíbí ɔmalódzú bɛ́.

Mú iká-ɛ̀ɛ bò mí,

9 fú atseébàɖí yèé ŋa fɔ́ mi ɛ́,

òŋu ɔ̀tɛ̀ yèé ŋa wérí mi si ɛ́.

10 Kò rí ànyínɔ́ fúnɛ ŋa ní à dzɛ́ ɛ́,

tsí dzɛ́ afɔkpá ŋa ńǹnyɛ̀ wíwí.

11 À náa mú imɔ́ gú mi si gé ni.

Báàyí ɛ́, à sú wérí mi si kpó,

tsí odzú-ŋa ta mí si gé ní ká mú mi tsã́lɛ̀.

12 Nà ɖédzú dzàntá afòmú ɛrã, tsí fàá ya ni.

Nà ɖédzú ɔma-dzàntá yèé gbeɖè si ní kó mú ɛrã á ni.

13 Ɔlɔ́dzɔ́! Ǹɖe, tsí o kpàɖé ŋa,

tsí o ɖá ŋa kálɛ̀, tsí ká mú éwo dzó.

Lo tàsú-ɛ̀ɛ, tsí o ń gbà mí nɔ́wɔ́-atseébàɖí.

14 Ɔlɔ́dzɔ́! Ɔwɔ́-ɛ̀ɛ kó tɛ̀ ŋá,

tsí o gbà mí nɔ́wɔ́-ŋa.

Lé ŋa lɔ sã́ŋu sã́ŋú fú ayé gbaŋgba á.

Tse tsí ká mɔ omi kíkorò yèé ò kpaɖí si fú ŋa á.

Nà tseé si ńnɛ̀ fú ɔma-ŋà ŋa, tsí kó tó ŋa rere,

títí kó bɔ̀ ńlɛ̀ si fú ɔmalɔ́ma-ŋà ŋa gbo.^*

15 Tèmi nákó dzàre, tsí màa ríɛ.

Bí ǹ dzí, n gbɔ́ ìdzã̀mà-ɛ̀ɛ, tsí kó fú mi náyo.

Ká nyɛ Ɔlɔ́dzɔ́ agbanɛdzɔ̀ɔ́ nɔ́wɔ́-ɔ̀tɛ̀

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ-adzítsɛ́-Ɔlɔ́dzɔ́. Orĩ ɛ́ ní.

Ó ɖɔ̃́ oŋù-orĩ ŋa á fú Ɔlɔ́dzɔ́

nɔ́dzɔ́ yèé Ɔlɔ́dzɔ́ gbàá nɔ́wɔ́-ɔ̀tɛ̀-ɛ̀ ŋa kpó

òŋu nɔ́wɔ́-ólú Sɔ́lù ɛ́ ni.

2 Ɔlɔ́dzɔ́ olí-àmí-mi, ǹ dzáfɔ̀-ɛ̀ɛ.

3 Ɔlɔ́dzɔ́ dzɛ́ òkúta lákṹ fú mi,

tsí mà ɖárèé. Ó dzɛ́ agbàmídzɔ̀ɔ́.

Ɔ̀ɖáyé-mi, òkúta lákṹ,

ɛnɛ yèé mà ɖárè ɛ́ ní ó dzɛ́ ɛ́.

Ó dzɛ́ àkpó-mi òŋu ikpá agbàmílà,

tsí dzɛ́ ɔgbà líle-kã̀ fú mi.

4 Ká nyɛ̀ɛ́. Ǹ kpe Ɔlɔ́dzɔ́,

tsí ó tse tsí ǹ dzàdzàbɔ́-ɔ̀tɛ̀-mi ŋa.

5 Ǹ kí ńwúrɛ́-ikú si,

tsí ó wà mú odzo tse mí kíbí oɖò amúnɛ tsɛ̀rá.

6 Ǹ kí ńwúrɛ́-ilé-ikú si,

tsí ikú sɔ àbìtì si ńwádzú-mi.

7 Ńnɔ́-òfò-mi, ǹ kpe Ɔlɔ́dzɔ́,

tsí ǹ ɖɔ̃́ kpe Ɔ̀ɖáyé-mi.

Títí ńlé-ɛ̀ fee, ó gbɔ́ oŋù-mi.

Igbe yèé ǹ ɖá á dzì nétí-ɛ̀.

8 Ḿbɛ̀ɛ́, ilɛ̀ mì kpó kpìkpìkpì,

tsí òkpì-òkè ŋa sɔdzì,

tsí wà mì kpó nódzú-inɔ́bíbí-Ɔ̀ɖáyé.

9 Òwúrɔ̀-kã̀ fùɖá ti ńmɔ́-ɛ̀

tsí iná amúnɛ tsɛ̀rá-kã̀ fùɖá ti nárũ-ɛ̀,

tsí iná kɛ̀wùù-kã̀ gbo wà ta fùɖá.

10 Ɔlɔ́dzɔ́ káko ɔ̀rɔ̃ bìrìbìrì, tsí tì wá,

tsí irì wérí ɛsɛ̀-ɛ̀ ŋa si kpó.

11 Ó ńǹtá-tsèrùbínì-kã̀,

tsí fò lɔ, tsí mú awu tse iká, tsí wà rã̀.

12 Ó mú òkùkù,

tsí ń tse ìɖì-ìɖúkù òŋu ìɖìgbé.

Òkùkù ɛ́ gbɛɖɛ̀ tó bɛ́ɛ̀,

tsí irì gbo ɖí si kpó kpím.

13 Odzúná ŋàà-kã̀ tsúwádzú-ɛ̀ wáa lɔ,

tsí òdzò-òkúta òŋu ìyɛná kɛ̀wùù wà rɔ̀ ti ḿbí ó tsú si ɛ́.

14 Ɔlɔ́dzɔ́ tse tsí àyèrá wà ké.

Ɔ̀ɖáyé Oléwo tsóŋù,

tsí òdzò-òkúta òŋu ìyɛná kɛ̀wùù wà fùɖá.

15 Ɔlɔ́dzɔ́ ta ɔfà-ɛ̀ ŋa, tsí lé ŋa soko.

Màmà wà bù ńǹɖìkíìɖì.

Ɛsɛ̀ yèé à ń tsúwá á, à ń ɖáànyì.

16 Ɔlɔ́dzɔ́, kíbí ò hɔ̃́rɔ̃́,

tsí èéfù wà bɔ́ fùɖá ti ńmɔ́-ɛ̀ɛ ɛ́,

inɔ́-àhũ ŋa kí nóòɖe.

Kpàkàlà yèé ŋa ru ayé gbaŋgba á si ɛ́,

à kí néèwò.

17 Ɔlɔ́dzɔ́ nawɔ́ ti nɔ́ɔ̀rɔ̃, tsí wáa gbà mí.

Ó kpɔ̀ mí fùɖá ńnɔ́-àhũ lákṹ ŋa.

18 Ó gbà mí nɔ́wɔ́-ɔ̀tɛ̀ mi olíkpá á.

Ó gbà mí nɔ́wɔ́-anyàmí kãdzú alelárèmí nyɛ̀ŋɛ̀ ŋa.

19 Nɔ́dzɔ́ yèé òfò bá mi si ɛ́,

à ɖì gìrìdzàà si ńǹtá-mi.

Ó ɖi, Ɔlɔ́dzɔ́ ɖi tsɔtsɔ agbàmí ɖóro.

20 Ó mú mi si nákpálà-kã̀, tsí fú mi náyè.

Ó kpɔ̀ mí fùɖá, iŋɛ́ yèé tse ɛ́, ó dzáfɔ̀ mi.

21 Ɔlɔ́dzɔ́ náa tseé fú mi kíbí mà tsòtítɔ́ gbà á ni.

Tsí kíbí ɔwɔ́-mi kò kpɛ́tɛ iŋɛ́ gbígbɛ̃ɛ̃́rĩ́ ɛ́,

ńǹrɔ́-bɛ́ɛ̀ ní náa sɛ̃ŋɛ̀ fú mi ɛ́.

22 Iŋɛ́ yèé tse ɛ́, ɔ̀nà-Ɔlɔ́dzɔ́ túɖúɖúú gé ní mà fà á.

Ǹ kò sɔ́wɔ́-Ɔ̀ɖáyé.

23 Ɛkpa-ɛ̀ ŋa wà nódzú-mi si,

tsí ǹ kò kɔ àrìmáa tse si nóŋù-afɔ̀-ɛ̀ ŋa.

24 Inɔ́-mi má fúu dzálɛ̀.

À kò rí íbàɖí-kã̀ fɔ̀ nára-mi.

25 Ḿbɛ̀ɛ́, ǹ dzèrè-òtítɔ́ tsítse-mi ńɖi-Ɔlɔ́dzɔ́.

Ǹ dzèrè-ɔwɔ́ àrìmáa kpɛ́tɛ̀-íbàɖí.

26 Bí àkaralé wà ńǹtá-ɔ̀nyà-kã̀,

nà nyàá ɖíre fú ɔlá-ɛ̀ ní àkaralé wà ńǹtá-òŋu.

Bí inɔ́-ɔ̀nyà-kã̀ má,

nà nyàá ɖíre fú ɔlá-ɛ̀ ní inɔ́-òŋu má.

27 Bí ɔ̀nyà-kã̀ má,

nà nyàá ɖíre fú ɔlá-ɛ̀ ní òŋu má.

Fú atsìtsekíìtse,

nà nyàá ɖíre fúu ní òŋu nɔ́gbɔ̃́ lárèé.

28 Bí ìlú-kã̀ wà nóòfò si,

ìwɔ ní náa múu dzàdzàbɔ́ ɛ́.

Atse kɛ́rɛ́kɛ́rɛ́ ŋa, nà ɖɛ̀ ŋá bɔ̀.

29 Ìwɔ ní náa tse tsí kanɖé-mi náa tɔ́ si ɛ́.

Ɔlɔ́dzɔ́ Ɔ̀ɖáyé-mi náa sɔ òkùkù-mi ɖi mímá.

30 Ìwɔ ní náa tse tsí mà mú ogu ɖé ɛgbɛ́-adzogu aɖìgìrìdzà-kã̀ á.

Ɔ̀ɖáyé náa tse tsí mà fò kádzá oɖi.

31 Ɔ̀nà-Ɔ̀ɖáyé sã̀ dzálɛ̀.

Afɔ̀-Ɔlɔ́dzɔ́ kà kpàrɔ̀.

Ɔlɔ́dzɔ́ dzɛ́ àkpó fú asáɖúkù ńɖɔ̀-ɛ̀ ŋa.

32 Kí wà, tsí dzɛ́ Ɔ̀ɖáyé náànyì-Ɔlɔ́dzɔ́?

Kí wà, tsí dzɛ́ òkúta lákṹ náànyì-Ɔ̀ɖáyé-wa?

33 Ɔ̀ɖáyé náa mú àmí ɖìdzá fú mi,

tsí náa tse tsí ɔ̀nà-mi náa sã̀ dzálɛ̀.

34 Tsí ɛsɛ̀-mi ŋa náa yá ńlɛ̀ kíbí ɛsɛ̀-àgbã̀rĩ́ ŋa.

Tsí náa kɛ́ mi ɖóro ńǹɖì gíga ŋa si.

35 Ó kɔ́ mi kíbí à náa lo ɔwɔ́ dzogu gbà á,

tsí ɔwɔ́-mi náa nyáa káko ɔrɔ̃-ɔfà-irɛ̃ tútù.

36 Ɔlɔ́dzɔ́, nà mú àkpó oláàdzàbɔ́ bɔwɔ́-mi.

Ikpá-ɔwɔ́-ɛ̀ɛ náa banɛ́ mi si,

tsí ore tsítse-ɛ̀ɛ wà mú mi ɖonùgbó.

37 Ò tse tsí ǹ nya wà tsí ɛsɛ̀ súré,

tsí ɛsɛ̀-mi lera si gbógí gbógí.

38 Mà dzátɛ ɔ̀tɛ̀-mi ŋa, tsí lé ŋa bá.

Mà ra ŋá kpó tã́ná n nyí sɛ̃̀.

39 Mà kpa ŋá ìkpakíìkpa.

Kò tsi ká ǹɖe ró ni.

À náa tsubú si nábɛ́-mi.

40 Ò mú ikpá ɖìdzá fú mi fú ogu dzídzɛ,

tsí ò tse tsí atsafɔ̀ nára-mi ŋa mú éwo dzó fú mi.

41 Ò tse tsí ɔ̀tɛ̀-mi ŋa mú àtɛ́sɛ̀ fɔ̀ɔ́ nódzú-mi,

tsí anyàmí kãdzú ŋa, ǹ ra ŋá.

42 À ɖúgbe kpenɛ, ó ɖi, ɔ̀nyà-kã̀ kò tsã́rũ si ńnɛ̀.

À ɖɔ̃́ kpe Ɔlɔ́dzɔ́, ó ɖi, kò dzɔ́ŋù.

43 Mà lɔ̀ ŋá, tsí à náa ɖà kíbí rùfù yèé awu wà kɛ́ ɛ́ bɛ́ ɛ́,

tsí mà fá ŋa ǹɖe kíbí kpɛ̀tɛ̀kpɛ́tɛ́-odzú-ɔ̀nà bɛ́.

44 Bí ìlú ɛ́ lásì si, nà gbà mí dzɔ̀ɔ́ nɔ́wɔ́-ŋa.

Ò mú mi si néwo fú ìlú ŋa.

Ɔ̀nyà-ìlú yèé ŋa ǹ kò mà wòrí ɛ́, à mú éwo dzó fú mi.

45 Títí n tsóŋù bɛ́ gé, à náa ti gbɔ́ɔ̀lú fú mi lɛ́lɛ́.

Àledzò ŋa náa wáà ɖɔ̃ arũ fú mi.

46 Ara kpa fú alèdzò ŋa kpó,

tsí à náa wà ŋá kpàkpàkpà,

tsí wà fùɖá ti ḿbí à sá ɖúkù lɔ si ŋa á.

47 Ɔlɔ́dzɔ́ wà náàyɛ̀!

Kùsɛ̀ɛ̀ fú Òkúta lákṹ-mi!

Ɔ̀ɖáyé agbàmí là, ɛ́kɔ-ɛ̀ɛ kó wà fì!

48 Ɔ̀ɖáyé kó kpa ɔ̀tɛ̀-mi ŋa sã fú mi,

tsí tse tsí ɔnyà-ìlú ŋa ká mú éwo dzó fú mi.

49 Ò gbà mí dzɔ̀ɔ́ nɔ́wɔ́-ɔ̀tɛ̀-mi ŋa.

Yèé yɔ ɛ́, ò tse tsí ǹ dzàdzàbɔ́-atsafɔ̀ nára-mi ŋa,

tsí ò gbà mí nɔ́wɔ́-ɔma-àlèdzú ŋa.

50 Ɔlɔ́dzɔ́! Tsùgbée bɛ́ɛ̀ ní ǹ wà nyɛ̀ɛ́ náàŋírĩ-ìlú ŋa á!

Màa kɔ̃rĩ, tsí wà nyɛ̀ɛ́ gé ni!

51 Ɔlɔ́dzɔ́ náa mú ólú-ɛ̀ dzàdzàbɔ́ lákṹ lákṹ ŋa,

tsí náa tsore fú Mɛ̀síyà-ɛ̀, ɛnɛ yèé ó tsã̀ á.

Náa tsore fú Ɖàfíɖì òŋu ɛkpa-ólú dzídzɛ náro-ɛ̀

títí lɔ náàrìmáa tã́.

Ɔlɔ́dzɔ́ wà nya iyì-ɛ̀ òŋu ɛkpa-ɛ̀ ɖíre

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Iŋɛ́ yèé wà nɔ́ɔ̀rɔ̃ ŋa á wà nya iyì-Ɔ̀ɖáyé ɖíre.

Iŋɛ́ yèé wà ńǹgbèrí ŋa á wà nya itsɛ́-ɔwɔ́-ɛ̀ ŋa ɖíre.

3 Ɔdzɔ́ kã̀kã̀ ná wà nyàá ɖíre.

Òru kã̀kã̀ náa wà nyàá ɖíre.

4 Kò tsi ɛ̀rɔ́ ni. Kò tsi ìnyɛ̀,

tsí ká gbɔ́ ɖíɖɔ̃́-oŋù-ɛ̀.

5 Ikɔ̀ yèé à náa dzɛ́ ɛ́,

náa tó ńǹɖìkíìɖì ńǹtalɛ̀ ɛ́.

À náa gbɔ́ɔ títí lɔ náàdzàkáyé ɛ́ kpó.

Ɔ̀ɖáyé tse awúrɛ́ si fú odzúùrɔ̃̀ ńǹgbèrí.

6 Bí ó bɔ́ ti náwúrɛ́ ɛ́,

náa wà kíbí ɔkɔ titɔ̃ ɔmɔ̀tsɔ́

náa fùɖá ti ńnɔlé-ɛ̀ bɛ́ ɛ́.

Bí ó wà rɛ̃̀, náa wà kíbí ɔmadzagu-kã̀

náa ǹɖe dzì nɔ́ɔ̀nà-ogu òŋu ayè títɛ́ ɛ́.

7 Náa bɔ́ ti nákpálà-kã̀-ayé gbaŋgba á,

tsí lɔ káà mù nákpálà-èkéèdzì-ayé gbaŋgba á.

Bí ó wà rɛ̃̀, iŋɛ́-kã̀ kpókpó

kà nyáa kɔ àrìmáa gbɔ́ gbígboná-ɛ̀.

8 Ɛkpa-Ɔ̀ɖáyé sã̀ dzálɛ̀, tsí náa sɛ̃̀ fúnɛ náàyɛ̀.

Ɛ̀wɔ̀-ɛ̀ ŋa má,

tsí náa tse tsí ɛnɛ yèé wà fú ara-ɛ̀ gé ɛ́,

náa ɖi olí-ifɛ̀ɛ́nɔ́.

9 Iŋɛ́ yèé Ɔ̀ɖáyé náa bèrè ní ká tse ŋa á,

òkṹnù kà wà ńŋa. Náa mú inɔ́-nɛ ɖɔ̃̀.

Ɛkpa-ɛ̀ ŋa má,

tsí ɛkpa ŋa á náa tse tsí ɔ̀nyà náa ɖá iŋɛ́ mà.

10 Ká nɛ́ àrísá fú Ɔlɔ́dzɔ́ fee, náa dzɛ́ iŋɛ́ mímá,

tsí náa wà si títí lɔ.

Iŋɛ́ yèé ŋa Ɔlɔ́dzɔ́ náa wò ní òŋu kó tse ɛ́,

à náa dzɛ́ òtítɔ́, tsí òkṹnù kà wà ńŋa.

11 À nɛ́ɛ̀fɛ́ láre siká.

À nɛ́ɛ̀fɛ́ láre siká òtítɔ́ ŋa gìɖì.

À ɖɔ̃̀ láre onyi. À ɖɔ̃̀ láre onyi-òtítɔ́.

12 Ɔlɔ́dzɔ́, àtsìtsɛ́-ɛ̀ɛ ní èmi ǹ dzɛ́ ɛ́.

Iŋɛ́ yèé ŋa nà wò ní òŋu kó tse ɛ́,

à náa tsɛ̀kɔ́ fú mi. Bí ǹ mú ŋa tsitsɛ́ tse,

èrè lákṹ-kã̀ wà ńŋa fú mi.

13 Ɔ̀nyà nákó nyáa ma iŋɛ́ kpó yèé náa tse sé ɛ́ɛ̀?

Àbi yèé ŋa kpó mà dzɛ náàrì mà á,

ò dzàre, mú ŋa tɔrɛ fú mi ɖé.

14 Àtsìtsɛ́-ɛ̀ɛ ní ǹ dzɛ́ ɛ́,

ò dzàre, gbà mí nɔ́wɔ́-atse kɛ́rɛ́kɛ́rɛ́ ŋa.

Ìlò-ŋa kó máa kpɛ́tɛ̀ mí nɔ́ɔ̀nà-kã̀ kpókpó ɖé.

Ḿbɛ̀ɛ́, à kàkó rí íbàɖí-kã̀ kpókpó fɔ̀ nára-mi.

Àbi yèé nákó mú mi sɔ́wɔ́-ɛ̀ɛ ɛ́, ǹ kàkó dzɛɛ́.

15 Óò, Ɔlɔ́dzɔ́! Òkúta lákṹ ní ò dzɛ́,

tsí mà ɖárè ɛ́.

Ò wà dzà náànyì-mi.

Ǹ tsìkálɛ̀, afɔ̀-inɔ́-mi ŋa òŋu ìsérè-mi ŋa ká dzɔdzú-ɛ̀ɛ ɖé.

À wà wúùre fú ólú

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Ɔlɔ́dzɔ́ kó dzɔ́ŋù fɛ́ɛ nófò-ɛ̀ɛ ŋa.

Ɔ̀ɖáyé-Yákúbà kó wà tsɛ́wé bòɛ́.

3 Ɔlɔ́dzɔ́ kó ti ńlé-ɛ̀, tsí wáa gbà fɛ́ɛ.

Kó ti ńSìyɔ́nì, tsí wáa mɔ́wɔ́ gbè fɛ́ɛ.

4 Kó wà tédzú ɔ̀yà tsítse-ɛ̀ɛ ŋa kpó,

tsí ɛbɔ yèé ŋa nà dzoná kpó búláá fúu ɛ́,

kó dzɔdzú-ɛ̀.

Sɛ́là

5 Iŋɛ́ yèé ò wà wò ɛ́, Ɔlɔ́dzɔ́ kó fɛ́ɛ.

Kó tse tsí ètò-ɛ̀ɛ ŋa kpó kó nɛ́ tsítse.

6 Ḿbɛ̀ɛ́, àa nákó ɖúgbe-ayè títɛ́ fú kíbí ó gbàɛ́ là á.

Nóŋù-ɛ̀tsɛ-Ɔ̀ɖáyé-wa,

àa nákó kɛ́ atsɔ-odzúlɛ̀ lɔ ńǹgbèrí.

Ɔlɔ́dzɔ́ kó fɛ́ɛ ńŋɛ́ kpó yèé ò wà bèrè ɛ́.

7 Báàyí ɛ́, ǹ mà ńǹkɛ̀ɛ́ ní Ɔlɔ́dzɔ́ gba Mɛ̀síyà là.

Ɔlɔ́dzɔ́ dzɔ́ŋù fúu ti nɔ́ɔ̀rɔ̃ ńǹɖìgbé-ɛ̀.

Ó lopká-ɛ̀ lákṹ ɛ́, tsí ń gbà fúu.

8 Ɔ̀nyà kã̀ŋa náa mí kã ɔkɔ̃̀-ogu-ŋà ŋa.

Olòmírɛ̃̀ ŋa náa mí kã atsĩ-ŋà ŋa.

Ó ɖi, àwa òŋu, àa náa mí kã Ɔlɔ́dzɔ́, Ɔ̀ɖáyé-wa ni.

9 Àŋa òŋu fee, ara náa kú ŋa,

tsí à náa káà bɔ́ taánù.

Ó ɖi, àwa òŋu, àa náa ɖóro si náàrì mì dzígí.

10 Ɔlɔ́dzɔ́, gba ólú là. Dzɔ́ŋù fú wa bí àa ɖɔ̃́ kpèɛ́.

Ólú mí kã Ɔlɔ́dzɔ́

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Ɔlɔ́dzɔ́, ayè wà tɛ́ ólú fú ikpá-ɛ̀ɛ.

Àdzàbɔ́ yèé náa fúu ɛ́ wà mú ayè tɛ́ɛ góró.

3 Awù-ɛ̀ɛ, ò tseé fúu.

Ò kò kɔ̀ àrìmáa gbɔ́ afɔ̀-arũ-ɛ̀ ŋa.

Sɛ́là

4 Nà ǹɖe, tsí tu kùsɛ̀ɛ̀ dzɔ kùsɛ̀ɛ̀ fúu.

Nà mú òkúkú-oyè-síka ɖé fúu.

5 Ó bèrèɛ́ náàyɛ̀,

tsí ò fúu nátɔ́ títí lɔ náàrìmáa tã́.

6 Ò fúu náàdzàbɔ́, tsí sɔɔ́ ɖi ólú lákṹ.

Tsí ò mú iyì òŋu àŋfɛ́ŋú-oyè si nára-ɛ̀.

7 Ò múu tse kùsɛ̀ɛ̀ si títí làkóò làkóò.

Nà mú ayè tɛ́ɛ nódzú-ɛ̀ɛ.

8 Ɛ̃ɛ̃, ólú wà mí kã Ɔlɔ́dzɔ́.

Àkaralé wà ńǹtá-Ɔ̀ɖáyé Oléwo,

tsí ó tse tsí ólú dzokó si rìgírìgí.

9 Ɔlɔ́dzɔ́, ɔwɔ́-ɛ̀ɛ nákó tɛ ɔ̀tɛ̀-ɛ̀ɛ ŋa kpó,

tsí ikpá-ɔwɔ́-ɛ̀ɛ nákó dza ɔ̀tɛ̀-ɛ̀ɛ ŋa.

10 Nàa sɔ ŋá ɖi ìyɛná kɛ̀wùù nɔ́dzɔ́ yèé nàa bɔ́ fùɖá á.

Ɔlɔ́dzɔ́, à nákó kí nárũ-inɔ́ bíbí-ɛ̀ɛ,

tsí iná nákó dzó ŋa kpa.

11 Nàa tse tsí ìbìmbí ìrènrè-ŋa nákó ra ńǹtalɛ̀ ɛ́.

Ìrɔ́-ɔ̀nyà tiŋa kàkó gbé náyé gbaŋgba á ró.

12 Bí à ní àŋa kó tse íbàɖí báɛ,

tsí à ɖìbò si ńǹtá-ɛ̀ɛ,

nákpotu ní nákó dzɛ́ ɛ́.

13 Iŋɛ́ yèé tse ɛ́, nàa tse tsí à nákó mú ìkpàɖànyì fɔ̀ɔ́,

tsí nàa kɛ́ ɔfà-ɛ̀ɛ, tsí kpũ̀rã̀ ŋá, tsí ta ŋá lɔ.

14 Ɔlɔ́dzɔ́, nya ikpá-ɛ̀ɛ ɖíre.

Ká kɔ̃rĩ nyɛ̀ɛ́ fú iŋɛ́-ikpá-ɛ̀ɛ ŋa tsítse.

Atsòtítɔ́ wà réré,

ó ɖi, odzú-ɛ̀ wà nɔ́ɔ̀nà si

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ-àgbã̀rĩ́ náàwúrɔ̀. Orĩ ɛ́ ní.

2 Ɔ̀ɖáyé-mi, Ɔ̀ɖáyé-mi, kí tse tsí ò kɔ̀ mí dzɔ̀ɔ́ ná? ^*

Ǹ gbɛ̃ kã̀nyìì si, tsí ò tédzú kí nóòtèrè si fú miì?

3 Óò! Ɔ̀ɖáyé-mi, nóòsã́ mà kpèɛ́, tsí ò kà dzɛ́ fú mi.

Nóoru gbo, ǹ kà sì tsikó.

4 Ìwɔ ní sì dzɛ́ olí-mímá á,

tsí nà dzokó náàntã̀-oyè-ɛ̀ɛ si,

tsí Ìsàràyɛ́lì ŋa náa wà kɔ̃rĩ nyɛ̀ɛ́.

5 Gbábgóǹgbàgbò-wa ŋa mí kɛ̃̀ɛ̃́ wáa lɔ.

À náa mí kɛ̃̀ɛ̃́, tsí nà gbà ŋá dzɔ́ɔ̀.

6 À ɖɔ̃́ kpèɛ́ wáa lɔ, tsí ò gbà ŋá.

À náa mí kɛ̃̀ɛ̃́, tsí à kà dzanɔ́.

7 Ó ɖi, èmi òŋu, ǹ tédzú ɖi kòkòrò.

Ǹ kò dzɛ́ ɔ̀nyà ró.

Ǹ ɖi oléèkpè-ɔ̀nyà ŋa si,

tsí à kò wà mú mi kpe iŋɛ́-kã̀.

8 Ɔ̀nyà kpó yèé náa rí mi ɛ́, à náa mú mi tse.

Ǹ ɖi oláàrĩ́ si fú ŋa, tsí à náa wà mi éwo.

9 À náa wà fɔ̀ ní: Kó fũ̀rã̀ sũ Ɔlɔ́dzɔ́!

Tsí kó gbàá dzɔ̀ɔ́! Tsí kó gbà fúu!

Iŋɛ́ yèé tse ɛ́, Ɔlɔ́dzɔ́ dzáfɔ̀-ɛ̀.

10 Ìwɔ ní nyà mí fùɖá ńnɔ́-ìnà-mi ɛ́,

tsí ǹ gbé nɛ́ɛ̀ɖɔ̃̀-ɛ̀ erímara ɛ̀ɖɔ̃̀maɖɔ̃̀.

11 Kíbí ǹ fùɖá ńnɔ́-ìnà-mi gé ɛ́,

à kɛ́ mi sɔ nɛ́sɛ̀ fɛ́ɛ.

Títí kíbí ìnà-mi kɛ́fũ̀ mi si ɛ́ ní ò dzɛ́ Ɔ̀ɖáyé-mi ɛ́.

12 Máa gbé nóòtèrè fú mi ɖé!

Iŋɛ́ yèé tse ɛ́, ǹ ti wà gbɔ́ ìdzã̀mà-àtsubi,

tsí agbàfúnɛ kò sí.

13 Lalá-akɔ ŋa sú wérí mi si nyàgã̀ã̀.

Ɛrã-ìlú-Bàsánì ŋa sú wérí mi si.

14 Dzàntá afanɛ ya dzɛ ŋa ní à dzɛ́ si ɛ́!

À náa wà ké, tsí tsã́rũ si nyàà ńǹtá-mi si.

15 Àmí tã́ ɖí mi si kíbí à náa mú omi ɖà,

tsí náa tsã̀ wáa lɔ bɛ́ ɛ́.

Ara kpa si fú mi kpó wɔ́lɔ́wɔ́lɔ́.

Inɔ́-mi fɔ́tɔ̀, tsí yɔ́ si kpó.

16 Gɛ̀gɛ̀-mi gbɛ̃ si kíbí ìkpã́ã̀nɖè,

tsí iŋá-mi tamá làngàrà si.

Nétí-isà ní ò kɛ́ mi si ɛ́.

17 Adzá ŋa wérí mi si nyàgã̀ã̀.

Atseébàɖí ŋa sú wérí mi si.

À lu ɔwɔ́-mi òŋu ɛsɛ̀-mi ŋa.

18 Màa nyáa kã ekũkũ-ara-mi ŋa kpó.

Ɔ̀nyà ŋa wà rí mi, tsí wà wò mí náàwògbã̀.

19 À kpɛ̃́ èbò-ara-mi ŋa,

tsí à ɖìbò-ìwɔ̀ra-mi, tsí ká ń ma adzogú-ɛ̀. ^*

20 Ó ɖi, ìwɔ Ɔlɔ́dzɔ́, máa gbé nóòtèrè fú mi ɖé!

Óò, oláàmí-mi, yára wáa gbà mí ɖé!

21 Gba mí nárũ-tàsú,

tsí o gbà mí nɔ́wɔ́-adzá ŋa.

22 Gbà mí nárũ-dzàntá òŋu òho-ɛfã̀ ŋa.

Áà! Ò dzɔ́ŋù fú mi!

23 Màa fɔ̀ fú àdzɔ́bí-mi ŋa ní ò tókpá ìɖéǹɖè,

tsí màa wà nyɛ̀ɛ́ ńǹkpérí-asɛ̃ Ɔ̀ɖáyé ŋa,

tsí wà fɔ̀ ní:

24 Ɛ̀ŋɛ anáàrísá fú Ɔlɔ́dzɔ́ ŋa, è nyɛ̀ɛ́!

Ɛ̀ŋɛ ìbìmbí ìrènrè-Yákúbà ŋa kpó, è nyɛ̀ɛ́!

Ɛ̀ŋɛ ìbìmbí ìrènrè-Ìsàràyɛ́lì ŋa kpó,

è ŋá kpàkpàkpà nódzú-ɛ̀.

25 Iŋɛ́ yèé tse ɛ́, Ɔlɔ́dzɔ́ kò kɔ olákèmà

nàmí kó máa tsã́rũ si ńnɛ̀ fúu ńǹréré-ɛ̀.

Kò mú ara-ɛ̀ ɖúkùú.

Ó gbɔ́ igbe-ɛ̀ kíbí ó ɖɔ̃́ kpèé ɛ́.

26 Ìwɔ ní náa tse tsí mà nyɛ̀ɛ́ ńǹkpérí-asɛ̃ Ɔ̀ɖáyé ŋa á.

Tsí mà sã àlé-mi ŋa nódzú-anáàrísá fɛ́ɛ ŋa.

27 Atara-nɛ bɔlɛ̀ ŋa, èsè nákó tsɔ̀ ŋá kũ̀.

Awo Ɔlɔ́dzɔ́ ŋa, à nákó wà nyɛ̀ɛ́.

Ire-agbó òŋu atɔ́ fú ŋɛ́!

28 Àdzàkáyé ɛ́ kpó nákó tédzú Ɔlɔ́dzɔ́,

tsí nyí sɛ̃̀ wá ńɖɔ̀-ɛ̀.

Aro ŋa ńǹtalɛ̀ ɛ́ kpó, à nákó wáa mú erí kãlɛ̀ fúu.

29 Ti Ɔlɔ́dzɔ́ ní dzɛ́ oyè dzídzɛ ɛ́,

tsí ó kpɛ̀tsɛ fú ɔ̀nyà-ìlú ŋa.

30 Ɛnɛ yèé ŋa wà nɔ́ɔ̀dzɛ̀ si ńǹtalɛ̀ bí ɛ́ nákó mú erí kãlɛ̀ fúu.

Agbé nɔ́ɔ̀nà-ilé-ikú ŋa nákó kálɛ̀ fúu.

Ɔlɔ́dzɔ́ kàkó kɔ̀ ŋá dzɔ̀ɔ́ si náàyɛ̀.

31 Ɔmalɔ́ma-ŋà ŋa nákó wáa sɛ̃ Ɔlɔ́dzɔ́.

À nákó kpɛ̀rɔ́-Ɔlɔ́dzɔ́ fú ɔmalɔ́ma-ànyìwà ŋa gbo.

32 À nákó wáa dzíkɔ̀-òtítɔ́ tsítse-ɛ̀

fú ɔ̀nyà-ìlú ànyìwà ŋa ní: Ɔ̀ɖáyé ní tsitsɛ́ ɛ́.

Orĩ-Ɖàfíɖì

1 Ɔlɔ́dzɔ́ wà ró mi.

Àdzò kàkó ya mí.

2 Náa tse tsí mà lɔ káà míra.

Ḿbí kóko náa ɖú mɛ̀mɛ̀mɛ̀ lɔ si ɛ́,

ní náa mú mi tɛ́ ɛ́.

Náa gbɛ̃́ mi lɔ nétíɖò yèé ŋa wà tsã̀ rɛ́rɛ́rɛ́ ɛ́.

3 Náa tse tsí àmí titɔ̃-kã̀ náa kò mí si.

Náa gbɛ̃́ mi si nɔ́ɔ̀nà-ire

àtsùgbée kó nya iyì-tòŋu ká-ɛ̀ ɖíre.

4 Bí ɔ̀gbɔ̃ kpòkùkù si kpìrìm,

tsí ǹ wà gbà ńnɛ̀ gìɖì oo,

ɛ̀ɖɔ̃̀ kà ɖá mi. Iŋɛ́ yèé tse ɛ́,

nà wà náànyì-mi si gé ni.

Ɔ̀kpá-ɛ̀ɛ òŋu kùnɖùrù-ɛ̀ɛ

náa tse tsí ɛ̀ɖɔ̃̀-mi kà mì dzígí.

5 Ò tɛ́ kpɔ̃rɔ̃, tsí wà ń gbà mí náàledzò

ńgeŋgele-imɔ́-ɔ̀tɛ̀-mi ŋa.

Ò tsàɖɛ̃́ rṹrũ̀ fĩ́rĩ́fĩ́rĩ́ ɖà néwo fú mi.

Kɔ̃́ŋúkɔ̃́ŋú-mi náa kɔ̃́ si tɛ́tɛ́tɛ́, tsí wà ɖànu.

6 Ɛ̃ɛ̃, ore òŋu òtítɔ́ tsítse,

nákó wà lé mi bá nɔ́dzɔ́ kɔ́dzɔ́ náyé-mi.

tsí màa gbé ńlé-Ɔlɔ́dzɔ́ si títí làkóò làkóò.

Ɔlɔ́dzɔ́ olíkpá wà wɔ̀ ńǹɖòɖò-ilé-ɛ̀

1 Orĩ-Ɖàfíɖì.

Ìtalɛ̀ ɛ́ òŋu iŋɛ́ kpó yèé wà ńǹtá-ɛ̀ ɛ́,

ayé gbangba á kpó òŋu ɔ̀nyà yèé ŋa kpó wà ńnɔ́-ɛ̀ ɛ́,

ti Ɔlɔ́dzɔ́ ní à dzɛ́ ɛ́.

2 Òŋu ní ɖá ayé gbaŋgba á si ńǹtá-àhũ ŋa á.

Ó banɛ́-ɛ̀ si ńǹtá-omi ŋa, tsí kò wà mì dzígí.

3 Nɛ̀ɛ́ nákó nyáa gu òkè-Ɔlɔ́dzɔ́ lɔ?

Nɛ̀ɛ́ nákó nyáa káà ɖóro ńnɔlé-Ɔ̀ɖáyé?

4 Ɛnɛ yèé dzɛ́ kòmàkã̀, tsí inɔ́-ɛ̀ má á ni.

Iŋɛ́-òɖòbò-kã̀ kpókpó tsítse kà dzɔdzú-ɛ̀,

tsí kó tsòɖòbò gbo, tsí kpe iŋɛ́ si ńǹtá-ɛ̀.

5 Ɔlɔ́dzɔ́ náa tu kùsɛ̀ɛ̀ fúu,

tsí Ɔ̀ɖáyé-ɛ̀ agbanɛlà náa gbàá nɔ́ɔ̀nyà-atsòtítɔ́.

6 Bɛ́ɛ̀ ní ìbìmbí-awo Ɔ̀ɖáyé ŋa náa wà á,

àŋa awòɛ́ ŋa, ìwɔ Ɔ̀ɖáyé-Yákúbà.

Sɛ́là

7 Èkũ̀ ŋa, è tsí dzɔ̀ɔ́ gbàgàlàà!

È tsí dzɔ̀ɔ́, ɛ̀ŋɛ èkũ̀ lɛ́lɛ́ǹlɛ̀lɛ̀ ŋa!

Kó wɔlé! Ólú olíyì kó wɔlé!

8 Nɛ̀ɛ́ dzɛ́ ólú olíyì ɛ́ ná?

Ɔlɔ́dzɔ́ ɛnɛ yèé le, tsí náa dzogu tó bɛ́ɛ̀ ɛ́,

Ɔlɔ́dzɔ́ ɛnɛ yèé adzogu-tɛ̀ɛ̀ kò wà á, òŋu ni.

9 Èkũ̀ ŋa, è tsí dzɔ̀ɔ́ gbàgàlàà!

È tsí dzɔ̀ɔ́, ɛ̀ŋɛ èkũ̀ lɛ́lɛ́ǹlɛ̀lɛ̀ ŋa!

Kó wɔlé! Ólú olíyì kó wɔlé!

10 Nɛ̀ɛ́ dzɛ́ ólú olíyì ɛ́ ná?

Ɔ̀ɖáyé Oláyé gbaŋgba á, òŋu ní dzɛ́ ólú olíyì ɛ́.

Sɛ́là

Ɔlɔ́dzɔ́, ɖíre ɔ̀nà fú mi,

tsí o mú àbi-mi ŋa tɔrɛ

1 Orĩ Ɖàfíɖì.

Ɔlɔ́dzɔ́, ǹ wá ńɖɔ̀-ɛ̀ɛ.

2 Ɔ̀ɖáyé-mi,

ǹ karalé si ńǹtá-ɛ̀ɛ.

Máa mú mi dzanɔ́ ɖé!

Ɔ̀tɛ̀-mi ŋa kó máa dzàdzàbɔ́-mi!

3 Amódzú si nɔ́ɔ̀nà si fɛ́ɛ ŋa kpó fee,

ɔ̀kã̀-ŋa-kã̀ kàkó dzanɔ́.

Ó ɖi, amúnɛ tà nóòkṹnù ŋa òŋu,

à nákó dzanɔ́ gé ni.

4 Ɔlɔ́dzɔ́, tse tsí n ma ɔ̀nà-ɛ̀ɛ ŋa fífà.

Kɔ́ mi, tsí n wà fa ɛkpa-ɛ̀ɛ ŋa.

5 Wà gbɛ̃́ mi nóòtítɔ́-ɛ̀ɛ,

tsí o wà kɔ́ mi, iŋɛ́ yèé tse ɛ́,

ò dzɛ́ Ɔ̀ɖáyé agbàmílà.

Nɔ́dzɔ́ kɔ́dzɔ́, odzú-mi kà nyà nɔ́ɔ̀nà fɛ́ɛ.

6 Ɔlɔ́dzɔ́, tédzú ní nà ti rí ànyínɔ́ fúnɛ

òŋu kíbí nà nɛ́ àmúɖɔ̃̀ fúnɛ tó si ɛ́.

7 Máa wo àbi yèé ŋa ǹ dzɛ náàtìlɛ̀nɖe

òŋu kò sã̀ yèé mà tse ŋa á. Ɔlɔ́dzɔ́,

nà tédzú mi ńǹrɔ́-kíbí nà nɛ́ àmúɖɔ̃̀ fúnɛ ɛ́,

náàtsùgbée ore tsítse-ɛ̀ɛ.

8 Ɔlɔ́dzɔ́ sã̀ ìɖéǹɖè ni, kà tse sé.

Kó ɖíre ɔ̀nà fú adzàbi ŋa.

9 Náa gbɛ̃́ ataranɛ bɔlɛ̀ ŋa si nɛ́kpa-òtítɔ́ tsítse,

tsí náa kɔ́ ŋa nɔ́ɔ̀nà-ɛ̀ fífà.

10 Ɔ̀nà-Ɔlɔ́dzɔ́ ŋa fee, àkaralé wà ńŋa, tsí à dzɛ́ òtítɔ́

fú ɛnɛ yèé ŋa wà tse si ńǹtá-ɛkpa yèé wà ńǹmɔ̀lɛ̀-ɛ̀ ɛ́.

11 Náàtsùgbée ká bùɖì si fú ɛ́kɔ-ɛ̀ɛ fee,

mú íbàɖí-mi lákṹ ɛ́ tɔrɛ fú mi ɖé!

12 Bí ɔ̀nyà-kã̀ dzɛ́ anáàrísá fú Ɔlɔ́dzɔ́,

Ɔlɔ́dzɔ́ náa ɖíre ɔ̀nà yèé kó tsã̀ á fúu.

13 Ɔlɔ́dzɔ́ náa mú ɔlá-ɛ̀ wɛɛ́wo-ire,

tsí ìlú náa ɖi ti ɔmalɔ́ma-ɛ̀ ŋa.

14 Ɔlɔ́dzɔ́ náa kɔ ara-ɛ̀ dzɔ̀ɔ́ fú anáàrísá fúu ŋa,

tsí náa tse tsí à náa ma ìmɔ̀lɛ̀-ɛ̀.

15 Odzú-mi náa ta Ɔlɔ́dzɔ́ si gé ni.

Iŋɛ́ yèé tse ɛ́, náa gbà mí nárũ-àbìtì.

16 Nyí wò mí ɖé! Rí ànyínɔ́ fú mi!

Iŋɛ́ yèé tse ɛ́, ǹ kí èmi níìkã̀, tsí furu si.

17 Odzo wà tse mí tó bɛ́ɛ̀.

Ìsérè-mi ròmá si, gbà mí ɖé!

18 Rí ìŋàrĩ́-mi òŋu òfò-mi gé!

Mú àbi-mi ŋa kpó tɔrɛ fú mi.

19 Rí kíbí ɔ̀tɛ̀-mi ŋa kpɔ̀ si tó gé!

À kò wà rí mi nódzú, tsí à lásì si.

20 Tsɛ́wé bò mí, tsí o gbà mí dzɔ̀ɔ́!

Ńɖɔ̀-ɛ̀ɛ ní mà sá ɖúkù ɛ́, máa mú mi dzanɔ́!

21 Ká máa rí íbàɖí-kã̀ fɔ̀ nára-nɛ

òŋu ká karalé si ńǹtá-nɛ ká tsɛ́wé bò mí.

Odzú-mi wà nɔ́ɔ̀nà si fɛ́ɛ!

22 Óò Ɔ̀ɖáyé! Gbà Ìsàràyɛ́lì dzɔ̀ɔ́ ɖé!

Gbàá dzɔ̀ɔ́ nárũ-òfò-ɛ̀ ŋa kpó!

Olínɔ́ mímá wà wúùre

1 Orĩ-Ɖafíɖì.

Ɔlɔ́dzɔ́, kpɛdzɔ́ fú mi.

Inɔ́-mi má si, tsí ǹ karalé si ńǹtá-Ɔlɔ́dzɔ́.

Ǹ kàkó mì dzígí.

2 Ɔlɔ́dzɔ́, rí inɔ́-mi lɔ ńŋɔ́nɔ́ŋɔ́nɔ́-ɛ̀.

Tse àɖã́wò fú mi.

Yɛ ìsérè-mi wò, tsí o rí inɔ́-mi.

3 Iŋɛ́ yèé tse ɛ́, ǹ wà rí òtítɔ́ tsítse-ɛ̀ɛ.

Tsí ǹ wà rɛ̃̀ nóòtítɔ́-ɛ̀ɛ gbo.

4 Ǹ kà dzokó náàŋírĩ-atsòɖòbò ŋa.

Ǹ kà ɖɔ́ɔ̀há-atsendzɔdzú ŋa.

5 Ǹ nya ɛgbɛ́-atsekòsã̀ ŋa kãdzú.

Ǹ kà ɖɔ́ɔ̀há-atseébàɖí ŋa.

6 Mà gbákpá gbɛ́sɛ̀,^*

tsí ń nyà ɖíre ní tèmi nòkṹnù ni.

tsí mà nyí wérí ìdzɛ̀bɔ-ɛ̀ɛ Ɔlɔ́dzɔ́,

7 tsí wà ɖúgbe ɖɔ́kpɛ́ fɛ́ɛ,

tsí wà kpɛ̀rɔ́-iŋɛ́ tsítse-ɛ̀ɛ lákṹ lákṹ ŋa á.

8 Ɔlɔ́dzɔ́, mà dzáfɔ̀-ilé-ɛ̀ɛ, ìɖìgbé-ɛ̀ɛ,

ḿbí iyì-ɛ̀ɛ náa wà si ɛ́.

9 Máa módzú-adzàbi ŋa wò mí ɖé!

Máa dzɛ́, tsí n kú ikú-kpanɛ kpanɛ ŋa.

10 Ìtsekíìtse kpɛ́tɛ-ɔwɔ́-ŋa si,

tsí à náa mú èrè-ɖùkùḿɖùkùm̀ banɛ́ nóòtã́ si.

11 Inɔ́-mi má si.

Mú ànyínɔ́ gbà mí dzɔ̀ɔ́ ɖé!

12 Ǹ ɖóro ńǹtalɛ̀ kpãkpãnkpãã si náàrì mì dzígí,

tsí ńǹkpérí-asɛ̃ Ɔ̀ɖáyé ŋa, màa ɖɔ́kpɛ́ fú Ɔlɔ́dzɔ́.

Ɛ̀ɖɔ̃̀-mi kà mì dzígí ńɖi-Ɔlɔ́dzɔ́

1 Orĩ-Ɖafíɖì.

Ɔlɔ́dzɔ́ dzɛ́ odzúná fú mi òŋu agbàmílà.

Nɛ̀ɛ́ màa sá ná?

Ɔlɔ́dzɔ́ ní dzɛ́ ɛnɛ yèé mà ɖárè ɛ́.

Nódzú-nɛ̀ɛ́ màa wà ŋá kpàkpàkpà ná?

2 Bí ɔ̀nyà-íbàɖí ŋa bɔ́ dzì ńǹtá-mi,

ní àŋa kó mú mi tsɛ̀rá,

ɔ̀tɛ̀-mi atseébàɖí nyɛ̀ŋɛ̀ ŋa,

àŋa ká-ŋa ní nákó kɔsɛ̀, tsí bɔ́ taánù ɛ́.

3 Bí adzogu ŋa ǹɖe,

tsí wáa sú wérí mi nyàgã̀ã̀,

ɛ̀ɖɔ̃̀-mi kà mì dzígí.

Bí ogu ɛ́ gìɖì ró si ńǹtá-mi, ǹ kà kíyá.

4 Ǹ bere Ɔlɔ́dzɔ́ ńŋɛ́-kã̀,

tsí ǹ báa banɛ́ si.

Iŋɛ́ ɛ́ ní wà dzɛ́ ní fee,

n gbé ńnɔlé-Ɔlɔ́dzɔ́ si nɔ́dzɔ́ kɔ́dzɔ́ ńnɔ́-ayé-mi kpó,

tsí wà gbáɖɔ̃̀-Ɔlɔ́dzɔ́,

tsí wà wo awù-ɛ̀ gbo ńnɔlé-ɛ̀ ɛ́.

5 Iŋɛ́ yèé tse ɛ́, bí àtsubi wá,

nákó tsɛ́wé bò mí ńnɔ́-awúrɛ́-ɛ̀.

Nákó mú mi ɖúkù lɔ ńlé-ɛ̀.

Nákó kɛ́ mi si ńǹtá-òkúta lákṹ gíga-kã̀.

6 Ḿbɛ̀ɛ́, màa kã́rũ-ɔ̀tɛ̀-mi yèé ŋa wérí-mi si ɛ́.

Ńnɔlé-Ɔlɔ́dzɔ́ ɛ́, màa tsɛbɔ, tsí wà kpawɔ́,

tsí wà kɔ̃rĩ nyɛ̀ɛ́.

Tsí màa wà ta aɖùrù gbo, tsí wà kɔ̃rĩ nyɛ̀ɛ́.

7 Ɔlɔ́dzɔ́, gbɔ́ kíbí ǹ wà ɖúgbe kpèɛ́ ɛ́ ɖé!

Rí ànyínɔ́ fú mi, tsí o dzɔ́ŋù fú mi.

8 Mà wà tsèsérè-afɔ̀-ɛ̀ɛ yèé ò fɔ̀ si ní:

" È wò mí ɛ́! " Ɔlɔ́dzɔ́, ǹ wà wòɛ́.

9 Máa mú ara-ɛ̀ɛ ɖúkù mí!

Máa mú inɔ́ bíbí-ɛ̀ɛ nya adzítsɛ́-ɛ̀ɛ si níìkã̀!

Ìwɔ ní gbà fú mi ɛ́.

Ɔ̀ɖáyé agbàmílà, máa ǹɖe ńɖɔ̀-mi, máa kɔ̀ mí.

10 Bí boba kɔ̀ mí, ínà kɔ̀ mí!

Ɔlɔ́dzɔ́ òŋu nákó gbà mí si ńɖɔ-ara-ɛ̀.

11 Ɔlɔ́dzɔ́, ɖíre ɔ̀nà-ɛ̀ɛ fú mi.

Bí múnɛmúnɛ ŋa ɖíìnà si fú mi gìɖì,

gbɛ̃́ mi gba ɔ̀nà-ire.

12 Máa kɔ̀ mí dzɔ̀ɔ́, tsí n kí nɔ́wɔ́-ɔ̀tɛ̀-mi ŋa.

Iŋɛ́ yèé tse ɛ́,

atsòɖòbò ŋa ɖì gìrìdzàà si ńǹtá-mi si,

tsí à gboró si tó bɛ́ɛ̀.

13 Ǹ karalé si ní màa rí ore tsítse-Ɔlɔ́dzɔ́

ńǹtalɛ̀-àwáàyɛ̀ ŋa kpoŋu gé ní ó dzɛ́ ɛ́.

14 Ɖóro ɖe Ɔlɔ́dzɔ́.

Módzú gbó, tsí o tsɔnɔkɛ̃̀ɛ̃.

Ɖóro ɖe Ɔlɔ́dzɔ́.

À ɖɔ̃́ kpe Ɔlɔ́dzɔ́, tsí ó dzɔ́ŋù

1 Orĩ-Ɖàfíɖì.

Ɔlɔ́dzɔ́, ǹ wà ɖɔ̃́ kpèɛ́.

Òkúta lákṹ-mi, máa fetíkpamí.

Bí ò fetíkpamí fee, mà dzì nɔ́ɔ̀nà-ilé-ikú.

2 Gbɔ́ŋù-ìkálɛ̀-mi

bí ǹ wà ɖɔ̃́ kpèɛ́,

bí ǹ kɔ́wɔ́ lɔ ńǹgbèrí nɔ́wɔ́-ìɖòɖò-ilé-ɛ̀ɛ.

3 Máa mú odzú-ìrɔ́-ɔ̀kã̀ntso wo èmi atseébàɖí ŋa

òŋu ɔ̀nyà-íbàɖí ŋa méèdzì.

À náa wà fɔ afɔ̀-tútùúrɔ̀ fú enìkéèdzì-ŋa,

ó ɖi, inɔ́-àŋa ká-ŋa náa kã si.

4 Tseé si ńnɛ̀ fú ŋa ńǹrɔ́-itsɛ́-ŋa tsítse,

tsí o sã ɛŋɛ̀ fú ŋa ńǹrɔ́-ńǹrɔ́-íbàɖí-ŋa tsítse.

Tseé si ńnɛ̀ fú ŋa ńǹrɔ́-itsɛ́-ɔwɔ́-ŋa,

sã ɛŋɛ̀ fú ŋa dzì ńǹɖì-ɛ̀.

5 Ìtsèntse-Ɔlɔ́dzɔ́ niì,

itsɛ́-ɔwɔ́-ɛ̀ ŋa niì, kà tsɛdzɔ́-ŋa.

Ɔlɔ́dzɔ́ kó ɖíwó-ŋa,

kó máa kɛ́ ŋa ǹɖe láyé ró.

6 Kùsɛ̀ɛ̀ fú Ɔlɔ́dzɔ́,

iŋɛ́ tse ɛ́, ó gbɔ́ ìkálɛ̀-mi ŋa.

7 Ɔlɔ́dzɔ́ dzɛ́ olí-àmí-mi òŋu àkpó-mi.

Òŋu ní mà mí kã̀ á, tsí náa gbà fú mi.

Ayè wà tɛ́ mi, tsí ǹ wà kɔ̃rĩ ŋa, tsí wà ń nyɛ̀ɛ́.

8 Ɔlɔ́dzɔ́ dzɛ́ àmí fú ɔ̀nyà-ìlú-ɛ̀ ŋa.

Ó dzɛ́ ḿbí à náa sá ɖúkù,

tsí kó gba ɛnɛ yèé ó tsã̀,

tsí ó fú nɛ́ɛ̀tsɛ ɛ́ là.

9 Gba ɔ̀nyà-ìlú-ɛ̀ɛ ŋa là,

tsí o tu kùsɛ̀ɛ̀ fú tɛ̀ɛ ɔ̀nyà-ìlú-ɛ̀ɛ ŋa.

Ró ŋa, tsí o wà banɛ́ ŋa títí lɔ.

Oŋù-Ɔlɔ́dzɔ́ wà ɖɔ̃́ ńnɔ́-òdzò-awu

1 Orĩ-Ɖàfíɖì.

È fɔ̀ ní Ɔlɔ́dzɔ́ níyì, tsí tókpá ìɖéǹɖè,

Adzĩtsɛ́-ɔ̀rɔ̃ ŋa, è fɔ̀ ní Ɔlɔ́dzɔ́ níyì, tsí tókpá ìɖéǹɖè.

2 È fɔ̀ ní ɛ́kɔ-Ɔlɔ́dzɔ́ níyì ìɖéǹɖè!

È mú erí kãlɛ̀ fú Ɔlɔ́dzɔ́ olí-mímá yòɖòɖòò!

3 Bí Ɔlɔ́dzɔ́ tsóŋù,

oŋù-ɛ̀ náa wà ké ńǹtá-omi ŋa.

Ɔ̀ɖáyé olíyì náa mú àyèrá ké.

Ɔlɔ́dzɔ́ kpàtà lé ńǹtá-omi tɛ̀ngɛ̀lɛ̀ɛ̀ ŋa.

4 Bí Ɔlɔ́dzɔ́ tsóŋù, náa ɖɔ̃́ òŋu ikpá.

Bí Ɔlɔ́dzɔ́ tsóŋù, náa nya lílákṹ-ɛ̀ ɖíre.

5 Bí Ɔlɔ́dzɔ́ tsóŋù,

náa tsɛ́gi-sɛ́ɖìrì ŋa.

Ɔlɔ́dzɔ́, náa tsɛ́gi-sɛ́ɖìrì-òkè-Lìbánì ŋa.

6 Bí Ɔlɔ́dzɔ́ tsóŋù,

òkè-Lìbánì náa wà fò kéréŋú kéréŋú

kíbí ɔma-lalá bɛ́.

Bí Ɔlɔ́dzɔ́ tsóŋù,

òkè-Sìrìyónì ^* gbo náa wà fò kéréŋú kéréŋú

kíbí ɔma-ɛfã̀ bɛ́.

7 Bí Ɔlɔ́dzɔ́ tsóŋù,

iná náa wà gbã̀ bìlàbìlà.

8 Bí Ɔlɔ́dzɔ́ tsóŋù,

ɔ̀ɖã̀ náa wà mì kpó kpìkpìkpì.

Ɔlɔ́dzɔ́ náa tse tsí ɔ̀ɖã̀-Kàɖɛ́tsì náa wà mì kpó kpìkpìkpì.

9 Bí Ɔlɔ́dzɔ́ tsóŋù,

náa tse tsí àgbã̀rĩ́ yèé ɖì si ŋa á náa bíma ńkpá.

Bí Ɔlɔ́dzɔ́ tsóŋù, igbó ŋa náa kí néèwò.

Tsí iŋɛ́ kpó yèé wà ńnɔlé-ɛ̀ ɛ́,

náa wà fɔ̀ ní: Iyì ni ti Ɔ̀ɖáyé!

10 Ɔlɔ́dzɔ́ dzoyè si ńǹtá-omi yèé gba ìtalɛ̀ kpó rɔ̃gbɔ̃gbɔ̃ɔ̃ ɛ́.

Ɔlɔ́dzɔ́ wà dzoyè ìɖéǹɖè títí lɔ náàrìmáa tã́.

11 Ɔlɔ́dzɔ́ nákó fú ɔ̀nyà-ìlú-ɛ̀ ŋa náàmí.

Ɔlɔ́dzɔ́ nákó tu kùsɛ̀ɛ̀ fú ŋa, tsí à nákó wà ńtútùúrɔ̀ si.

Ɖàfíɖì wà ɖɔ́kpɛ́ fú Ɔlɔ́dzɔ́ ní ó gba òŋu là

1 Orĩ-Ɖafíɖì.

Orĩ-ká ń nya ilé-Ɔ̀ɖáyé fùɖá ni.

2 Ɔlɔ́dzɔ́, ǹ wà nyɛ̀ɛ́,

iŋɛ́ yèé tse ɛ́, ò kpɔ̀ mí fùɖá ńnɔ́-ɔ̀fɛ̀.

Ò kò dzɛ́ ní n ɖi oláàrĩ́ fú ɔ̀tɛ̀-mi ŋa.

3 Ɔlɔ́dzɔ́ Ɔ̀ɖáyé-mi,

ǹ ɖúgbe kpèɛ́, tsí ò bɔ mí.

4 Ɔlɔ́dzɔ́, ò kpɔ̀ mí fùɖá ti ńlé-ikú,

tsí fú mi náàyɛ̀ ńǹwèrè yèé ǹ wɔsà làkóò ɛ́.

5 È kɔ̃rĩ, tsí nyɛ Ɔlɔ́dzɔ́ ɛ̀ŋɛ yèé dzɛ́ tɛ̀ɛ̀ ŋa á.

È nyɛ̀ɛ́, tsí e fɔ̀ ní ó dzɛ́ olí-mímá.

6 Abínɔ́ fú àsòkò-kã̀.

Anyɔ́nɔ́-nɛ lɔ títí fú àrìmáa tã́.

Ɔkṹ sísɔ̃ náa wà si lɔ fú alɛ́.

Ó ɖi, náàwúrɔ̀ fee, igbe-ayè títɛ́ ni.

7 Ó ɖi, èmi ǹ kà kíyá,

tsí mà wà fɔ̀ ní: "Màa dzokó si rìgírìgí náàrì mì dzígí.

8 Ɔlɔ́dzɔ́, ore-ɔ̀fɛ́-ɛ̀ɛ tse tsí ǹ dzokó si kìrì kíbí òkè bɛ́.

Tsí ò mú ara-ɛ̀ɛ ɖúkù mí,

tsí ìsérè-mi ròmá kpó.

9 Ɔlɔ́dzɔ́, ǹ ɖúgbe kpèɛ́,

tsí tsìkálɛ̀ fɛ́ɛ.

10 Èrè mɛ̀ɛ́ wà ńnɛ̀ fɛ́ɛ bí ikú kpa mí,

tsí ǹ wɔsà lɔ ná?

Rùfù nákó nyáa nyɛ̀ɛ́ yáà?

Nákó nyáa kpɛ̀rɔ́-kíbí àkaralé wà ńǹtá-ɛ̀ɛ tó ɛ́ɛ̀?

11 Ɔlɔ́dzɔ́, rɛ̃tígbè, tsí o rí ànyínɔ́ fú mi ɖé!

Ɔlɔ́dzɔ́, wáa gbà fú mi ɖé!

12 Ò tse tsí àbo rírã́-mi ɖi ayè títɛ́.

Ò bɔ́ ìwɔ̀ra-okpó ǹɖe nára-mi,

tsí mú ìwɔ̀ra-ɔɖɔ̃́ wɔ̀ fú mi.

13 Ḿbɛ̀ɛ́, màa wà kɔ̃rĩ fɛ́ɛ, náàrìmáa mí.

Ɔlɔ́dzɔ́ Ɔ̀ɖáyé-mi, màa wà nyɛ̀ɛ́ làkóò làkóò gé ni.

Ɔlɔ́dzɔ́, nɔ́wɔ́-ɛ̀ɛ gé ní ǹ bɔ̀ si ɛ́

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ ɛ́ ní. 2 Ɔlɔ́dzɔ́, ńɖɔ̀-ɛ̀ɛ ní mà sá ɖúkù ɛ́.

Máa dzɛ́, tsí n dzanɔ́ láyé.

Gbà mí dzɔ̀ɔ́, iŋɛ́ yèé tse ɛ́,

Ò kà tsòkṹnù.

3 Rɛ̃tígbè-mi, tsí o yára wáa gbà mí dzɔ̀ɔ́ ɖé!

Ìwɔ ní dzɛ́ òkúta lákṹ yèé náa tsɛ́wé bò mí ɛ́,

tsí ìwɔ ní dzɛ́ ḿbí mà sá ɖúkù, tsí ɔwɔ́ kà tɛ̀mí ɛ́.

4 Ìwɔ ní dzɛ́ òkúta lákṹ fú mi

òŋu ɛnɛ́ mà ɖárè ɛ́.

Àkaralé wà ńǹtá-ɛ̀ɛ.

Nà gbɛ̃́ mi, tsí ɖíre ɔ̀nà fú mi.

5 Nàa nyà mí nárũ iwúrɛ́ yèé à sɔ si fú mi ɛ́,

iŋɛ́ yèé tse ɛ́, ìwɔ ní mà ɖárè ɛ́.

6 Ǹ kɛ́ àyɛ̀-mi, tsí ń bɔwɔ́-ɛ̀ɛ.

Ò gbà mí rà Ɔlɔ́dzɔ́ ìwɔ Ɔ̀ɖáyé òtítɔ́.

7 Mà nya amíkã iŋɛ́-akpotu ŋa kãdzú.

Èmi òŋu mà wà mí kɛ̃̀ɛ̃́.

8 Mà dzídzó-ayètítɛ́ náàtsùgbée àmúɖɔ̃̀-ɛ̀ɛ,

iŋɛ́ yèé tse ɛ́, ò rí òfò-mi,

tsí ò rí ìŋàrĩ́-mi gbo.

9 Ò kò kɔ̀ mí dzɔ̀ɔ́ nɔ́wɔ́-ɔ̀tɛ̀-kã̀.

Ò tse tsí ǹ ɖóro si náàrì mì dzígí,

tsí ò fú mi náyè.

10 Ɔlɔ́dzɔ́, rí ànyínɔ́ fú mi ɖé! Ǹ wà ńǹŋàrĩ́ si.

Ara kú mi si títí nàa ríi mà nódzú-mi,

tsí ó gba ara-mi òŋu àyɛ̀-mi si kpó.

11 Ara kúkú ní bòkó tã́ ayé-mi ɛ́.

Ǹ wà gbɛ̃ hũ̀ũ̀ hũ̀ũ̀ nɔ́ɖɔ̃́ kɔ́ɖɔ̃́.

Náàtsùgbée àbi yèé ǹ dzɛ ɛ́, àmí tã́ ɖí mi,

tsí nàa fɔ̀ ní ekũkũ kò wà nára-mi ró ni.

12 Ǹ ɖi oléèkpè si fú ɔ̀tɛ̀-mi ŋa kpó,

tsí yèé yɔ ɛ́, enìkéèdzì-mi ŋa gìɖì gbo náa wà la èkpè ńǹtá-mi.

Ǹ ɖi iŋɛ́-odzo si fú ɛnɛ yèé mà mí ŋa á.

Bí odzú-ŋa kã̀ mí nóòɖe gé ná,

à náa buré ɖà ńnɛ̀ ni.

13 À gbàgbé-mi kíbí ɛnɛ́ fɔ̀ ní ɔ̀nyà náa kú,

tsí à náa gbàgbé-ɛ̀ ɛ́ bɛ́.

Ǹ ɖà kíbí iŋɛ́ kò dzɔ ká lò láyé ró yí.

14 Mà gbɔ́, tsí ɔ̀nyà ŋa náa wà kpɛkɔ-mi,

tsí Ìɖìkĩìɖì ɖì ɖi odzo si fú mi kpó.

À náa mú arũ ɖé si ńǹtá-mi,

tsí à náa ɖìbò ní àŋa kó tã́ ayé-mi.

15 Ó ɖi, Ɔlɔ́dzɔ́, ǹ wà mí kɛ̃̀ɛ̃́.

Mà fɔ̀ ní Ɔ̀ɖáyé-mi fee, ìwɔ ni.

16 Ɔdzɔ́-mi ŋa bɔ̀ nɔ́wɔ́-ɛ̀ɛ si.

Gbà mí nɔ́wɔ́-ɔ̀tɛ̀-mi ŋa

òŋu atsoró bá mi ŋa.

17 Mú odzú-ire wò mí, èmi adzítsɛ́-ɛ̀ɛ.

Tsí o gbà mí là ńnɔ́-àmúɖɔ̃̀-ɛ̀ɛ.

18 Ɔlɔ́dzɔ́, kó máa dzɛ́ ní kíbí ǹ wà kpèɛ́ ɛ́,

ni n wáa dzanɔ́.

Ó ɖi, atseébàɖí ŋa òŋu ká dzanɔ́,

tsí ká kú, tsí kpa kpíríkpírí lɔ ńlé-ikú.

19 Àŋa atsòɖòbò ŋa á, ká ɖi mùnù.

Àŋa ní náa fɔ lákṹ lákṹ nára-atsòtítɔ́,

tsí wà fɔkpá, tsí kpenɛ ní kí ŋa ńnɛ̀ɛ́ ɛ́.

20 Ó ɖi, ore yèé ŋa ò kpaɖí si fú anáàrísá fɛ́ɛ ŋa á kpɔ̀ góró!

Nà tsore ɛ́ fú ɛnɛ́ náa sá ɖúkù ńɖɔ̀-ɛ̀ɛ ŋa á nódzú-ɔ̀nyà kpó.

21 Nà mú ŋa ɖúkù ḿbí ìwɔ ká-ɛ̀ɛ nà gbé ɛ́,

náàtsùgbé-ètò-íbàɖí-ɔ̀nyà ŋa kó máa tsɛ.

Nà tsɛ́wé bò ŋá fú íbàɖí-arũ-ɔ̀nyà.

22 Kùsɛ̀ɛ̀ fú Ɔlɔ́dzɔ́,

iŋɛ́ yèé tse ɛ́, ńǹwèrè yèé ɔ̀tɛ̀ ŋa wérí mi si kíbí oɖi bɛ́ ɛ́,

àmúɖɔ̃̀-ɛ̀ tsàwùsì fú mi tó bɛ́ɛ̀.

23 Tsí kíbí ara kú mi si tó ɛ́, ǹ fɔ̀ ní:

Ò nyadzú ńǹtá-mi.

Ó ɖi, ò gbɔ́ oŋù-ìkálɛ̀-mi ńǹwèrè yèé ǹ ɖɔ̃́ kpèɛ́ ɛ́.

24 È dzáfɔ̀-Ɔlɔ́dzɔ́, ɛ̀ŋɛ yèé dzɛ́ tɛ̀ɛ̀ ŋa á!

Ɔlɔ́dzɔ́ náa tsɛ́wé bo akaralé si ńǹtá-ɛ̀ ŋa.

Ó ɖi, atsekɛ́rɛ́kɛ́rɛ́ ŋa òŋu, náa tseé sã si ńǹɖì-ɛ̀ fú ŋa.

25 Ɛ̀ŋɛ kpó yèé odzú-ŋɛ́ wà nɔ́ɔ̀nà si fú Ɔlɔ́dzɔ́ ɛ́,

è módzú gbó, tsí e tsɔnɔkɛ̃̀ɛ̃.

Adzàbi-kã̀ wɛɛ́wo-ire

1 Orĩ-Ɖàfíɖì. Orĩ-ɛ̀kɔ́.

Bí à wɛ àbi-ɔ̀nyà-kã̀ ǹɖe,

tsí mú íbàɖí-ɛ̀, tsí ń tɔrɛ fúu,

ɛnɛ̀ŋɛ̀ wɛɛ́wo-ire!

2 Ɛnɛ yèé Ɔlɔ́dzɔ́ kò wà kã àtsesé-ɛ̀ kɔ̃́,

tsí kà rúnɛ gbo ɛ́, ɛnɛ̀ŋɛ̀ wɛɛ́wo-ire!

3 Kíbí mà tsikó si, tsí ǹ kà fɔ àbi-mi ŋa á, náa tse tsí

mà wà gbɔ́ ɖíɖɔ̃̀-ara-mi bɛ́ tsɛ̃̀ɛ̃̀ nɔ́dzɔ́ kɔ́dzɔ́.

4 Iŋɛ́ yèé tse ɛ́, òsã́-kã̀, òru-kã̀ á,

Ɔlɔ́dzɔ́, nà fawɔ́ tɛ̀ mí si gé ni.

Tsí náa tó mi si kíbí egi-kã̀ ńǹwèrè-gbígboná-ɔ̀sa bɛ́.

Sɛ́là

5 Ǹ dzɛ́ɛ̀rã̀-íbàɖí yèé ǹ tse ɛ́.

Ǹ kò ɖúku àbi yèé ǹ dzɛ ɛ́.

Tsí ǹ fɔ̀ ní: Màa dzɛ́ɛ̀rã̀-íbàɖí tsítse-mi ŋa fú Ɔlɔ́dzɔ́.

Tsí arù-àbi-mi yèé kpa mí si ɛ́, ò gbàá rù fú mi.

Sɛ́là

6 Ḿbɛ̀ɛ́, asɛ̃ Ɔ̀ɖáyé ɔ̀kã̀lɔ́ɔ̀kã̀ kó wà wúùre fɛ́ɛ

ńǹwèrè yèé ó wà nóòfò si ɛ́.

Bí omi kɔ̃́ oɖò lákṹ ŋa gbɛŋkɛkɛɛ gìɖì,

kàkó tì sɔ́má-ɛ̀.

7 Ìwɔ ní dzɛ́ atsɛ́wé bò mí ɛ́.

Tsí nà gbà mí nárũ-òfò.

Tsí nà mú orĩ-adzàbɔ́ ŋa sɔgbà wérí mi si.

Sɛ́là

8 Tsí ò ní: Màa tsɛ̀kɔ́ fɛ́ɛ,

tsí ɔ̀nà yèé nàa fà á, màa ɖíreé fɛ́ɛ.

Mà wà fɛ́ɛ ńfɛ̀ɛ́nɔ́, tsí wà módzú tóɛ.

9 Máa wére atsĩ òŋu dzɔ atsĩ dzɔ kɛ́tɛ́kɛ́tɛ́

yèé ŋa dzɛ́ ɛrã lahururu ɛ́.

Okù òŋu irɛ̃-arũ-ɛ̀ ní dzɛ́ àɖáɖóro,

tsí à náa wà ń gbɛ̃́ ŋa wérí ɛ́,

àtsùgbée ká máa nyáa sɔ́ tìmá-ɛ̀ɛ ɛ́.

10 Iŋɛ́ kó tsenɛ kó ɖɔ̃nɛ tsɛ̃̀ɛ̃̀ ŋa náa bá atseébàɖí.

Ó ɖi, amíkã Ɔlɔ́dzɔ́ òŋu fee,

náa gbé ńnɔ́-ore-ɔ̀fɛ́-Ɔlɔ́dzɔ́.

11 Ayè kó tɛ́ ŋɛ́ nára-Ɔlɔ́dzɔ́!

Ɛ̀ŋɛ atsòtítɔ́ ŋa, è wà náyè títɛ́ si!

È ɖúgbe ayè títɛ́, ɛ̀ŋɛ kpó yèé à ma afɔ̀-arũ-ŋɛ́ ɛ́.

Ká nyɛ Ɔ̀ɖáyé oláyé gbangba

1 Atsòtítɔ́ ŋa, è ɖúgbe-ayètítɛ́ fú Ɔlɔ́dzɔ́!

Ɛnɛ yèé ŋa inɔ́-ŋa má á ní dzɔ ní ká nyɛ Ɔlɔ́dzɔ́ ɛ́.

2 È ɖɔ́kpɛ́ fú Ɔlɔ́dzɔ́ òŋu aɖùrù.

È ta aɖùrù olókù maá ŋa, tsí ń nyɛ̀ɛ́.

3 È kɔ̃rĩ titɔ̃-kã̀ fúu.

È kɛ́ iŋɛ́-idzó ŋa,

tsí àbàlà kó wà ró si ńnɛ̀.

4 Iŋɛ́ yèé tse ɛ́, afɔ̀-Ɔlɔ́dzɔ́ ɖóro gãgã si.

tsí itsɛ́-ɔwɔ́-ɛ̀ tsítse gbo, àkaralé wà ńǹtá-ɛ̀.

5 Náa dzáfɔ̀-òtítɔ́ tsítse òŋu ɛdzɔ́ gãgã kpíkpè.

Ìtalɛ̀ ɛ́ kpó wà nyà ɖíre ní

Ɔlɔ́dzɔ́ náa nɛ́ àmúɖɔ̃̀ fúnɛ.

6 Ɔlɔ́dzɔ́ wíìnyɛ̀, tsí ń tse ɔ̀rɔ̃,

tsí iŋɛ́ kpó yèé wà nɔ́ɔ̀rɔ̃ ɛ́,

èéfù-arũ-ara-ɛ̀ ní ó ń tse ŋa á.

7 Ɔlɔ́dzɔ́ náa kpérí omi-àhũ si ńǹɖì ɔ̀kã̀ntso,

tsí kíbí à náa mú iŋɛ́-kã̀ tse ìtànyì si ɛ́,

bɛ́ɛ̀ ní ó kpaɖí àhũ lákṹ tɛ̀ŋgɛ̀lɛ̀ɛ̀ ŋa si ɛ́.

8 Ìtalɛ̀ ɛ́ kpó kó wà náàrísá fú Ɔlɔ́dzɔ́.

tsí ɔ̀nyà ŋa náyé gbaŋgba á kpó,

odzo-Ɔlɔ́dzɔ́ kó wà tse ŋá.

9 Iŋɛ́ yèé tse ɛ́, náa wíìnyɛ̀, tsí náa tsɛ.

Náa fɔ̀ ní iŋɛ́-kã̀ kó wá, tsí náa wá gbòkã́.

10 Ɔlɔ́dzɔ́ ɖíwó ètò-ìlú ŋa.

Tsí ó bàdzɛ́ ètò yèé ŋa ɔ̀nyà-ìlú ŋa tse si ɛ́.

11 Ètò-Ɔlɔ́dzɔ́ wà si títí lɔ náàrìtã́,

tsí ìsérè-inɔ́-ɛ̀ ŋa náa wà si títí lɔ ńm̀bìmbí ńǹrènrè.

12 Ìlú yèé Ɔlɔ́dzɔ́ dzɛ́ Ɔ̀ɖáyé-ɛ̀ ɛ́, ó wɛɛ́wo-ire.

Ìlú yèé Ɔlɔ́dzɔ́ tsã̀ ní kó dzɛ́ tòŋu ɛ́,

ó wɛɛ́wo-ire.

13 Fee, Ɔlɔ́dzɔ́ wà wòrã ti nɔ́ɔ̀rɔ̃.

Tsí ó wà rí ɔ̀nyà ŋa kpó.

14 Ti títí ḿbí ó dzokó náàntã̀-oyè-ɛ̀ si ɛ́,

ó wà módzú tó ɔ̀nyà-ìtalɛ̀ ŋa kpó.

15 Òŋu yèé ɖá ìsérè-ɔ̀nyà kpó ɛ́,

náa ma iŋɛ́ kpó yèé kṹnukṹ wà tse ɛ́.

16 Kò tsi adzogu-ólú ŋa

kó kpɔ̀ gbɛ̃̀ɛ̃̀ ní náa gba ólú là á.

Tsí bí àmí ko atsɔnɔkɛ̃̀ɛ̃ nɔ́ɔ̀kã̀lɔ́ɔ̀kã̀ gìɖì ɛ́,

kò tsi nyɛ̀ŋɛ̀ ní náa gbàá nárũ-ogu ɛ́.

17 Náfɔ̀-ká dzàdzàbɔ́ ɛ́,

kò tsi afɔ̀-atsĩ ni.

Tsí ikpá-atsĩ kà gbanɛ là.

18 Ó ɖi, Ɔlɔ́dzɔ́ náa módzú tó anáàrísá fúu ŋa.

Náa módzú tó ɛnɛ yèé ŋa náa wà mí kã àmúɖɔ̀-ɛ̀ ɛ́,

19 tsí kó gbà ŋá nárũ-ikú,

tsí ká wà náàyɛ̀ si ńǹwèrè-ebi dzídzà.

20 Àwa òŋu, odzú-wa wà nɔ́ɔ̀nà si fú Ɔlɔ́dzɔ́.

Agbàfúnɛ òŋu àkpó-wa ní ó dzɛ́ ɛ́.

21 Ayè títɛ́-wa náa ti ńɖɔ̀-ɛ̀ ni.

Àa wà mí kã̀ã́, iŋɛ́ yèé tse ɛ́,

ó dzɛ́ olí-mímá.

22 Ɔlɔ́dzɔ́, ore tsítse-ɛ̀ɛ kó wà ńǹtá-wa si

kíbí odzú tiwa gbo kò nyà nɔ́ɔ̀nà si fɛ́ɛ ɛ́.

Ó dzɔ ní ká nyɛ Ɔlɔ́dzɔ́

1 Orĩ-Ɖafíɖì.

Ńǹwèrè yèé ó sɔ ara-ɛ̀ ɖi asṹrṹ nódzú-Àbìmèlɛ́kì,

tsí ó lée, tsí ó lɔ ɛ́ ní ó tsɔ́ orĩ yèé ɛ́.

2 Màa wà ɖɔ́kpɛ́ fú Ɔlɔ́dzɔ́ ńǹwèrè ɔ̀kã̀lɔ́ɔ̀kã̀,

tsí n wà kɔ̃rĩ nyɛ̀ɛ́, kàkó tsìhã́-nárũ-mi.

3 Ayè wà tɛ́ mi ti nára-Ɔlɔ́dzɔ́.

Atara-nɛ bɔlɛ̀ ŋa ká wà gbɔ́ oŋù-mi,

tsí ká wà náyè títɛ́ si.

4 È nyɛ Ɔlɔ́dzɔ́ bá mi ɖé!

È fú ká kpérí nyɛ̀ɛ́!

5 Ǹ ɖɔ̃́ kpe Ɔlɔ́dzɔ́, tsí ó dzɔ́ŋù fú mi.

Dzidzi ŋa mú mi, tsí ó gbà mí nárũ-ŋa.

6 Ɔ̀nyà ɔ̀kã̀lɔ́ɔ̀kã̀ kpó yèé fodzú ta Ɔlɔ́dzɔ́ ɛ́, ayè nákó tɛ́ɛ!

Ɛnɛ nyɛ̀ŋɛ̀ kàkó dzanɔ́ láyé!

7 Olákèmà ɖúgbe, tsí Ɔlɔ́dzɔ́ gbɔ́,

tsí gbàá dzɔ̀ɔ́ nófò-ɛ̀ ŋa kpó.

8 Adzítsɛ́-Ɔlɔ́dzɔ́ náa ɖi ɔgbà,

tsí wérí anɛ́ àrísá fú Ɔlɔ́dzɔ́ ŋa,

tsí náa gbà ŋá dzɔ̀ɔ́.

9 È tɔ́ Ɔlɔ́dzɔ́ rí,

tsí e rí kíbí Ɔlɔ́dzɔ́ ɖɔ̃̀ tó gé!

Asáɖúkù ńɖi-Ɔlɔ́dzɔ́, ó wɛ éwo-ire.

10 Ɛ̀ŋɛ kpó yèé dzɛ́ ti Ɔlɔ́dzɔ́ si ɛ́,

è nɛ́ àrísá fúu, iŋɛ́ yèé tse ɛ́,

anɛ́ àrísá fú Ɔlɔ́dzɔ́ ŋa, iŋɛ́-kã̀ kpókpó kà hã́ ŋa.

11 Fee, ɔma-dzàntá ŋa ńkóko gìɖì gbo,

ara náa kú ŋa, tsí ebi gbo náa kpa ŋá!

Ó ɖi, ɛnɛ yèé náa nɛ́ àkaralé si ńǹtá-Ɔlɔ́dzɔ́ ɛ́ òŋu,

iŋɛ́-kã̀ kpókpó kà hã́ã láyé!

12 Ɔma ŋa, è rɛ̃tígbè-mi!

Màa kɔ́ ŋɛ́ náàrísá-Ɔlɔ́dzɔ́.

13 Nɛ̀ɛ́ dzáfɔ̀-kó gbé náàyɛ̀ ná?

Nɛ̀ɛ́ wà wo agbó òŋu atɔ́,

tsí kó wɛ éwo-ire ná?

14 Íbàɖí kó máa wà fùɖá nárũ-ɛ̀ɛ.

Nà mú òɖòbò tsítse té.

15 Sá fú íbàɖí tsítse, tsí o wà tse ire.

Tútùúrɔ̀ wíwò kó kpɛ̃́ɛ̃ nódzú si, tsí o wà lée bá.

16 Odzú-Ɔlɔ́dzɔ́ náa wà tó atsòtítɔ́ ŋa.

Igbe-ŋa kà kɔ àrìmáa dzì nétí-ɛ̀.

17 Ó ɖi, atseébàɖí ŋa òŋu, Ɔlɔ́dzɔ́ náa fa ɔwɔ́ tɛ̀ ŋá,

àtóotíi ká máa tédzú ŋa ńǹtalɛ̀ láyé.

18 Bí atsòtítɔ́ ŋa ɖúgbe, Ɔlɔ́dzɔ́ náa gbɔ́ɔ,

tsí náa gbà ŋá dzɔ̀ɔ́ nóòfò-ŋà ŋa.

19 Ɛnɛ yèé ìsérè kpa si ŋa á,

Ɔlɔ́dzɔ́ kà kɔ̀ ŋá dzɔ̀ɔ́.

Náa gbà fú olárakúkú ŋa.

20 Àtsubi kpíkpɔ̀ náa bá atsòtítɔ́.

Ó ɖi, Ɔlɔ́dzɔ́ náa gbàá dzɔ̀ɔ́ ńŋa kpó gé ni.

21 Náa wà tsɛ́wé bòó, tsí ekũkũ-ɛ̀-kã̀ kpókpó kà tsɛ́.

22 Àtsubi nákó kpa atseébàɖí nóòkú.

Ɔ̀tɛ̀-atsòtítɔ́ ŋa, Ɔlɔ́dzɔ́ nákó fɛtí fú ŋa.

23 Ɔlɔ́dzɔ́ náa gba adzítsɛ́-ɛ̀ ŋa là.

Kàkó kpɛdzɔ́ mú asáɖúkù ńɖɔ̀-ɛ̀ ŋa-kã̀ kpókpó.

Ɔlɔ́dzɔ́ kó dzà gbè fú tɛ̀ɛ̀ ŋa

1 Orĩ-Ɖàfíɖì.

Óò Ɔlɔ́dzɔ́, mú afɔ̀ bá amú afɔ̀ bá mi ŋa.

Dzà bá adzàbámi ŋa.

2 Kɛ́ àkpó, tsí o kɛ́ ìwɔ̀ra-irɛ̃,

tsí o wáa mɔ́wɔ́ gbè fú mi.

3 Kɛ́ ɔ̀tsɔ̀-ɛ̀ɛ, tsí o ɖíìnà fú alémi wérí ŋa.

Fɔ̀ fú mi ní èmi ní ìwɔ ní dzɛ́ agbàmílà á.

4 Awo ikú-mi ŋa, ká dzanɔ́, tsí furu.

Atsèsérè ní atsubi kó bá mi ŋa,

ká sɛ̃ ànyì, tsí kó anɔ́.

5 Ká wà kíbí nyàŋgbò yèé ŋa afɛ́fɛ́ wà fɛ́ ɛ́,

tsí adzítsɛ́-Ɔlɔ́dzɔ́ kó télè ŋá sɔ lɔ.

6 Ɔ̀nà-ŋa kó kpòkùkù kpó kpìrìm,

tsí wà yɔ̀ bɛ̀rɛ̀bɛ̀rɛ̀,

tsí adzítsɛ́-Ɔlɔ́dzɔ́ kó dzá tɛ̀ ŋá.

7 Nóòkṹnù ní à sɔ ɔ̀kpákù si fú mi ɛ́.

Nóòkṹnù ní à ɖɛ̃ ɔ̀fɛ̀ si, tsí ká ń tã́ ayé-mi ɛ́.

8 Àtsubi kó bá ŋa náàrì módzúlé,

tsí ɔ̀kpákù yèé àŋa ká-ŋa à sɔ si ɛ́,

kó ré kpa ŋá, tsí ɔ̀fɛ̀ yèé à ɖɛ̃ si ɛ́,

àŋa ká-ŋa ká tsubu dzì ńnɛ̀.

9 Ḿbɛ̀ɛ́, màa dzídzó-ayè títɛ́ fú Ɔlɔ́dzɔ́,

tsí ayè nákó wà tɛ́ mi ní ó gbà mí là.

10 Màa wà fɔ̀ ti ńnɔ́-mi kpó ní:

Ɔlɔ́dzɔ́, nɛ̀ɛ́ wà kíbí ìwɔ ná?

Nà gba olákèmà dzɔ̀ɔ́ nɔ́wɔ́-anɛ́kpá lárèé ŋa,

tsí nà gba òŋu adzìyàkú dzɔ̀ɔ́ nɔ́wɔ́-akóŋɛ́-nɛ lɔ ŋa.

11 Atsòɖòbò ŋa náa ǹɖe,

tsí wà bèrè mí náfɔ̀ yèé ǹ kò ma ɔ̀kã̀ ńnɛ̀ ɛ́.

12 À náa mú ànyì-ɔwɔ́ ɖɔ́kpɛ́ fú mi.

Tsí ǹ kí èmi níìkã̀ntso si.

13 Bí àŋa à wà tsàkɔ̃̀rɔ̃̀ ɛ́,

èmi òŋu, mà mú kotokú wɔ̀ si.^*

Mà wà ɖi arũ, tsí wà wúùre ńnɔ́ ńnɔ́.

14 Kíbí à náa gbɔ́ ɖíɖɔ̃̀ fú ídza nàmí ìnàbí ɛ́,

bɛ́ɛ̀ ní mà wà lɔ, tsí wà bɔ̀ ɛ́.

Òkùkù náa kù ɖi mi,

tsí mà wà náànyínɔ́ si kíbí ínà kú fú mi bɛ́.

15 Bí ǹ ɖáàwɔ́ kɔsɛ̀, tsí bòkó tsubú,

à náa kpérí, tsí wà náàrĩ́ si kã̀ã̀.

À náa kpérí si ńǹtá-mi si kpó yèé èmi ǹ kà mà á.

Tsí à náa wà lɛ̀kpè ńǹtá-mi náàrì mí.

16 Bí ǹ tsubúlɛ̀, à náa sú wérí-mi si,

tsí wà fa arũ dzɛ si ńǹtá-mi.

17 Ɔlɔ́dzɔ́, títí fú àsòkò yèésí nàa wà rí bɛ́ɛ̀ ná?

Gbà mí dzɔ̀ɔ́ nɔ́wɔ́-ɔ̀nyà-íbàɖí nyɛ̀ŋɛ̀ ŋa.

18 Màa ɖɔ́kpɛ́ fɛ́ɛ ńǹkpérí-asɛ̃ Ɔ̀ɖáyé ŋa.

Màa nyɛ̀ɛ́ náàŋírĩ-èrò.

19 Máa dzɛ́, tsí n ɖi oláàrĩ́ fú awo íbàɖí-mi nóòkṹnù ŋa.

Ká máa wà rɛdzú wò mí, àŋa anyàmí kãdzú nóòkṹnù ŋa.

20 Oŋù-tútùúrɔ̀ kà wà nárũ-ŋa.

À náa tɔ́ kpákò si nɛ́sɛ̀ fú agbétúrú ńǹlú ŋa.

21 À náa tsí arũ dzɔ̀ɔ́ si nyàgã̀gã̀ã̀,

tsí wà fɔ̀ ní ɛ̃̀hɛ̃́ɛ̃̀, ɛ̃̀hɛ̃́ɛ̃̀, àa múu!

22 Ɔlɔ́dzɔ́, ò ríi! Máa fetí kpaá!

Ɔlɔ́dzɔ́, máa gbé nóòtèrè fú mi!

23 Óò, Ɔ̀ɖáyé Ɔlɔ́dzɔ́-mi,

kpɛdzɔ́ fú mi, tsí o ǹɖe,

tsí o dzà gbè fú mi!

24 Atsòtítɔ́ ní ò dzɛ́ ɛ́, dzà gbè fú mi Ɔlɔ́dzɔ́ Ɔ̀ɖáyé-mi!

N máa ɖi oláàrĩ́ fú ŋa!

25 Máa dzɛ́, tsí ká fɔ̀ ní: Ɛ̀hɛ̃́ɛ̃̀ɛ̃̀! Iŋɛ́ yèé àa wà wò ɛ́ ńnɛ̀ɛ́!

Ká máa fɔ̀ ní ɛ̃ɛ̃, ɔwɔ́-wa tɛ̀ɛ́!

26 Akpérí rã́ã̀rĩ́ fú mi ŋa

ńǹwèrè yèé ǹ wà nóòfò si ɛ́,

anɔ́ kó kílɛ̀ fú ŋa!

Ká dzanɔ́, tsí furu, àŋa anɛ́ɛ̀tsɛ si ńǹtá-mi ŋa.

27 Ɛnɛ yèé ŋa wà wò ní Ɔlɔ́dzɔ́ kó ɖáàre fú mi ŋa á,

àrĩ́ nákó kɔ̃́ ìgbètí-ŋa, tsí à kó wà ɖúgbe-ayè títɛ́,

tsí à nákó wà fɔ̀ ní: Ɔlɔ́dzɔ́ tókpá,

tsí náa dzɔdzú-ɛ̀ ní kó sã̀ fú adzítsɛ́-ɛ̀.

28 Ḿbɛ̀ɛ́, màa tsí arũ, tsí wà fɔ òtítɔ́ tsítse-ɛ̀ɛ,

tsí màa wà nyɛ̀ɛ́ nɔ́dzɔ́ kɔ́dzɔ́.

Atseébàɖí òŋu ore tsítse-Ɔ̀ɖáyé

1 Orĩ yèé Ɖàfíɖì adzítsɛ́-Ɔlɔ́dzɔ́ tsɔ́ fú

agbɛ̃́ ayɔ́rĩkɔ̃ ŋa á. Orĩ ɛ́ ní.

2 Mà sɛ̃̀ wà tédzú afɔ̀ yèé ɔ̀nyà-íbàɖí náa wà fɔ̀ ɛ́.

Nódzú-ɔ̀nyà-íbàɖí òŋu, ká sá fú Ɔ̀ɖáyé kò nɛ́ɛ̀ɖí.

3 Náa rí ara-ɛ̀ títí kà nyáa ɖá àbi-ɛ̀ mà,

tsí kó nyàá kãdzú.

4 Íbàɖí òŋu kó tsòɖòbò gé ní náa wà nárũ si fúu ɛ́.

Ifɛ̀ɛ́nɔ́-ire tsítse tã́ ɖíi.

5 Ìsérè-íbàɖí tsítse gé ní náa wà tse ńǹtá-aní-ɛ̀ ɛ́.

Náa wà fa ɔ̀nà-íbàɖí,

tsí kà dzɛ́ kó kɔ íbàɖí tsítse dzɔ̀ɔ́.

6 Ɔlɔ́dzɔ́, títí nɔ́ɔ̀rɔ̃ ní àmúɖɔ̃̀-ɛ̀ɛ náa lɔ ɛ́.

Títí lɔ ńǹgbèrí, àkaralé wà ńǹtá-ɛ̀ɛ.

7 Òtítɔ́ tsítse-ɛ̀ɛ wà kíbí òkè-Ɔ̀ɖáyé ŋa bɛ́.

Ɛdzɔ́ kpíkpè-ɛ̀ɛ ŋa nɔnɔ̀ kíbí nínɔnɔ̀-àhũ bɛ́.

Ɔ̀nyà gbo, ɛrã gbo, nà gbà ŋá là.

8 Óò, Ɔ̀ɖáyé, àmúɖɔ̃̀-ɛ̀ɛ nɛ́ɛ̀fɛ́ góró!

Ɔ̀nyà ŋa náa wáa sá ɖúkù nábɛ́-iká-ɛ̀ɛ.

9 Nà mú ire-inɔlé-ɛ̀ɛ tsɔ̀ ŋá kũ̀.

Tsí nà fú ŋa nómi-oɖò nóɖò-ore tsítse-ɛ̀ɛ.

10 Iŋɛ́ yèé tse ɛ́, ńɖɔ̀-ɛ̀ɛ ní àyɛ̀ wà ti ɛ́.

Nódzú-iná-tɛ̀ɛ ní àwa gbo àa náa rí odzúná á.

11 Tse tsí ore tsítse-ɛ̀ɛ kó wà máa fú amàɛ́ ŋa.

tsí òtítɔ́ tsítse-ɛ̀ɛ kó wà máa fú ɛnɛ́ à ma afɔ̀-arũ-ŋa á.

12 Ɛsɛ̀-atse kɛ́rɛ́kɛ́rɛ́ kó máa tɛ̀ ńɖɔ̀-mi.

Ɔwɔ́-ɔ̀nyà-íbàɖí ŋa kó máa lé mi soko.

13 Rí gé! À tsubúlɛ̀. Àŋa atseébàɖí ŋa.

À tsubílɛ̀ pàràm, tsí kò nɛ́ ká nyáa ǹɖe gbo ró.

Ìyàtɔ̀ náàŋírĩ-atseébàɖí òŋu atsòtítɔ́

1 Orĩ-Ɖàfíɖì.

Inɔ́-atseébàɖí ŋa kó máa wà bíɛ.

Máa wà dzowú-alìlò kòdzɔkòdzɔ ŋa.

2 Iŋɛ́ yèé tse ɛ́, à náa yáa rɔ kíbí kóko bɛ́ ni.

tsí à náa gbɛ̃ ŋùã̀ã̀ kíbí ewé ŋa bɛ́.

3 Mí kã Ɔlɔ́dzɔ́, tsí o tse iŋɛ́-ire ńǹlú ḿbí ò wà á.

Tsí o gbé ńǹlú ɛ́, iŋɛ́-kã̀ kó máa kpìgbòɛ́.

4 Ɔlɔ́dzɔ́ kó dzɛ́ ayè títɛ́-ɛ̀ɛ,

tsí iŋɛ́ yèé ò wà wò ɛ́, nákó fɛ́ɛ ńnɛ̀.

5 Kɛ́ ɔ̀nà-ɛ̀ɛ ŋa kpó bɔwɔ́-Ɔlɔ́dzɔ́,

tsí o mí kã̀ã́. Nákó tse iŋɛ́ kpó dzì ńǹɖì-ɛ̀ fɛ́ɛ.

6 Nákó nya òtítɔ́-ɛ̀ɛ ŋà kíbí odzúùrɔ̃̀-awúrɔ̀ bɛ́.

Tsí nya òtítɔ́ tsítse-ɛ̀ɛ gbo ŋà kíbí odzúùrɔ̃̀-òsã́ gãgã bɛ́.

7 Kpa kpíríkpírí si ńɖi-Ɔlɔ́dzɔ́,

tsí odzú-ɛ̀ɛ kó wà nɔ́ɔ̀nà si fúu.

Inɔ́-ɛnɛ yèé ó sã̀ fúu ɛ́ kó máa wà bíɛ.

Inɔ́-amìyɛ̀ kó máa wà bíɛ.

8 Kɔ inɔ́ bíbí dzɔ̀ɔ́. Inɔ́ kó máa wà sɔɛ́ tsúù tsúù ró.

Inɔ́-ɛ̀ɛ kó tù, bí kò tsi bɛ́ɛ̀, íbàɖí gé ní náa tã́ã̀rã̀-ɛ̀ ɛ́.

9 Iŋɛ́ yèé tse ɛ́, atseébàɖí ŋa nákó tsɛ̀rá.

Ó ɖi, amódzú si nɔ́ɔ̀nà si fú Ɔlɔ́dzɔ́ ŋa,

ilɛ̀lú nákó ɖi tiŋa.

10 Títí kó bɔɖé, atseébàɖí kàkó wà ró.

Nàa rí ìɖìgbé-ɛ̀ bɛ́, tsí ɔ̀nyà-kã̀ kpókpó kàkó wà bɛ̀ ró.

11 Ó ɖi, ataranɛ bɔlɛ̀ ŋa, ilɛ̀lú nákó ɖi tiŋa.

À nákó gbé ńtútùúrɔ̀ kpó kpãŋu.

12 Atseébàɖí náa wà ɖìbò-atsòtítɔ́,

tsí náa wà fa arũ dzɛ fúu.

13 Ó ɖi, àrĩ́ ní Ɔlɔ́dzɔ́ náa wà rĩ́ fúu ɛ́,

iŋɛ́ yèé tse ɛ́, Ɔlɔ́dzɔ́ náa ríi ní ìwèrè bàa, tsí à nákó kpɛdzɔ́ báa.

14 Atseébàɖí ŋa náa kpɔ tàsú-ŋa háà,

tsí dzi ɔrɔ̃-ɔfà-ŋa banɛ́, àtsùgbée ká kpa ataranɛ bɔlɛ̀

òŋu olákèmà nóòkú, tsí ɖéwo afɛkpa sísɛ̃́ ŋa gbo.

15 Ó ɖi fee, tàsú-ŋa nákó gú àŋa ká-ŋa nɛ́ɛ̀ɖɔ̃̀,

tsí ɔrɔ̃-ɔfà-ŋa nákó tsɛ́ kpó múnúmúnú.

16 Iŋɛ́ oɖé tsígíɖí yèé wà nɔ́wɔ́-atsòtítɔ́ ɛ́,

ó tsu nárũ fú kpíkpɔ̀-atseébàɖí ŋa kpó.

17 Iŋɛ́ yèé tse ɛ́, ikpá-atseébàɖí nákó tã́.

Ó ɖi, Ɔlɔ́dzɔ́ náa banɛ́ atsòtítɔ́ ŋa.

18 Ɔlɔ́dzɔ́ ma ɔdzɔ́-ɛnɛ yèé ŋa à kà rí íbàɖí fɔ̀ nára-ŋa á,

tsí iŋɛ́ kpó yèé à dzogú-ɛ̀ ɛ́ náa wà si títí lɔ náàrìtã́.

19 À kà dzanɔ́ bí àtsubi bá ŋa.

Bí ebi wà dzà, àŋa à náa yó.

20 Atseébàɖí ŋa nákó tsɛ̀rá.

Ɔ̀tɛ̀-Ɔlɔ́dzɔ́ ŋa wà kíbí ìbóbó ŋa nóko bɛ́,

tsí à nákó nɔ̀ ǹɖe náàrĩ̀kã̀ntso kíbí òwúrɔ̀ bɛ́ ni.

21 Atseébàɖí náa ŋɛ́ iŋɛ́, tsí kà sãã́.

Atsòtítɔ́ òŋu náa rí ànyínɔ́ fúnɛ,

tsí náa fúnɛ ńŋɛ́ gbo.

22 Ɛnɛ yèé Ɔ̀ɖáyé tu kùsɛ̀ɛ̀ fú ŋa á,

ilɛ̀lú nákó ɖi tiŋa.

Ó ɖi, ɛnɛ yèé ó ré fú ŋa á, à nákó tsɛ̀rá.

23 Bí ó dzɛ́ ní ɔ̀nà yèé ɔ̀nyà wà fà á dzì ńǹɖì-ɛ̀ fú Ɔlɔ́dzɔ́,

Ɔlɔ́dzɔ́ náa tse tsí náa mú ɛsɛ̀ tɛ̀ òŋu àkaralé.

24 Bí ó tsubú, kà kí bɛ̀ si, iŋɛ́ yèé tse ɛ́,

Ɔlɔ́dzɔ́ náa banɛ́ ɔwɔ́-ɛ̀ si kpãŋu kpãŋu.

25 Ǹ gbé náàtìlɛ̀nɖe títí wáa gbó.

Ó ɖi, ǹ kò rí ká kɔ atsòtítɔ́ dzɔ̀ɔ́ nàmí

ɔmalɔ́ma-ɛ̀ ŋa ká ɖi abere dzídzɛ tã́ná dzɛ wòrí.

26 Nɔ́dzɔ́ kɔ́dzɔ́ fee, atsòtítɔ́ náa wà rí ànyínɔ́ fúnɛ,

tsí náa ŋɛ́ iŋɛ́ fúnɛ gbo.

Ɔmalɔ́ma-ɛ̀ ŋa gbo náa ɖi kùsɛ̀ɛ̀ si fúu.

27 Sá fú íbàɖí tsítse. Tse ire,

tsí nàa nɛ́ ìɖìgbé si títí làkóò làkóò.

28 Ɔlɔ́dzɔ́ náa dzáfɔ̀-òtítɔ́ tsítse,

tsí kà kɔ atsòtítɔ́-ɛ̀ ŋa dzɔ̀ɔ́.

Náa wà náànyì-ŋa si nɔ́dzɔ́ kɔ́dzɔ́.

Ó ɖi, ìbìmbí ìrèŋrè-atseébàɖí ŋa òŋu, à náa tsɛ̀rá.

29 Atsòtítɔ́ ŋa fee, ilɛ̀lú nákó ɖi tiŋa,

tsí à nákó gbé ńnɛ̀ títí lɔ náàrì máa tã́.

30 Ifɛ̀ɛ́nɔ́ kí ńɖi-atsòtítɔ́, tsí afɔ̀ gbo náa gãgã nárũ-ɛ̀.

31 Ɛkpa-Ɔ̀ɖáyé-ɛ̀ náa wà ńnɔ́-ɛ̀ si gé ni.

Tsí kà mú ɛsɛ̀ si sé.

32 Atseébàɖí náa wà tsɔ́ atsòtítɔ́,

àtsùgbée kó nyáa kpòkú-ɛ̀.

33 Ó ɖi, Ɔlɔ́dzɔ́ kà múu bɔwɔ́-ɛ̀.

Ɔlɔ́dzɔ́ kà dzɔ̀ɔ́-ɛ̀, tsí kó kí nɛ́dzɔ́.

34 Odzú-ɛ̀ɛ kó wà nɔ́ɔ̀nà si fú Ɔlɔ́ɖzɔ́,

tsí o wà fa ɛ̀kpa-ɛ̀ làkóò.

Nákó burɔ̃ si néwo fɛ́ɛ, tsí mú ilɛ̀lú bɔwɔ́-ɛ̀ɛ.

Tsí atseébàɖí ŋa nákó tsɛ̀rá ńǹtsodzú-ɛ̀ɛ.

35 Ǹ rí atseébàɖí, tsí ó ǹɖe òŋu ikpá-ɛ̀,

tsí wà ga kíbí egi-sɛ́ɖìrì-Lìbánì bɛ́. ^*

36 Ó ɖi, tɛ̀ɛ̀ gbo sì tã́ wáa lɔ. Kò wà ró.

Ǹ wòó títí, ǹ kò ríi ró.

37 Módzú tó ɛnɛ yèé à kà rí íbàɖí fɔ̀ nára-ɛ̀ ɛ́.

Rí ɛnɛ yèé à ma afɔ̀-arũ-ɛ̀ ɛ́.

Ɛnɛ́ kà tse ìkparà á fee, ànyìwà ɔ̀la-ɛ̀ náa sã̀ gé ni.

38 Adzàbi ŋa nákó tsɛ̀rá kpó náàrĩ̀kã̀ntso.

Ànyìwà-ɔ̀la-kã̀ kpókpó kò wà fú atseébàɖí ŋa.

39 Ńɖi-Ɔlɔ́dzɔ́ ní ɔlà-atsòtítɔ́ ŋa náa ti ɛ́.

Bí íbàɖí bàa, à náa ɖáre Ɔlɔ́dzɔ́.

40 Ɔlɔ́dzɔ́ náa mɔ́wɔ́ gbè fú ŋa, tsí gbà ŋá dzɔ̀ɔ́.

Náa gbà ŋá dzɔ̀ɔ́ nɔ́wɔ́-atseébàɖí ŋa,

tsí náa gbà ŋá là, iŋɛ́ tse ɛ́, à náa sá ɖúkù ńɖɔ̀-ɛ̀.

Àkɔ̃̀rɔ̃̀-kã̀ ɖá àbi-ɛ̀ ŋa mà, tsí wà wúùre

1 Orĩ-Ɖàfíɖì. Orĩ-ìtédzú.

2 Óò Ɔlɔ́dzɔ́, máa mú inɔ́ bíbí fɛtí fú mi.

Máa mú oró-inɔ́ bíbí-ɛ̀ɛ, tsí ń kɔ̀ mí.

3 Ɔfà-ɛ̀ɛ ŋa ta mí. Ɔwɔ́-ɛ̀ɛ tɛ̀ mí.

4 Iŋɛ́-kã̀ kpókpó kò wà rere si nára-mi

náàtsùgbée inɔ́ bíbí-ɛ̀ɛ.

Náàtsùgbée àbi yèé ǹ dzɛ ɛ́,

iŋɛ́-ire-kã̀ kò wà nékũkũ-mi ŋa ró.

5 Ɛ̃ɛ̃, íbàɖí-mi ŋa tàkádzá éwo-mi.

À wówo, tsí tɛ̀ mí má si kpɛ̀nlɛ̀ɛ̀.

6 Odzudzu-mi ŋa wà rũ̀ kútúkútú,

tsí wà tsomi wàà, iŋɛ́ yèé tse ɛ́,

éwo kò sí fú mi.

7 Ara kpa si fú mi si kpó,

tsí ó tó mi si tó bɛ́ɛ̀.

Nɔ́dzɔ́ kɔ́dzɔ́, mà kí sídzó sídzó si!

8 Àra-mi náa gboná má mi si kùù.

Iŋɛ́-kã̀ kpókpó kò wà rere si nára-mi.

9 Àmí tã́ ɖí mi, tsí ara kpa si fú mi kpó wɔ́lɔ́wɔ́lɔ́.

Inɔ́-mi fɔ́tɔ̀ si, tsí ǹ wà gbɛ̃ hm̀m̀ hm̀m̀.

10 Ɔlɔ́dzɔ́, awù-mi ŋa kpó wà nódzú-ɛ̀ɛ si.

Tsí hm̀m̀ hm̀m̀ yèé ǹ wà ɖɔ̃́ ɛ́ kò ɖúkùɛ́.

11 Ɛ̀ɖɔ̃̀-mi wà fò koŋkoŋkoŋ, tsí àmí tã́ ɖí mi.

Odzú-mi gìɖì gbo ɖɛ̀ kpó.

12 Ídzà-mi ŋa, àdzɔ́rɛ̃̀-mi ŋa,

à sɛ̃̀ náànyì-mi náàtsùgbée ìréré-mi.

Tsí tèmi ŋa gbo kò wà sɔ́má mi ró.

13 Awo ikú-mi ŋa wà sɔ ɔ̀kpákù fú mi.

Awo íbàɖí fú mi ŋa náa wà wíìnyɛ̀, tsí ká ń bàdzɛ́ mi,

tsí òɖòbò tsítse gé ní náa gba ìsérè-ŋa si nɔ́dzɔ́ kɔ́dzɔ́ ɛ́.

14 Tsí èmi ǹ ɖi aɖetí. Ǹ kò wà gbɔ̃́ɔ̃̀rã̀.

Tsí ǹ ɖi mùnù. Ǹ kò wà wíìnyɛ̀.

15 Ǹ ɖi ɔ̀nyà-afetí kpa afɔ̀

òŋu ɛnɛ́ kà tsã́rũ dzɔ́ŋù ɛ́.

16 Ɔlɔ́dzɔ́, ìwɔ gé ní ǹ módzú si nɔ́ɔ̀nà si fú ɛ́.

Nàa dzɔ́ŋù fú mi gé ni Ɔlɔ́dzɔ́ Ɔ̀ɖáyé-mi.

17 Mà fɔ̀ ní: N máa ɖi oláàrĩ́ fú ŋa,

ńǹwèrè yèé ǹ wà sé ɔ̀nà á.

18 Tsútsubúlɛ̀-mi ti sɔ́má si,

tsí ɖíɖɔ̃̀ yèé ǹ wà gbɔ́ ɛ́ wà si gé ni.

19 Iŋɛ́ yèé tse ɛ́, ǹ tsí atsɔ nódzú-íbàɖí-mi.

tsí odzo-àbi yèé ǹ dzɛ ɛ́ wà tse mí.

20 Ɔ̀tɛ̀-mi ŋa wà náàyɛ̀ si,

tsí àmí kò ŋá si. Anyàmí kãdzú nóòkṹnù ŋa,

à kò tì kpɔ̀ bɔ̀.

21 Amú ànyì-ɔwɔ́ ɖɔ́kpɛ́ fú ire tsítse-mi ŋa,

à náa wà bá mi fɔ̀ fú kíbí ire tsítse náa kpã́ mi nódzú si ɛ́.

22 Ɔlɔ́dzɔ́, máa kɔ̀ mí dzɔ̀ɔ́ ɖé!

Ɔ̀ɖáyé-mi, máa gbé nóòtèrè fú mi.

23 Ɔlɔ́dzɔ́ agbàmílà, kóyá fɛ́ɛ,

tsí o wáa gbà fú mi ɖé!

Ɔ̀nyà kò tì dzɛ́ iŋɛ́-kã̀ kpókpó

1 Orĩ yèé Ɖàfíɖì tsɔ́ fú Yèɖùtúnì agbɛ̃́ ayɔ́rĩkɔ̃ ɛ́.

Orĩ ɛ́ ní.

2 Ǹ ní màa módzú tó ìrɛ̃̀-mi rĩ́rɛ̃̀,

àtsùgbée n máa mú arũ-mi dzàbi.

Màa ɖi olárũmatsí bí atseébàɖí wà nódzú-mi si.

3 Ǹ kpa húwíí si, tsí tsikó si kpíríkpírí,

náàrì wíìnyɛ̀-kã̀ kpókpó.

Ó ɖi, iŋɛ́-ire-kã̀ kpókpó kò bɔ́ ńnɛ̀ fú mi.

Àríkɛ̀ yèé ǹ wà gbɔ́ ɖíɖɔ̃̀ tsɛ̃̀ɛ̃̀ máa ró ńnɛ̀ɛ́.

4 Ɛ̀ɖɔ̃̀-mi gboná si bɛ́ kùùù.

Nàa ɖédzú iná ní wà dzómi ɛ́ ni.

Tsí ó tse tsí ǹ tsí arũ wíìnyɛ̀, tsí wà fɔ̀ ní:

5 Ɔlɔ́dzɔ́, tse tsí n ma ìtã̀ntã́-ayé-mi.

Tse tsí n ma ìwèrè yèé bɔ̀ fú mi ɛ́.

Tse tsí n mà ní iŋɛ́ tútù ní ǹ dzɛ́ ɛ́.

6 Rí gé! Ò tse tsí ìmarũ-ɔdzɔ́-mi ŋa kpó wà kíbí tsítsédzú-àtɛ́wɔ́ bɛ́.

Ìwèrè yèé màa gbà á kò tì tó iŋɛ́-kã̀ nódzú-ɛ̀ɛ.

Bí ɔ̀nyà wà náàyɛ̀ títíìtìtì gìɖì,

Kpàáfù nákpotu ní ó dzɛ́ ɛ́.

Sɛ́là

7 Fee, ɔ̀nyà náa wà lɔ, tsí wà bɔ̀.

Ó ɖi, òdzìmdzìmi gé ní ó dzɛ́ ɛ́.

Kà fú ara-ɛ̀ náyè. Ó ɖi, kà sì rí iŋɛ́-kã̀ kpókpó ńnɛ̀.

Náa wà tɛ iŋɛ́-ɛ̀fɛ́-ɛ̀ ŋa si.

Ó ɖi, kà ma ɛnɛ yèé bòkó wáa dzɛ́ ɔlá-ɛ̀ ɛ́.

8 Ɔlɔ́dzɔ́, báàyí fee, kí màa ɖóro ɖè ró ná?

Ìwɔ ní ǹ módzú si nɔ́ɔ̀nà si fúu ɛ́.

9 Gbà mí dzɔ̀ɔ́ nɔ́wɔ́-àbi-mi ŋa kpó ɖé!

Máa dzɛ́ mú mi fú èkpè-ɛnɛ yèé éwo kò sí fú ŋa á.

10 Báàyí ɛ́, ǹ kpa kpíríkpírí si,

tsí ǹ ɖi yàwó-arũmatsí, iŋɛ́ yèé tse ɛ́,

ìwɔ ní tse mí si bɛ́ɛ̀ ɛ́.

11 Famí-kòtsã́ tsítsɔ̀ mí bɛ́ɛ̀ ńǹkɛ̀ɛ́!

Ǹ kàkó nyáa tóòsũ̀-ɛ̀ɛ ró.

12 Bí ò fɛtí fú ɔ̀nyà fú àbi yèé ó dzɛ ɛ́,

ò wà kɔ́ɔ ni. Tsí kíbí àsàkpá náa tsitsɛ́ bánɛ ɛ́,

bɛ́ɛ̀ ké ní nà tse bá awù-ɔ̀nyà á.

Ɔ̀nyà ŋa kpó, kpàáfù nákpotu gé ní à dzɛ́ ɛ́.

Sɛ́là

13 Ɔlɔ́dzɔ́, gbɔ́ ìrewúwú-mi òŋu igbe-mi ɖé!

Máa fetí kpa ɔkṹ sísɔ̃-mi.

Ɔma-àrɛ̃̀wá ní ǹ dzɛ́ si ńɖɔ̀-ɛ̀ɛ ɛ́.

Atsíwérí ní ǹ dzɛ́ ɛ́ kíbí gbágbóǹgbàgbò-mi ŋa á.

14 Máa wò mí ró ɖé,

àtsùgbée n nyáa táyè

tã́ná n dzì nɔ́ɔ̀nà, tsí tèmi kó tã́.

Iŋɛ́ kpó yèé Ɔlɔ́dzɔ́ tse ɛ́, èrò kó gbɔ́, èrò kó mà

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ ɛ́ ní.

2 Ǹ módzú si nɔ́ɔ̀nà si fú Ɔlɔ́dzɔ́, tsí odzú-mi ɖi fofo.

Tsí ó nyí wò mí, tsí gbɔ́ igbe ɖíɖá-mi.

3 Ó kpɔ̀ mí fùɖá ńnɔ́-ɔ̀fɛ̀, ńnɔ́-rɛ̀rɛ́ nínɔnɔ̀,

tsí kɛ́ mi ɖóro ńǹtá-òkúta lákṹ,

tsí ǹ ɖóro si nɛ́sɛ̀ méèdzì náàrì mì dzígí.

4 Ó tse tsí ǹ là nóŋù nórĩ titɔ̃,

tsí ǹ wà nyɛ Ɔ̀ɖáyé-wa.

Èrò nákó gbɔ́, èrò nákó mà,

tsí à nákó wà nɛ́ àrísá fúu,

tsí à nákó wà mí kã Ɔlɔ́dzɔ́.

5 Amíkã Ɔlɔ́dzɔ́ fee, ó wɛ éwo-ire.

Kà nyíwo atse kɛ́rɛ́kɛ́rɛ́ ŋa òŋu atsòɖòbò ŋa.

6 Ɔlɔ́dzɔ́ Ɔ̀ɖáyé-mi, ò tse àwùsì lákṹ lákṹ ŋa

ńnɔ́-ètò yèé ŋa ò tse fú wa á.

Iŋɛ́-kã̀ kò wà ká ŋ́ sàwé-ɛ̀ɛ.

Mà wò ní n wà fɔ̀ ŋá, tsí sɛ̃̀ wà fɔ̀ ŋá ró.

Ó ɖi, à ɖɛ̀rɛ̀, kò nɛ́ fífɔ̀ tã́.

7 Kò tsi ɛbɔ nàmí ɔ̀yà ŋa ní ò wà wò ní ká tse fɛ́ɛ ɛ́.

Ò lu etí fú mi ní n gbɔ̃́ɔ̃̀rã̀ ni.

Kò tsi ɛbɔ yèé à náa dzoná-ɛ̀ búláá

òŋu ɛbɔ-ká ń sã́ã̀bi ní ò wà wò ɛ́.

8 Ḿbɛ̀ɛ́, ǹ ní ìwɔ kó rí gé! Ǹ bàa ńɖɔ̀-ɛ̀ɛ.

Ǹ rí, tsí à kɔ iŋɛ́ yèé màa tse ɛ́ si ńnɔ́-ìwé-kã̀ si.

9 Ɔ̀ɖáyé-mi, ǹ wò ní n tse awù-ɛ̀ɛ.

Ká rɛ̃̀ si nɛ́kpa-ɛ̀ɛ wà ńnɔ́-mi si.

10 Ńǹkpérí-asɛ̃̀ Ɔ̀ɖáyé ŋa,

ǹ dzíkɔ̀ ɖíɖɔ̃̀ fúnɛ ní nà tsòtítɔ́.

Ǹ kàkó nyáa tsikó-ɛ̀. Ɔlɔ́dzɔ́, ò mà bɛ́ɛ̀.

11 Òtítɔ́-ɛ̀ɛ tsítse fee, ǹ kò ń si ńnɔ́ si náàrì fɔ̀ɔ́.

Ǹ fɔ̀ɔ́ fú ŋa ní àkaralé wà ńǹtá-ɛ̀ɛ,

tsí nà gbanɛlà. Ǹ fɔ̀ɔ́ fú ɔ̀nyà ŋa ńǹkpérí-asɛ̃̀ Ɔ̀ɖáyé ŋa ní

nà rí ànyínɔ́ fúnɛ, tsí ò dzɛ́ olóòtítɔ́.

12 Ɔlɔ́dzɔ́, ìwɔ ò kàkó kɔ àrìmáa rí ànyínɔ́ fú mi!

Ò dzáfɔ̀-mi, tsí àmúɖɔ̃̀-ɛ̀ɛ kà kpàrɔ̀.

Ḿbɛ̀ɛ́, nàa wà tsɛ́wé bò mí làkóò làkóò gé ni.

13 Àtsubi yèé ŋa bá mi si ɛ́, kò nɛ́ kíkã̀.

Íbàɖí-mi ŋa tsítse wérí mi si kpó nyàgã̀ã̀,

títí ǹ kò wà rírã ró. À kpɔ̀ láre irɔ̃ néwo-mi.

Tsí ara kú mi kpó.

14 Ɔlɔ́dzɔ́, ò dzàre ɖé, gbà mí!

Ɔlɔ́dzɔ́, kó yá fɛ́ɛ, wáa gbà fú mi ɖé!

15 Àŋa awokú fú mi ŋa, tse tsí anɔ́ kó kílɛ̀ fú ŋa,

tsí ara kó kú ŋa!

Ká sɔ́ lɔ bɛ̀, tsí anɔ́ kó kɔ̃́dzú-ŋa bɔ̀,

àŋa awo íbàɖí fú mi ŋa!

16 Àŋa yèé wà fɔ̀ ní m̀bó m̀bó ɛ́,

anɔ́ kó mú ŋa títí ká máa nya tsí ɛsɛ̀ ńlɛ̀!

17 Ó ɖi, ɛnɛ yèé ŋa kpó wà wo ká ríɛ ɛ́,

ká wà dzídzó-ayè títɛ́.

Ɛnɛ yèé ŋa dzáfɔ̀-kíbí nà gbanɛ là á,

ká wà fɔ̀ ní: " Ɔlɔ́dzɔ́ lákṹ! "

18 Olákèmà ní ǹ dzɛ́ ɛ́,

tsí ǹ dzɛ́ olóòfò gbo!

Ó ɖi Ɔlɔ́dzɔ́, nà tédzú mi ɖé!

Agbàfú mi òŋu agbàmídzɔ̀ɔ́ ní ò dzɛ́ ɛ́.

Ɔ̀ɖáyé-mi, yára wá ɖé!

Àkɔ̃̀rɔ̃̀-kã̀ wà wúùre

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Ɛnɛ yèé náa tédzú kònɛ́kpá ŋa á, ó wɛ éwo-ire!

Bí àtsubi báa nɔ́dzɔ́-kã̀, Ɔlɔ́dzɔ́ náa tse tsí náa bɔ́ ńnɛ̀.

3 Ɔlɔ́dzɔ́ náa fúu náàyɛ̀,

tsí náa tse tsí náa sã̀ fúu ńǹtalɛ̀ ɛ́.

Bí ɔ̀tɛ̀-ɛ̀ ŋa wà gbó, tsí wà ya, kà múu bɔwɔ́ ŋa.

4 Ɔlɔ́dzɔ́ náa mɔ́wɔ́ gbè fúu bí ó sũ̀ ńlɛ̀-àmóɖi si.

Náa tɔ́dzú-ɛ̀ kpó ńǹtá-aní yèé ó sũ̀ si ɛ́.

5 Èmi gbo ǹ wà fɔ̀ fɛ́ɛ ní: Ɔlɔ́dzɔ́, rí ànyínɔ́ fú mi,

tsí o bɔ mí ɖé, iŋɛ́ yèé tse ɛ́, ǹ dzàbi-ɛ̀ɛ.

6 Ɔ̀tɛ̀-mi ŋa wà fɔ afɔ̀-mi ḿbàɖí gé ni.

À ní: Nɔ́dzɔ́sí tɛ̀ɛ̀ nákó tã́ gìɖì ná?

Nɔ́dzɔ́sí ɛ́kɔ-ɛ̀ nákó nɔ̀ ǹɖe ńǹtalɛ̀ ɛ́ ni?

7 Bí ɔ̀nyà-kã̀ wáa rí mi,

náa wà mú afɔ̀ bɔ̀ nárũ-mi, àtsùgbée n fɔ̀.

Ìsérè-íbàɖí tsítse gé ní náa wà néwo-ɛ̀ ɛ́,

tsí bí ó fùɖá bɛ́, náa ta afɔ̀ ɛ́ wérí kpó.

8 À náa kpérí sɔ́má mi si bɛ́,

tsí wà ɖìkpá, tsí wà ń kpe ɛ́kɔ-mi.

Tsí à náa wà sére àtsubi yèé nákó bá mi ɛ́.

9 Dzàmbá lákṹ-kã̀ ní báa si ɛ́,

tsí ó sũ̀ ńlɛ̀ àsũ̀kã̀, tsí kò tsi kó ǹɖe ni!

10 Ídzà-mi gìɖì ńǹtá-ɛnɛ yèé ǹ karalé si kpó,

tsí wà dzɛ dzídzɛ-mi ɛ́,

ó nyí okpì-ìsò kã̀ mí.

11 Ó ɖi, ìwɔ Ɔlɔ́dzɔ́, rí ànyínɔ́ fú mi,

tsí o kɛ́ mi ǹɖe. Màa tseé sã fú ŋa.

12 Ḿbɛ̀ɛ́, màa rí mà ní o dzáfɔ̀-mi,

tsí ɔ̀tɛ̀-mi kàkó bugbeta ní òŋu dzàdzàbɔ́-mi ró.

13 Ó ɖi, èmi òŋu, ò banɛ́ mi,

tsí ò bɔ mí, tsí ó tù mí.

Màa wà nódzú-ɛ̀ɛ si lakóò làkóò.

14 Ɔkpɛ́ ni ti Ɔlɔ́dzɔ́ Ɔ̀ɖáyé-Ìsàràyɛ́lì

títí lɛ́lɛ́ŋ̀lɛ̀lɛ̀, títí lɔ náàrìmáa tã́! Ɛ̀tsɛ! Ɛ̀tsɛ!

Ɔ̀nyà-kã̀ kí ńǹgbɛ́, tsí ó wúùre fú Ɔ̀ɖáyé

1 Orĩ yèé ɔmalɔ́ma-Kòré ŋa tsɔ́

fú agbɛ̃́ ayɔ́rĩkɔ̃ ŋa á. Orĩ ɛ́ ní. ^*

2 Óò, Ɔ̀ɖáyé-mi.

Kíbí àŋgbɛ̃ náa wà gbɛ̃ àgbã̀rĩ́-kã̀ tó,

tsí náa wà ro ɛkpa-omi ŋa wérí ɛ́,

bɛ́ɛ̀ ké ní àmì-ɛ̀ɛ wà kpa mí,

tsí ǹ wà wòɛ́ ɛ́.

3 Fee, àmì n rí Ɔ̀ɖáyé, Ɔ̀ɖáyé Oláàyɛ̀

kò tì wà kpa mí bɔ̀.

Nɔ́dzɔ́sí màa nyáa káà wɔlé-ɛ̀,

tsí ɖóro nódzú-ɛ̀ yá?

4 Nóòsã́-kã̀, òru-kã̀ á,

omi-inyɔ́kṹ gé ní ǹ wà mɔ ɛ́.

Ɔ̀nyà ŋa náa bèrè mí nɔ́dzɔ́ kɔ́dzɔ́ ní:

Ńbisí Ɔ̀ɖáyé-ɛ̀ɛ ɛ́ gìɖì wà ńǹkɛ̀ɛ́ ná?

5 Bí ǹ tédzú kíbí mà wà

náàŋírĩ-ɔ̀nyà ɛ̀gbɛ̀lɛ́ɛ̀gbɛ̀ ŋa si,

tsí àa náa dzɔ́ làkóò ńlé-Ɔ̀ɖáyé òŋu ayè títɛ́,

tsí àa náa wà nórĩ-Ɔ̀ɖáyé nyínyɛ̀ ŋa si,

tsí wà nɔ́dzɔ́-ɔɖɔ̃́ si ɛ́,

ara náa kú mi si gé ni.

6 Kà kàa ara kó kú mi,

tsí ìsérè-mi kó ròmá si fee,

màa tédzú wà mí kã Ɔ̀ɖáyé.

Màa tɔ́ nyɛ̀ɛ́ ró, iŋɛ́ yèé tse ɛ́,

ó gbà mí là, tsí dzɛ́ Ɔ̀ɖáyé-mi.

7 Ɔ̀ɖáyé-mi, ara kú mi si góró.

Òŋu ní tse tsí ǹ wà tédzú-ɛ̀ɛ ti nérè-Yòɖánì,

ḿbí òkè-Hɛ̀rìmɔ́nì òŋu òkè

yèé à náa kpè ní tsígíɖí ɛ́ wà á.

8 Oɖò ŋa wà tsɛ́,

tsí omi ŋa wà ɖà kũkũ wàà, wàà.

Ɔtsã́-omi ŋa òŋu omi ŋa á wà rĩ mí kpó,

tsí oɖò tédzú mú mi.

9 Ɔlɔ́dzɔ́ kó nya àmúɖɔ̃̀-ɛ̀ ɖíre fú mi nóòsã́,

tsí nóoru, ni n wà kɔ̃rĩ fúu.

Màa wúùre fú Ɔ̀ɖáyé

òŋu yèé fú mi náàyɛ̀ ɛ́.

10 Tsí màa fɔ̀ fú Ɔ̀ɖáyé ní:

Òkúta lákṹ ní ò dzɛ́,

tsí mà ɖárè ɛ́.

Kí tse tsí ò gbàgbé mi si bɛ́ɛ̀ ná?

Ɔ̀tɛ̀-mi ŋa wà tse bá mi góró.

Ǹ tédzú kí náànyínɔ́ si ńǹkɛ̀ɛ́ géè?

11 Ɔ̀tɛ̀-mi ŋa náa wà lɛ̀kpè ńǹtá-mi gé ni.

À náà bèrè mí ní:

Ńbisí Ɔ̀ɖáyé-ɛ̀ɛ ɛ́ gìɖì wà ńǹkɛ̀ɛ́ ná?

12 Kà kàa ara kó kú mi,

tsí ìsérè-mi kó ròmá si fee,

màa tédzú wà mí kã Ɔ̀ɖáyé.

Màa tɔ́ nyɛ̀ɛ́ ró, iŋɛ́ yèé tse ɛ́,

ó gbà mí là, tsí dzɛ́ Ɔ̀ɖáyé-mi.

Ɔlɔ́dzɔ́, àmì-ɛ̀ɛ wà kpa mí

1 Óò Ɔlɔ́dzɔ́! Dzà gbè fú mi,

tsí ɖáàre fú mi nódzú-kònáàrísá fɛ́ɛ ŋa.

Gbà mí nɔ́wɔ́-atsòɖòbò ŋa òŋu atseébàɖí ŋa.

2 Ò dzɛ́ Ɔ̀ɖáyé atsɛ́wébòmí.

Kí tse tsí ò kɔ̀ mí ná?

Kí tse tsí màa gbɛ̃ si kã̀nyìì si tó bɛ́ɛ̀ ná?

Iŋɛ́ yèé tse ɛ́, ò fú ɔ̀tɛ̀-mi ŋa nɔ́ɔ̀nà,

tsí à bòkó mú mi tsɛ̀rá?

3 Tse tsí odzúná-ɛ̀ɛ òŋu òtítɔ́-ɛ̀ɛ

ká gbɛ̃́ mi lɔ nóòkè yèé dzɛ́ tɛ̀ɛ̀ ɛ́.

Ká gbɛ̃́ mi lɔ ńǹɖìgbé-ɛ̀ɛ.

4 Màa lɔ ńǹdzɛ̀bɔ-Ɔ̀ɖáyé,

Ɔ̀ɖáyé oláyètítɛ́-mi.

Ɔ̀ɖáyé-mi, màa wà taɖùrù, tsí wà nyɛ̀ɛ́.

5 Kí tse tsí ara kó kú mi si,

tsí n wà náàbo-ayé-mi rírã́ si? Ókò!

Odzú-mi nákó wà nɔ́ɔ̀nà si fú Ɔ̀ɖáyé ni,

tsí màa wà nyɛ̀ɛ́ ró.

Agbàmílà ni, Ɔ̀ɖáyé-mi ni.

Ɔlɔ́dzɔ́ wà náànyì-wa si

1 Orĩ yèé ɔmalɔ́ma-Kòré ŋa

tsɔ́ fú agbɛ̃́ ayɔ́rĩkɔ̃ ŋa á. ^*

Oŋù bíbɛ yɛyɛ ní à náa ń kɔ̃rĩ ɛ́.

Orĩ ɛ́ ní.

2 Ɔ̀ɖáyé dzɛ́ ɔgbà líle-kã̀,

tsí náa wérí wa si kpó ni.

Ó dzɛ́ ìɖì-ḿbí à náa ɖúkù gìɖì gìɖì ɛ́.

Náa kpaɖí si ńǹwèrè kíìwèrè gé ní

òŋu kó mɔ́wɔ́ gbè fú wa bí òfò bá wa.

3 Bí ilɛ̀ gìɖì wà mì kpó dzìdzìdzì,

tsí òkè ŋa wà ɖíwó ɖà lɔ ńnɔ́-àhũ,

ɛ̀ɖɔ̃̀ kà ɖá àwa òŋu.

4 Bí omi-àhũ ɛ́ gìɖì wà wó tsùtsùtsù,

tsí ɔtsã́-omi ŋa á wà kpa lɔ, tsí wà kpa bɔ̀,

ɛ̀ɖɔ̃̀ kà ɖá àwa òŋu.

Sɛ́là

5 Fee, oɖò tsítsã̀-kã̀ wà,

tsí ɛkpa-omi-ɛ̀ ŋa náa mú ayè tɛ́ ìlú-Ɔ̀ɖáyé.

Ìlú ɛ́ dzɛ́ ti Ɔ̀ɖáyé akpá akpá, ɛsɛ̀ ɛsɛ̀.

Ḿbɛ̀ ní Ɔ̀ɖáyé Oléwo náa gbé ɛ́.

6 Ɔ̀ɖáyé wà náàŋírĩ-ìlú ɛ́ si,

tsí kò tsi kó fɔ́ láyé ni.

Títí ilɛ̀ kó má gé ná,

Ɔlɔ́dzɔ́ ti wà mɔ́wɔ́ gbè fú ìlú ɛ́.

7 Ìlú ŋa wà tse dzàdzàdzà,

tsí oyè-ìlú ŋa wà fɔ́.

Ɔ̀ɖáyé tsóŋù, tsí ìtalɛ̀ ɛ́ kpó ramá.

8 Ɔlɔ́dzɔ́ Oláyé gbaŋgba wà náànyì-wa si.

Ɔ̀ɖáyé-Yákúbà dzɛ́ ɔgbà líle-kã̀,

tsí náa wérí wa si.

9 È wá, tsí e wáa rí iŋɛ́ kpó yèé Ɔlɔ́dzɔ́ wà tse ɛ́.

È módzú kpũrã iŋɛ́ yèé ŋa

ó mú tsɛ̀rá ńǹtalɛ̀ ɛ́ si ɛ́.

10 Ɔlɔ́dzɔ́ náa ɖá ogu ɖóro títí lɔ ńkpàkũkpàkũ-ayé ɛ́.

Náa tsɛ́ ɔfà òŋu ɔ̀tsɔ̀ ŋa kpó múnúmúnú.

Náa tãná gú ɔkɔ̃̀-ogu ŋa kpó.

11 Ɔ̀ɖáyé ní: Ká hɛ̀sɔ̀,

tsí ká rí mà ní òŋu ní dzɛ́ Ɔ̀ɖáyé ɛ́.

Òŋu dzàdzàbɔ́-ìlú ŋa kpó,

tsí òŋu dzàdzàbɔ́-ìtalɛ̀ ɛ́ kpó.

12 Ɔlɔ́dzɔ́ Oláyé gbaŋgba wà náànyì-wa si.

Ɔ̀ɖáyé-Yákúbà dzɛ́ ɔgbà líle-kã̀,

tsí náa wérí wa si.

È kɔ̃rĩ fú Ɔ̀ɖáyé Ólú ìtalɛ̀ ɛ́ kpó

1 Orĩ yèé ɔmalɔ́ma-Kòré ŋa

tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Ɛ̀ŋɛ ɔ̀nyà-ìlú ŋa kpó,

è kpawɔ́ òŋu ayè títɛ́.

Ɛ̀ŋɛ ɔ̀nyà-ìlú ŋa kpó,

è kpèébú-ayè títɛ́,

tsí e ń nyɛ Ɔ̀ɖáyé.

3 Iŋɛ́ yèé tse ɛ́,

Ɔlɔ́dzɔ́ Oléwo, ó nódzo tó bɛ́ɛ̀.

Ólú lákṹ ní ó dzɛ́ fú ìtalɛ̀ ɛ́ kpó ɛ́.

4 Ó tse tsí àa kã́rũ ɔ̀nyà-ìlú-àledzò ŋa kpó.

tsí àa dzà ŋá, tsí mú ɛsɛ̀ lé ńǹtá-ŋa si.

5 Ɔmalɔ́ma-Yákúbà ŋa,

àrínódzú-Ɔ̀ɖáyé ŋa ní àa dzɛ́ ɛ́.

Ìlú ḿbí àa wà si báàyí ɛ́,

Ɔ̀ɖáyé ní tsã̀ã́, tsí ń fú wa á.

Ó wà mú ayè tɛ́ wa tó bɛ́ɛ̀.

6 Bí Ɔ̀ɖáyé bòkó wɔlé,

èébú-ayè títɛ́ náa wà kpa tsùùù,

tsí ikpè náa wà ɖɔ̃́ ni.

7 È kɔ̃rĩ fú Ɔ̀ɖáyé.

È kɔ̃rĩ, è kɔ̃rĩ fú Ɔ̀ɖáyé ólú-wa.

È kɔ̃rĩ fúu.

8 Iŋɛ́ yèé tse ɛ́, Ɔ̀ɖáyé dzɛ́ ólú fú ìtalɛ̀ ɛ́ kpó.

È kɔ̃rĩ fúu. È kɔ̃rĩ òtítɔ́ ŋa fúu.

9 Ɔ̀ɖáyé wà gbɛ̃́ ɔ̀nyà-ìlú-àledzò ŋa.

Ó dzokó si kìrì náàntã̀-oyè-ɛ̀.

Àntã̀-oyè ɛ́ dzɛ́ tɛ̀ɛ̀ akpá akpá, ɛsɛ̀ ɛsɛ̀.

10 Ɔ̀gã́-ìlú ŋa òŋu ɔma-Ɔ̀ɖáyé ŋa,

Ɔ̀ɖáyé-Àbàràhámì,

à dzɔ́ kpérí si kpó.

Ɛ̃ɛ̃, ɔ̀gã́ yèé ŋa wà tsɛ́wé bo ìtalɛ̀ ɛ́,

ti Ɔ̀ɖáyé ní à dzɛ́ ɛ́.

Ɔ̀ɖáyé òŋu ká-ɛ̀ kpeéwo fú iŋɛ́ ɔ̀kã̀lɔ́ɔ̀kã̀ kpó.

Sìyɔ́nì òkè-Ɔlɔ́dzɔ́

1 Orĩ yèé ɔmalɔ́ma-Kòré ŋa

tsɔ́ ɛ́. Orĩ ɛ́ ní.

2 Ɔlɔ́dzɔ́ lákṹ, tsí dzɔ ní ká nyɛ̀ɛ́,

ká nyɛ̀ɛ́ ńǹlú-Ɔ̀ɖáyé-wa.

Ká nyɛ̀ɛ́ ńǹtá-òkè yèé dzɛ́ tɛ̀ɛ̀ akpa akpá ɛsɛ̀ ɛsɛ̀ ɛ́.

3 Òkè olí-àŋfɛ́ŋú, amú ayè tɛ́ ìtalɛ̀ kpó.

Nóòro-ayé ɛ́, ḿbɛ̀ ní òkè-Sìyɔ́nì wà á.

Ìlú-ólú lákṹ ni.

4 Ɔ̀ɖáyé wà ńSìyɔ́nì si,

tsí à màá ní òŋu ní dzɛ́ atsɛ́wébonɛ ɛ́.

5 Rí gé! Ólú ŋa kpérí,

tsí à ǹɖe má náàdzɔ́, tsí bàa.

6 Tsí kíbí odzú-ŋa dzá ìlú ɛ́ bɛ́ gé ɛ́,

à kí dzã̀maa, tsí dzidzi mú ŋa,

tsí ɛsɛ̀ yèé à ń tsúwá á, à ń ɖí ànyì.

7 À wà ŋá kpó kpàkpàkpà ńǹɖìkã̀ntso bɛ̀,

tsí wà gbɔ́ ɖíɖɔ̃̀ tsɛ̃̀ɛ̃̀ kíbí ɔnɔbɛ̃̀ɛ̃ náa kálɛ̀-ɔma bíbí si ɛ́.

8 Ó wà kíbí awu-ɔwɔ́-òŋtsà

yèé náa fɔ́ ɔkɔ̃̀-odzómi-ìlú-Tàrìsísì ŋa á bɛ́.

9 Iŋɛ́ yèé àa gbɔ́ ɛ́, odzú-wa kã̀ã́ ńǹlú-Ɔlɔ́dzɔ́ Oláyégbaŋgba,

ńǹlú-Ɔ̀ɖáyé-wa. Ɔ̀ɖáye múu dzokó si rìgírìgí títí lɔ náàrìmáa tã́.

Sɛ́là

10 Óò Ɔ̀ɖáyé, ńnɔlé-ɛ̀ɛ fee,

àa náa sɛ̃̀ wà tédzú kíbí àkaralé wà ńǹtá-ɛ̀ɛ si ɛ́.

11 Óò Ɔ̀ɖáyé, kíbí ɛ́kɔ-ɛ̀ɛ wà fì lɔ náyé gbaŋgba á,

bɛ́ɛ̀ ké ní à nákó wà nyɛ̀ɛ́ ɛ́.

Òtítɔ́ gé ní nà wà tse ɛ́.

12 Ayè wà tɛ́ òkè-Sìyɔ́nì,

tsí ìlú-Yúɖà ŋa wà náyè títɛ́ si

náàtsùgbée ɛdzɔ́ kpíkpè-ɛ̀ɛ ŋa.

13 È ǹɖe, tsí e rɛ̃̀ ńǹtá-oɖi-Sìyɔ́nì wérí kòdzá,

tsí e kã ilé-itsɛ́-aɖèlú ŋa.

14 È rí àŋfɛ̃́ŋú-oɖi-ɛ̀ ŋa,

tsí e kã ìɖì ká sá ɖúkù ńnɛ̀ ŋa.

Ḿbɛ̀ɛ́, è nákó nyáa wáa kpɛ̀rɔ́-ɛ̀ fú ɔma-ànyìwàla ŋa ní:

15 Ɔ̀ɖáyé ɛ́ fee, Ɔ̀ɖáyé-wa ní ó dzɛ́ si

títí lɔ náàrìmáa tã́ á. Agbɛ̃́nɛ-wa ni.

Ɔ̀ɖáyé, ò dzàre ɖé, mú àbi-mi ŋa tɔrɛ fú mi

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Ólú Ɖàfíɖì gbaya. Bàtsébà aya-Yùríyà ní ó gbà á.

Ɔ̀ɖáyé bɛ Nàtánì agbáfɔ̀-ɛ̀ fɔ̀ wáa lɔ fú Ɖàfíɖì. ^*

Ńnɛ̀ ní Ɖàfíɖì tsɔ́rĩ yèé bɛ́, tsí wà fɔ̀ ńǹkɛ̀ɛ́ ní:

3 Óò! Ɔ̀ɖáyé, náàtsùgbé-ore tsítse-ɛ̀ɛ fee,

Ò dzàre, rí ànyínɔ́ fú mi ɖé.

Kíbí nà gbɔ́ ɖíɖɔ̃̀ fúnɛ tó gbà á,

mú àbi yèé ǹ dzɛ ɛ́ tɔrɛ fú mi.

4 Wɛ kò sã̀ yèé ǹ tse ɛ́ ǹɖe nára-mi kpó ɖé.

Wɛ íbàɖí yèé ǹ tse ŋa á ǹɖe kpó béré béré.

5 Íbàɖí yèé ǹ tse ɛ́, ǹ ríi mà.

Àbi yèé ǹ dzɛ ɛ́ kí ńǹsérè-mi si gé ni.

6 Ɔ̀ɖáyé, ǹ dzàbi-ɛ̀ɛ.

Àbi-ìwɔ níìkã̀ntso gé ní ǹ dzɛ ɛ́ náa.

Iŋɛ́ yèé dzɛ́ íbàɖí nódzú-ɛ̀ɛ ɛ́,

òŋu ní ǹ tse yí.

Bí ò ní òŋu kó wíìnyɛ̀-kã̀,

tɛ̀ɛ nákó dzàre gé ni.

Ò kà kpɛdzɔ́-òkṹnù.

7 Ǹ ti dzɛ́ adzàbi si tã́ná ìnà-mi kó bí mi.

Títí ńnɔ́-ìnà-mi ní ǹ dzɛ́ atseébàɖí ɛ́.

8 Òtítɔ́ gé ní nà wò ní kó gbé ńnɔ́-ɔ̀nyà á.

Títí ńnɔ́-mi ɛ́,

ɛ̀kɔ́-ifɛ̀ɛ́nɔ́ gé ní nà wà tse fú mi ɛ́.

9 Mú hùsófù ^*, tsí o ń wɛ̀ fú mi.

tsí èérĩ́ kó tã́ nára-mi.

Wɛ̀ fú mi, tsí n má kíbí àlà bɛ́.

10 Ò dzàre ɖé, mú ayè tɛ́ mi,

tsí n wà nɔ́ɖɔ̃́ si bùràà.

Ò tse tsí ǹ kò tó èkĩ́kĩrĩ́ gìɖì ró.

Tse tsí n táyè ńǹkɛ̀ɛ́.

11 Ǹ tsìkálɛ̀, máa wo àbi yèé ŋa ǹ dzɛ ɛ́ ɖé.

Wɛ íbàɖí ɔ̀kã̀lɔ́ɔ̀kã̀ kpó ǹɖe fú mi.

12 Óò! Ɔ̀ɖáyé, sɔ inɔ́-mi ɖi titɔ̃,

tsí inɔ́-mi kó má.

Sɔ ìsérè-mi ɖi titɔ̃,

tsí ìsérè-mi kó dzokó náàrì mì dzígí.

13 Ò dzàre, máa lé mi soko ɖé.

Máa gba èéfù-ɛ̀ɛ nɔ́wɔ́-mi.

14 Tse tsí ayè-ɔlà yèé nà fúnɛ́ ɛ́ kó wà tɛ́ mi ró.

Tse tsí awù-ire gbo kó rí ìɖì dzokó ńnɔ́-mi.

15 Fee, màa ɖíre ɔ̀nà-ɛ̀ɛ ŋa fífà fú kògbɔ̃́ɔ̃̀rã̀ ŋa,

tsí adzàbi ŋa nákó nyí, tsí sɛ̃̀ wá ńɖɔ̀-ɛ̀ɛ.

16 Ɔ̀ɖáyé, ikú-ɔ̀nyà-kã̀ kó máa ti nɔ́wɔ́-mi,

tsí o bèrè mí ńnɛ̀ ɖé. ^*

Ɔ̀ɖáyé, ìwɔ ní gbà mí là á.

Màa kɔ̃rĩ náàtóoríi ɔlà yèé ò fú mi ɛ́.

17 Ɔlɔ́dzɔ́, tsí arũ-mi,

tsí n wà nyɛ̀ɛ́.

18 Fee, kò tsi ká kpɛrã tsɛbɔ fɛ́ɛ ní ò wà wò ɛ́.

Bí ǹ tsɛbɔ, tsí dzoná-ɛ̀ kpó búláá gìɖì, kàkó dzɔdzú-ɛ̀ɛ.

19 Ɔ̀ɖáyé, ɛbɔ yèé náa dzɔdzú-ɛ̀ɛ,

tsí nà wò ní ká tse f'ɛ́ɛ ɛ́,

òŋu ní dzɛ́ ɔ̀nyà kó tara-ɛ̀ bɔlɛ̀ ɛ́.

Bí ɔ̀nyà-kã̀ tara-ɛ̀ bɔlɛ̀,

tsí nyíìlò kpaɖà, ò kà kɔ̀ɔ́.

20 Kpaɖí, tsí o tsore fú ɛnɛ yèé ŋa wà ńSìyɔ́nì ɛ́, ^*

tsí o sɛ̃̀ ma oɖi-Yèrúsàlɛ́mì si ńǹɖì-ɛ̀.

21 Ḿbɛ̀ɛ́, kíbí ìwɔ ká-ɛ̀ɛ nà wò ní ká tsɛbɔ fú òŋu gbà á,

àa nákó wà tseé fɛ́ɛ bɛ́ɛ̀.

Àa nákó wà tsɛbɔ, tsí wà dzoná-ɛ̀ kpó búláá fɛ́ɛ.

Àa nákó kɛ́ lalá-akɔ ŋa lɔ ńǹdzɛ̀bɔ-ɛ̀ɛ,

tsí wà ń tsɛbɔ fɛ́ɛ.

Kíbí atseébàɖí náa tã́ ayé-ɛ̀ gbà á

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

2 Ńǹwèrè yèé Ɖòwɛ́gì ti Èɖòmítì ŋa á

wáa sɛ́rí Ɖàfíɖì fú Sɔ́lù ní: Ɖàfíɖì bɛ́ ni,

ó lɔ ńlé-Àhìmèlɛ́kì ɛ́, Ɖàfíɖì wà fɔ̀ ní:

3 Ìwɔ ɔ̀nyà-olíkpá, kí tse tsí ò wà mú íbàɖí tsítse,

tsí wà ń nya akpa ná?

Nɔ́dzɔ́ kɔ́dzɔ́ Ɔ̀ɖáyé wà tsore fúnɛ.

4 Ìnyɛ̀ wíwí-ɛ̀ɛ náa dzɛ́ ètò-ɔ̀nyà kpíkpa.

Arũ-ɛ̀ɛ mú si hɛ́hɛ́ kíbí bɛ̀tɛ̀ ìhɛ́kpɛ́rɛ́.

Tsí nà wà nóòɖòbò tsítse si gé!

5 Nà dzáfɔ̀-íbàɖí láre ire.

Tsí nà dzáfɔ̀-òɖòbò gbo láre òtítɔ́ wíwí.

Sɛ́là

6 Oŋù-afɔ̀-tɛ̀ɛ kó bàdzɛ́ iŋɛ́ ní náa ɖɔ̃̀ fɛ́ɛ ɛ́.

Ò dzɛ́ olárũ yíyá nóòɖòbò.

7 Ɔ̀ɖáyé nákó múɛ tsɛ̀rá títí lɔ náàrìtã́.

Nákó fàɛ́ fùɖá ŋ́kpá náwúrɛ́-ɛ̀ɛ,

tsí nákó nyàɛ́ ǹɖe ńǹtalɛ̀-àwáàyɛ̀ ŋa.

Sɛ́là

8 Ḿbɛ̀ɛ́, atsòtítɔ́ ŋa nákó ríi,

tsí à nákó wà sá títítí.

Tsí à nákó wà rã́ã̀rĩ́, tsí wà fɔ̀ ní:

9 È rí gé! Ɛnɛ yèé ní òŋu kàkó sá ɖáre Ɔ̀ɖáyé ɛ́ ńnɛ̀ɛ́!

Tsí náa wà mí kã kíbí ɔwɔ́ wà fúu tó si,

òŋu ikpá yèé gbo ó nɛ́, tsí kó ń tse íbàɖí bá ɔ̀nyà ŋa á.

10 Ó ɖi, èmi òŋu fee,

ǹ wà ńnɔlé-Ɔ̀ɖáyé si kíbí

egi-òlífì-kã̀ yèé ara-ɛ̀ɛ tù si dzɛ̀m̀m̀ si bɛ́ ɛ́.

Tsí mà mí kã Ɔ̀ɖáyé si ní àkaralé wà ńǹtá-ɛ̀ si

títí lɔ náàrì máa tã́.

11 Ɔ̀ɖáyé-mi, màa wà nyɛ̀ɛ́ nɔ́dzɔ́ kɔ́dzɔ́,

iŋɛ́ yèé tse ɛ́, ò wà ńtsɛ́ si.

Odzú-mi wà nɔ́ɔ̀nà si fɛ́ɛ, iŋɛ́ yèé tse ɛ́,

ò dzɛ́ olóore nódzú-ɔma-ɛ̀ɛ ŋa.

Ɔ̀nyà ŋa kò wà wo Ɔ̀ɖáyé

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

À náa fɔ̃kpè si ńnɛ̀ ni. Orĩ ɛ́ ní.

2 Ɛnɛ yèé éwo kò sí fú ŋa á náà fɔ̀ ní:

Ɔ̀ɖáyé-kã̀ kpókpó kò wà.

À náa wà tsìtsekíìtse, tsí wà rĩ̀rɛ̃̀kíìrɛ̃̀.

Ɔ̀kã̀-ŋa-kã̀ kpókpó kà tsere gìɖì.

3 Ɔ̀ɖáyé wà nɔ́ɔ̀rɔ̃,

tsí ó wà módzú tó ɔ̀nyà-ayé yèé ŋa,

tsí ó wà bèrè ní:

Ni ɔ̀nyà-kã̀ kpókpó kò wà,

tsí nɛ́fɛ̀ɛ́nɔ́, tsí kó wo Ɔ̀ɖáyéè?

4 Àŋa kpó, à nɔ̀ si. Tsí à wà tsìtsekíìtse.

Ɔ̀kã̀-ŋa-kã̀ kpókpó kà tsere.

Ɔ̀nyà ɔ̀kã̀ntso gìɖì kò wà tsere.

5 Ɔ̀ɖáyé ní: Atseébàɖí ŋa á fee,

à kò wà gbɔ́ɔ̀kpì-iŋɛ́-kã̀ kpókpó niì?

Tèmi ŋa tédzú ɖi ìdzɛ̀ndzɛ fú ŋa,

tsí à wà dzɛ ńǹkɛ̀ɛ́ gé.

À kà wúùre fú Ɔ̀ɖáyé láyé.

6 À kà sá fú iŋɛ́-kã̀ kpókpó.

Fee, iŋɛ́ yèé kó mú dzidzi múnɛ ɛ́

kàkó wà tã́ná dzidzi nákó wà mú ŋa.

Ìɖéǹɖè ni, ɔ̀tɛ̀-ɛnɛ yèé dzɛ́ ti Ɔ̀ɖáyé ŋa á,

Ɔ̀ɖáyé nákó ra ŋá kpó, tsí à nákó dzanɔ́.

Ɔ̀ɖáyé kɔ̀ ŋá.

7 Nɛ̀ɛ́ nákó ti ńSìyɔ́nì, ^*

tsí wáa gba ɔma-Ìsàràyɛ́lì ŋa là ná?

Ńǹwèrè yèé Ɔ̀ɖáyé nákó sɛ̃̀ tɔ́tse

ayé-ɛnɛ yèé ŋa dzɛ́ tɛ̀ɛ̀ ɛ́ si ńǹɖì-ɛ̀ ɛ́,

ɔmalɔ́ma-Yákúbà ŋa nákó wà dzó, tsí wà yɔ̀.

Ɔma-Ìsàràyɛ́lì ŋa nákó wà náyè títɛ́ si.

Ɔlɔ́dzɔ́ gbà mí nɔ́wɔ́-ɔ̀tɛ̀-mi ŋa

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

À náa ta aɖùrù ŋa si ńnɛ̀ ni. Orĩ ɛ́ ní.

2 Ńǹwèrè nyɛ̀ŋɛ̀ ɛ́, ɛnɛ-Sífì ŋa wáa fɔ̀ fú Sɔ́lù ní:

Ɖàfíɖì ɖúkù ńɖi-àŋa si.

3 Óò, Ɔ̀ɖáyé! Tse àtsùgbée ɛ́kɔ-ɛ̀ɛ, tsí o gbà mí ɖé!

Lo ikpá-ɛ̀ɛ, tsí o ń làbilàre fú mi ɖé!

4 Óò, Ɔ̀ɖáyé! Gbɔ́ ìrewúwú-mi!

Máa fetí kpa afɔ̀ yèé ǹ wà fɔ̀ ɛ́ ɖé!

5 Aledzò ŋa ^* ɖì gìrìdzàà si ńǹtá-mi si,

tsí ɛnɛ́ ɔwɔ́-ŋa kà rí tìtì ɛ́ wà wo ká kpòkú-mi.

Àŋa òŋu, à kà bùɖì-kã̀ kpókpó si fú Ɔ̀ɖáyé.

Sɛ́là

6 Ó ɖi fee, Ɔ̀ɖáyé-mi wà mɔ́wɔ́ gbè fú mi.

Ɔlɔ́dzɔ́ ní tse tsí ǹ wà náàyɛ̀ si ɛ́.

7 Tse àtsesã fú atsɔ́mi ŋa.

Ɔlɔ́dzɔ́, nyà ɖíre ní àkaralé wà ńǹtá-ɛ̀ɛ.

Mú ŋa tsɛ̀rá.

8 Fee, màa tsɛbɔ fɛ́ɛ náàrì nyí wò.

Ɔlɔ́dzɔ́, màa wà mú ɛ́kɔ-ɛ̀ɛ kɔ̃rĩ, iŋɛ́ yèé tse ɛ́,

ò dzɛ́ olóore.

9 Ò gbà mí nárũ-òfò ɔ̀kã̀lɔ́ɔ̀kã̀,

tsí ǹ dzàdzàbɔ́-ɔ̀tɛ̀-mi ŋa kpó.

Bí òfò bánɛ, ká mí kã Ɔlɔ́dzɔ́

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Oŋù yèé à náa ń kɔ̃rĩ ɛ́, à náa kpèé ní àlúùŋkùkù-akpakpíríkpírí-ìlú dzídzɛ̃̀ ŋa.

Kíbí ɔwɔ́-Fìlìsìtínì ŋa tɛ̀ɛ́

ńǹlú-Gátì ɛ́ ní ó tsɔ́ orĩ ɛ́. Orĩ ɛ́ ní.

2 Óò, Ɔ̀ɖáyé! Rí ànyínɔ́ fú mi ɖé!

Ɔ̀nyà ŋa wà náànyì-mi si nɔ́dzɔ́ kɔ́dzɔ́ gé ni.

À náa wà mú mi réré,

tsí wà fɔ̃́ tã̀mbó si nódzú fú mi!

3 Tsɔ́nɛtsɔ́nɛ ŋa wà náànyì-mi si nɔ́dzɔ́ kɔ́dzɔ́.

À kpɔ̀ bɛ́ gbɛ̃̀ɛ̃̀, tsí wà dzogu bá mi,

àŋa atse kɛ́rɛ́kɛ́rɛ́ nyɛ̀ŋɛ̀ ŋa á. ^*

4 Bí odzo kpé mi tsítse, mà wà mí kɛ̃̀ɛ̃́.

5 Mà wà nyɛ Ɔ̀ɖáyé náàtsùgbée afɔ̀-ɛ̀.

Mà wà mí kã Ɔ̀ɖáyé, tsí ɛ̀ɖɔ̃̀ kà ɖá mi.

Kí ɔ̀nyà dzɛ̀kpàdzɛ̀wà nákó nyáa tse bá mi?

6 Nɔ́dzɔ́ kɔ́dzɔ́ ɛ́, ká kpodzú-afɔ̀-mi ŋa ɖélɛ̀ gé ní náa dzɛ́ ti ŋa si ɛ́.

Ìsérè tiŋa gé ní dzɛ́ ní ká wà tseébàɖí bá mi ɛ́.

7 À náa wà ɖìbò-mi, tsí káà ɖúkù si,

tsí wà tsɔ́ mi nɔ́ɔ̀nà yèé ǹ wà gbà ŋa á,

àtsùgbée ká kpòkú-mi.

8 Kíbí à wà tseébàɖí tó ɛ́ fee, à nákó nyáa bɔ́ ńnɛ̀ɛ̀?

Óò, Ɔ̀ɖáyé! Mú inɔ́ bíbí-ɛ̀ɛ, tsí ń ɖá ŋa taánù náa!

9 Ḿbí ǹ tála lɔ wérí wérí ŋa á, ò kã̀ ŋá.

Gba inyɔ́kṹ-mi ɖa náàkpò-awɔ-ɛ̀ɛ.

À kò kɔɔ́ si ńǹwé-ɛ̀ɛ si bɛ́ɛ̀ɛ̀?

10 Nɔ́dzɔ́ yèé màa ɖɔ̃́ kpèɛ́ ɛ́,

ɛsɛ̀ yèé ɔ̀tɛ̀-mi ŋa ń tsúwá á, à nákó ń ɖáànyì.

Ǹ mà ní Ɔ̀ɖáyé wà náànyì-mi si.

11 Ǹ wà nyɛ Ɔ̀ɖáyé náàtsùgbée afɔ̀-ɛ̀.

Ɛ̃ɛ̃, náàtsùgbée afɔ̀ ɛ́, ǹ wà nyɛ Ɔlɔ́dzɔ́.

12 Mà wà mí kã Ɔ̀ɖáyé, tsí ɛ̀ɖɔ̃̀ kà ɖá mi.

Kí ɔ̀nyà dzɛ̀kpàdzɛ̀wà nákó nyáa tse bá mi?

13 Óò Ɔ̀ɖáyé! Àlé yèé ŋa ǹ ta si ɛ́,

ó wà ní n sã ŋá fɛ́ɛ.

Màa tsɛbɔ-ɔkpɛ́ ɖíɖá, tsí ń sã ŋá fɛ́ɛ.

14 Iŋɛ́ yèé tse ɛ́, ò gbà mí nárũ-ikú,

tsí ò kò dzɛ́, tsí n kɔ ɛsɛ̀ tsubú.

Ò tse bɛ́ɛ̀, àtsùgbée n wà rɛ̃̀ nódzú-Ɔ̀ɖáyé,

tsí wà rɛ̃̀ nódzú-iná yèé náa fúnɛ náàyɛ̀ ɛ́.

Ɔ̀ɖáyé dzɛ́ agbàfúnɛ

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Oŋù yèé à náa ń kɔ̃rĩ ɛ́ ní dzɛ́ ní: '' Máa bàdzɛ́ iŋɛ́ ".

Kíbí Ɖàfíɖì sá ɖúkù ńfò òkúta,

tsí kó bɔ́ nɔ́wɔ́-Sɔ́lù ɛ́ ní ó tsɔ́ orĩ ɛ́. Orĩ ɛ́ ní.

2 Óò Ɔ̀ɖáyé! Rí ànyínɔ́ fú mi!

Ńɖɔ̀-ɛ̀ɛ ní mà sá ɖúkù ɛ́.

Nà mú iká-ɛ̀ɛ bò mí málɛ̀ si

títí àsòkò-àtsubi náa wáa lɔ.

3 Ǹ wà ɖɔ̃́ kpe Ɔ̀ɖáyé Oléwo!

Ǹ wà ɖɔ̃́ kpe Ɔ̀ɖáyé ɛnɛ yèé nákó tse iŋɛ́ ɔ̀kã̀lɔ́ɔ̀kã̀ kpó fú mi ɛ́!

4 Ɔ̀ɖáyé kó fú mi nɔ́là ti nɔ́ɔ̀rɔ̃,

iŋɛ́ yèé tse ɛ́, ɔ̀nyà ŋa wà náànyì-mi si gé ni.

Sɛ́là

Ɔ̀ɖáyé kó nyà ɖíre ní àkaralé wà ńǹtá-òŋu,

tsí òŋu náa tse òtítɔ́ gbo.

5 Náàŋírĩ-dzàntá agbóronɛ ŋa ní ǹ wà si ɛ́.

Enyí-ŋa wà kíbí ɔ̀tsɔ̀ òŋu ɔfà ŋa bɛ́,

tsí iŋá-ŋa gbo wà kíbí tàsú múmú hɛ́hɛ́-kã̀ bɛ́.

6 Óò, Ɔ̀ɖáyé! Nya lílákṹ-ɛ̀ɛ yèé tàkadzá ɔ̀rɔ̃ lɔ sã́ŋú sã́ŋú ɛ́ ɖíre.

Tse tsí iyì-ɛ̀ɛ kó gba ìtalɛ̀ ɛ́ kpó kòdzá.

7 À sɔ iwúrɛ́ si nɔ́ɔ̀nà-mi.

Tsí ara kú mi kpó.

Tsí à ɖɛ̃ ɔ̀fɛ̀-kã̀ si ńwádzú-mi,

tsí àŋa ká-ŋa à bɔ́ sɔ ńnɛ̀

Sɛ́là

8 Óò, Ɔ̀ɖáyé! Ɛ̀ɖɔ̃̀-mi dzokó ńǹkɛ̀ɛ́.

Ɛ̃ɛ̃, Ɛ̀ɖɔ̃̀-mi dzokó ńǹkɛ̀ɛ́.

Màa kɔ̃rĩ-kã̀ fɛ́ɛ.

9 Àyé-mi, dzí! Ɛ̀ŋɛ aɖùrù ŋa ńǹrɔ́ǹrɔ́, è dzí!

Ǹ wà wo n tse tsí ilɛ̀ kó yáa má!

10 Ɔlɔ́dzɔ́, màa ɖɔ́kpɛ́ fɛ́ɛ náàŋírĩ-ɔ̀nyà-ìlú ŋa,

Màa kɔ̃rĩ nyɛ̀ɛ́ náàŋírĩ-ìlú ŋa

11 Iŋɛ́ yèé tse ɛ́, àkaralé wà ńǹtá-ɛ̀ɛ,

tsí gba ìɖìkíìɖì káà kã ɔ̀rɔ̃.

Òtítɔ́ tsítse-ɛ̀ɛ gbo lɔ káà kã tsútsú-òdzò.

12 Óò, Ɔ̀ɖáyé! Nya lílákṹ-ɛ̀ɛ yèé tàkadzá ɔ̀rɔ̃ lɔ sã́ŋú sã́ŋú ɛ́ ɖíre!

Tse tsí iyì-ɛ̀ɛ kó gba ìɖìkíìɖì kpó ńǹtalɛ̀ ɛ́.

Ɔ̀ɖáyé dzɛ́ àkpɛ̀dzɔ́ fú àkpɛ̀dzɔ́-ìtalɛ̀ ŋa

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Oŋù yèé à náa ń kɔ̃rĩ ɛ́ ní dzɛ́ ní: '' Máa bàdzɛ́ iŋɛ́ ".

2 Bí è wà kpɛdzɔ́ fúnɛ fee, iŋɛ́-kã̀ náa bɔ̀, tsí wà ńǹɖúkù si niì?^*

È wà kpɛdzɔ́ òtítɔ́ fú ɔ̀nyà ŋa yáà?

3 Kpɛ́rɛ́! È náa mà tã́ná wà nóòkṹnù tsítse si.

Tsí è náa wà tse iŋɛ́-odzú líle ŋa ńǹtalɛ̀ ɛ́.

4 Títí kíbí à kɛ́ efũ̀-atseébàɖí ŋa á ní ɛkpa-ŋa náa ti tɔ̃ si ɛ́.

Bí à bí ŋa sɔ ńlɛ̀ bɛ́ gé ná, à náa ti sé ɔ̀nà,

tsí bɔ̀ fú òɖòbò tsítse si ńǹkɛ̀ɛ́.

5 Arũ-ŋa náa dzɛ́ oró si kíbí oró-edzò bɛ́.

Tsí à náa wà kíbí dzàkpàtà yèé náa mú etí-ìgbɔ̃́ɔ̃̀rã̀ tsoɖi si,

6 tsí kà gbɔ́ orĩ-àmùrò ŋa gìɖì, tsí dzó.

Bí oŋù-àmùrò ɛ́ ɖɔ̃̀ nɔ́ɔ̀kã̀lɔ́ɔ̀kã̀ gìɖì, kà gbɔ́ɔ, tsí dzó.

7 Óò, Ɔ̀ɖáyé! Tsɛ́ enyí nárũ-ŋa!

Òtsó-ŋà ŋa kíbí òtsó-ɔma-dzàntá ŋa á,

Ɔlɔ́dzɔ́, tu ŋá ǹɖe!

8 Kíbí omi náa tsã̀ wáa lɔ bɛ́ gé ɛ́,

tse tsí ká nɔ̀ ǹɖe bɛ́ɛ̀!

Ɔfà-ŋà ŋa yèé à wà ta á kó kũ̀! ^*

9 Ká ɖà kíbí ɔ̀gbɛ̃́ yèé bí ó fà wáa lɔ

ni ɛkpa-ɛ̀ náa wà gbɛ̃ làkóò ɛ́.

Ká ɖà kíbí efũ̀ yèé tsɛ́ wáa lɔ,

tsí odzú-ɔma á kà kã odzúùrɔ̃̀ ɛ́.

10 Tã́ná agúgú-ŋa kó wáa ɖi sùsú ɛ́,

bí à tù si nàmí à gbɛ̃ si oo, afífi kó fɛ́ ŋa lɔ. ^*

11 Ɔ̀ɖáyé nákó tse àtsesã fú atseébàɖí ŋa,

tsí atsòtítɔ́ nákó wà náyè títɛ́ si,

iŋɛ́ yèé tse ɛ́, àmbara-atseébàɖí ŋa ní nákó ń tsã ɛsɛ̀ ɛ́.

12 Tsí ɔ̀nyà ŋa nákó wà fɔ̀ ní:

Ɛ̃ɛ̃, òtítɔ́ tsítse fee, èrè wà ńnɛ̀ fúu.

Ɔ̀ɖáyé wà, tsí dzɛ́ àkpɛ̀dzɔ́ ńǹtalɛ̀ ɛ́ ìɖéǹɖè.

Ìlú kpó kó ɖɔ́kpɛ́ fú Ɔ̀ɖáyé

1 Orĩ yèé à tsɔ́ fú agbɛ̃́ ayɔ́rĩkɔ̃ ŋa á.

Aɖùrù ní à náa wà ta si ńnɛ̀ ɛ́.

Orĩ-Ɔ̀ɖáyé sísɛ̃̀ ni. Orĩ ɛ́ ní.

2 Óò! Ɔ̀ɖáyé, rí ànyínɔ́ fú wa.

Tu kùsɛ̀ɛ̀ fú wa.

Módzú-ire wò wá ɖé.

(Sɛ́là) ^*

3 Tse fú wa bɛ́ɛ̀, àtsùgbé-ɔ̀nà yèé ò tɔ́ si ɛ́,

ɔ̀nyà-ayé ŋa kó ɖáa mà.

Ɔ̀nyà-ìlú ŋa kpó ká mà ní ìwɔ ní dzɛ́ agbanɛlà á.

4 Ɔ̀ɖáyé, ɔ̀nyà-ìlú ŋa kó wà ɖɔ́kpɛ́ fɛ́ɛ.

Ɔ̀nyà-ìlú ŋa kpó ká dzɔ́ wà ɖɔ́kpɛ́ fɛ́ɛ.

5 Tse tsí ayè kó wà tɛ́ ìlú ŋa,

tsí ká wà ɖúgbe-ayè títɛ́.

Iŋɛ́ yèé tse ɛ́, ò kà kpɛ́dzɔ́-òkṹnù fú ɔ̀nyà-ìlú-kã̀ kpókpó.

Ò wà gbɛ̃́ ìlú ŋa ńǹtalɛ̀ ɛ́.

(Sɛ́là)

6 Ɔ̀ɖáyé, ìlú ŋa kó wà ɖɔ́kpɛ́ fɛ́ɛ.

Ɔ̀nyà-ìlú ŋa kpó ká dzɔ́ wà ɖɔ́kpɛ́ fɛ́ɛ

7 Ilɛ̀ sã dzídzɛ. Ɔ̀ɖáyé-wa tu kùsɛ̀ɛ̀ fú wa.

8 Ɛ̃ɛ̃, Ɔ̀ɖáyé-wa kó tu kùsɛ̀ɛ̀ fú wa.

Àtsùgbé-ɔ̀nyà-ayé gbaŋgba ŋa kpó ká wà nɛ́ àrísá fúu.

Ɔ̀ɖáyé, yára wáa gbà mí dzɔ̀ɔ́ ɖé

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á.

Orĩ-ìtédzú ni. Orĩ ɛ́ ní.

2 Ɔ̀ɖáyé, yára wáa gbà mí dzɔ̀ɔ́ ɖé.

Ɔlɔ́dzɔ́, yára wáa mɔ́wɔ́ gbè fú mi ɖé.

3 Awo ikú-mi ŋa fee,

anɔ́ kó kí ńlɛ̀ fú ŋa.

Awo íbàɖí-mi ŋa,

ká tòkpì náànyì, tsí kí ńlɛ̀ kãrãã.

4 Ɛnɛ yèé ŋa wà fɔ̀ fú mi ní: Ǹbó, ǹbó ɛ́,

ká sɛ̃̀ náànyì-mi, tsí anɔ́ kó kí ńlɛ̀ fú ŋa.

5 Ɔlɔ́dzɔ́, ɔ̀nyà ŋa kpó yèé wà wòɛ́ ɛ́,

ká tsàtsùgbé-ɛ̀ɛ, tsí wà dzó,

tsí ká wà náyè títɛ́ si.

Ɛnɛ yèé ŋa kpó náa nɛ́ àmúɖɔ̃̀ fɛ́ɛ ɛ́,

ìwɔ yèé náa gbanɛ là á,

ká wà fɔ̀ ńǹwèrè ɔ̀kã̀lɔ́ɔ̀kã̀ ní:

Ìwɔ, Ɔ̀ɖáyé, ò lákṹ.

6 Èmi òŋu, olákèmà ní ǹ dzɛ́ ɛ́,

tsí ǹ kí náànyínɔ́ si.

Ɔ̀ɖáyé, yára wáa mɔ́wɔ́ gbè fú mi ɖé.

Ìwɔ ní wà gbà fú mi, tsí wà gbà mí dzɔ̀ɔ́ ɛ́.

Ɔlɔ́dzɔ́, yára wá ɖé.

Ɔlɔ́dzɔ́ Oléwo, ǹ nɛ́ àmúɖɔ̃̀ fú ilé-ɛ̀ɛ góró

1 Orĩ yèé ɔmalɔ́ma-Kòré ŋa tsɔ́ fú agbɛ̃́ ayɔ́rĩkɔ̃ ŋa á. ^*

Aɖùrù-Gátì ní à náa wà ta si ńnɛ̀ ɛ́. Orĩ ɛ́ ní.

2 Ɔlɔ́dzɔ́ Oléwo, ǹ dzáfɔ̀-ilé-ɛ̀ɛ góró.

3 Ɔlɔ́dzɔ́, kò tì wà yá fú mi ní n wá ńkpàtá-ilé-ɛ̀ɛ gìɖì.

Èmi ká-mi kpó, ǹ wà kpèébú-ayè títɛ́ lɔ fú Ɔ̀ɖáyé Oláàyɛ̀.

4 Ɔlɔ́dzɔ́ Oléwo, Ólú-mi, Ɔ̀ɖáyé-mi.

Ìtí gìɖì náa rí ìɖì ńǹdzɛ̀bɔ-ɛ̀ɛ.

Àkpã́ã̀nɖɛ̀ɖɛ náa tse ilé si ńǹdzɛ̀bɔ-ɛ̀ɛ,

tsí kɛ́ ɔma-ɛ̀ ŋa si ńnɛ̀.

5 Ɛnɛ yèé ŋa náa wà ńlé-ɛ̀ɛ si ɛ́ fee, à wɛɛ́wo-ire.

À nákó wà nyɛ̀ɛ́ làkóò làkóò gé ni.

(Sɛ́là)

6 Ɛnɛ yèé ŋa àmí-ŋa náa ti ńɖɔ̀-ɛ̀ɛ ɛ́, à wɛɛ́wo-ire.

À náa rí ɔ̀nà yèé ŋa à náa fà, tsí lɔ káà sɛ̃̀ Ɔ̀ɖáyé ɛ́.

7 Bí ɛnɛ nyɛ̀ŋɛ̀ ŋa wà gbà nɔ́ɔ̀gbɔ̃ yèé gbɛ̃ fúrúfúrú si ɛ́,

Ɔ̀ɖáyé náa sɔɔ́ ɖi atã, tsí òdzò náa rɔ̀,

tsí mú kùsɛ̀ɛ̀ ɖà ńnɛ̀.

8 Bí à wà rɛ̃̀ làkóò ɛ́, àmí ná wà kò ŋá máa,

tsí à náa káà bɔ́ nódzú-Ɔ̀ɖáyé ńSìyɔ́nì.

9 Ɔlɔ́dzɔ́ Olíkpá Ɔ̀kã̀lɔ́ɔ̀kã̀,

ò dzàre gbɔ́ ìrewúwú-mi.

Ɔ̀ɖáyé-Yákúbà, rɛ̃tígbè-mi ɖé.

(Sɛ́là)

10 Óò, Ɔ̀ɖáyé, ìwɔ ní dzɛ́ àkpó fú wa á.

Tsódzú, tsí o rí ɛnɛ yèé ìwɔ ká-ɛ̀ɛ ò tsã̀ á.

11 N tsɔdzɔ́ ɔ̀kã̀ntso ńkpàtá-ɛ̀ɛ fee,

ó sã̀ láre n káà tsɔdzɔ́-ɛgbɛ̀rú ńbòmírɛ̃̀.

Ɔ̀ɖáyé-mi, ǹ wò ní n gbé náàkpã̀nàkũ̀-ilé-ɛ̀ɛ.

Ó sã̀ fú mi láre n lɔ káà gbé náàŋírĩ-atseébàɖí ŋa.

12 Ɔlɔ́dzɔ́ Ɔ̀ɖáyé dzɛ́ odzúùrɔ̃̀,

tsí dzɛ́ àkpó.

Ɔlɔ́dzɔ́ náa tsore-ɔ̀fɛ́ fúnɛ,

tsí náa tse tsí iyì-ɛ̀ náa wà ńǹtá-nɛ si.

Agbɔ́ɔ̀lú fú Ɔlɔ́dzɔ́ ŋa fee,

Ɔlɔ́dzɔ́ kà kɔ àrìmáa tsore fú ŋa.

13 Ɔlɔ́dzɔ́ Olíkpá Ɔ̀kã̀lɔ́ɔ̀kã̀,

bí ɔ̀nyà-kã̀ mú àkaralé-ɛ̀ si ńǹtá-ɛ̀ɛ fee,

ɛnɛ nyɛ̀ŋɛ̀ wɛɛ́wo-ire.

Ɔ̀nyà kò dzɛ́ iŋɛ́-kã̀

1 Ìrewúwú-Mɔ̀ɔ́sè, ɔ̀nyà-Ɔ̀ɖáyé.

Ɔlɔ́dzɔ́, ti ńm̀bìmbí ìrènrè ɔ̀kã̀lɔ́ɔ̀kã̀ á,

ńɖɔ̀-ɛ̀ɛ ní à náa sá ɖúkù ɛ́.

2 Tã́ná òkè ŋa kó wà,

tsí o ɖá ilɛ̀ òŋu ayé gbaŋgba á,

títí lɛ́lɛ́ǹlɛ̀lɛ̀ làkóò làkóò ɛ́, ò dzɛ́ Ɔ̀ɖáyé si.

3 Nà tse tsí ɔ̀nyà náa sɛ̃̀ ɖi ilɛ̀.

Iŋɛ́ yèé tse ɛ́, ò fɔ̀ si ní:

"Ɔma-ɔ̀nyà, sɛ̃̀ ɖi ilɛ̀".

4 Ɛ̃ɛ̃, nódzú-tɛ̀ɛ òŋu fee,

ɔɖɔ̃́ ɛgbɛ̀rú (1000) náa wà fɛ́ɛ kíbí ɔ̀ná bɛ́.

Náa wà fɛ́ɛ kíbí ìwèrè-kã̀ náa wáa lɔ nóoru bɛ́ gé ɛ́ ni.

5 Nà gbá ŋa ǹɖe kíbí orũ-ìɖádzá náa ránɛ oɖé bɛ́ gé ɛ́ ni.

Ó wà kíbí náàwúrɔ̀ kóko náa bɔ́ fùɖá bɛ́ ɛ́.

6 Náa tsèbóbó náàwúrɔ̀, tsí wà ɖonùgbó

tsí nalɛ́, náa rɔ, tsí gbɛ̃.

7 Inɔ́bíbí-ɛ̀ɛ mú wa rá kpó.

Tsí ò lásì, tsí dzidzi mú wa si.

8 Àbi-wa ŋa kí ŋ́gbaŋgba si nódzú-ɛ̀ɛ.

Ò tsí atsɔ nódzú-iŋɛ́ kpó yèé ɖúkù si ńnɔ́-wa ŋa á ŋàà.

9 Ɛ̃ɛ̃, ò lásì si, tsí ó tse tsí ɔdzɔ́-wa ŋa nyàbɔ̀ kpó.

Ɔɖɔ̃́-wa ŋa wà tã́ kíbí à náa mí fùù bɛ́ gɛ́ ɛ́ ni.

10 Ɔɖɔ̃́ maá lé nɔ́gɔ́ɔta ní àa wà gbà á.

Oláàmí ŋa ní wà gba ɔgɔ̃́ɔ̃rɛ̃ ɛ́.

Tsí náa sì dzɛ́ nóòfò òŋu ìréré kpó.

Náa wáa lɔ kóyá, tsí àa náa dzì nɔ́ɔ̀nà.

11 Nɛ̀ɛ́ ma ikpá-inɔ́bíbí-ɛ̀ɛ?

Bí à nɛ́ àrísá fɛ́ɛ, à náa ma kíbí nà lásì tó gbà á.

12 Ḿbɛ̀ɛ́, kɔ́ wa, tsí kó yé wa ní ɔdzɔ́-wa ŋa kò kpɔ̀,

tsí àa kó nɛ́ ifɛ̀ɛ́nɔ́.

13 Ɔlɔ́dzɔ́, nyí wò wá ɖé!

Kpɔ́! Títí fú nɔ́dzɔ́sí ńǹkɛ̀ɛ́?

Rí ànyínɔ́ fú àtsìtsɛ́-ɛ̀ɛ ŋa.

14 Náàwúrɔ̀, tse tsí àmúɖɔ̃̀-ɛ̀ɛ kó wà fú wa náyo,

tsí àa kó wà ɖúgbe ayè títɛ́ nɔ́dzɔ́ kɔ́dzɔ́.

15 Ò mú wa tsòfò kpíkpɔ̀ wáa lɔ,

tsí odzú-wa kã àtsubi.

Mú ayè tɛ́ wa si nárũ-ɛ̀ ńǹkɛ̀ɛ́.

16 Nya itsɛ́-ɛ̀ɛ tsítse ɖíre fú àtsìtsɛ́-ɛ̀ɛ ŋa,

tsí o mú lílákṹ-ɛ̀ɛ ɖíre fú ɔmalɔ́ma-ŋà ŋa.

17 Aɖɔ̃̀-Ɔlɔ́dzɔ́ Ɔ̀ɖáyé-wa kó wà fú wa si.

Máa dzɛ́, tsí itsɛ́-ɔwɔ́-wa kó yɔ̀kɔ̀sì,

Ɛ̃ɛ̃, máa dzɛ́, tsí itsɛ́-ɔwɔ́-wa kó yɔ̀kɔ̀sì.

Ɔ̀ɖáyé ní náa tsɛ́wé bonɛ ɛ́

1 Ɛnɛ yèé Ɔ̀ɖáyé Oléwo tsɛ́wé bò si ɛ́,

ɛnɛ nyɛ̀ŋɛ̀ búlɛ̀ nábɛ́-Ɔ̀ɖáyé Olíkpá si.

2 Mà fɔ̀ fú Ɔlɔ́dzɔ́ ní: Ìwɔ ní ǹ ɖárè si ɛ́,

tsí ò dzɛ́ ɔgbà líle-kã̀, tsí wérí mi si.

Ò dzɛ́ Ɔ̀ɖáyé-mi, tsí mà wà mí kɛ̃̀ɛ̃́.

3 Ìɖéǹɖè ni, Ɔlɔ́dzɔ́ ní nákó gbɛ̀ɛ́ dzɔ̀ɔ́

nárũ-àbìtì yèé à sɔ si fɛ́ɛ ɛ́.

Nákó gbɛ̀ɛ́ dzɔ̀ɔ́ nɔ́wɔ́-irɔ̃̀-íbàɖí

akpa ɔ̀nyà kpíkpɔ̀ náàrìkã̀ntso.

4 Ɔlɔ́dzɔ́ nákó tsɛ́wé bòɛ́ bɛ́ɛ̀

kíbí aɖɛ̀ɛ náa mú iká bo ɔma-ɛ̀ ŋa si ɛ́.

Àkaralé wà ńǹtá-Ɔlɔ́dzɔ́ tó bɛ́ɛ̀.

Ó dzɛ́ àkpó òŋu àwù-irɛ̃ fú wa.

5 Dzidzi-òru kàkó múɛ

títí kó wà módzo tseɛ́.

Bí à tafà nóòsã́ gãgã gìɖì, nákó séɛ.

6 Irɔ̃̀-íbàɖí-òkùkù-kã̀ kpókpó kàkó múɛ.

Irɔ̃̀ kpanɛ kpanɛ nóòsã́ gãgã kàkó múɛ.

7 Bí ɔ̀nyà-ɛgbɛ̀rú tsɛ̀rá nódzú-ɛ̀ɛ oo,

nàmí ɔ̀nyà-ɛgbàá ɛgbàá ɔ̀nà mɛ́ɛrú

tsɛ̀rá sɔ́má-ɛ̀ɛ gìɖì oo,

ɛ̀ya kàkó ya ìwɔ òŋu.

8 Ńǹtsodzú ti ìwɔ ká-ɛ̀ɛ bɛ́ péé

ní nàa wà rí kíbí atseébàɖí ŋa

nákó wà dzèrè-íbàɖí-ŋà ŋa á.

9 Iŋɛ́ yèé tse ɛ́, Ɔlɔ́dzɔ́ wà tsɛ́wé bòɛ́,

Ò ɖúkù ńɖi-Ɔ̀ɖáyé Oléwo si.

10 Ɛ̀ya kàkó yaɛ́.

Àtsubi-kã̀ kpókpó kàkó wɔ̀ ńkpáfɛ-ɛ̀ɛ.

11 Nákó fɔ̀, tsí adzítsɛ́-ɔ̀rɔ̃-ɛ̀ ŋa

nákó wà náànyì-ɛ̀ɛ si nɔ́ɔ̀nà ɔ̀kã̀lɔ́ɔ̀kã̀ kpó.

12 À nákó kɛ́ɛ banɛ́,

àtsùgbée o máa kɔsɛ̀ ńǹtá-òkúta-kã̀. ^*

13 Nàa rɛ̃̀ gbà ńǹtá-dzàntá òŋu dzàkpàtà náàrì kíyá.

Nàa mú ɛsɛ̀ kĩ́rĩ ɔma-dzàntá òŋu edzò ŋa málɛ̀.

14 Nákó lɔ bɛ́ɛ̀, iŋɛ́ yèé tse ɛ́,

ò tamá Ɔ̀ɖáyé si kpátíláá.

Ɔ̀ɖáyé ní òŋu nákó gbɛ̀ɛ́ dzɔ̀ɔ́,

tsí wà tsɛ́wé bòɛ́ náàtsùgbée kíbí ò màá ìɖénɖè ɛ́.

15 Nàa kpe Ɔ̀ɖáyé, tsí nákó dzɛ́ fɛ́ɛ.

Bí ò wà nóòfò-kã̀ si,

Ɔ̀ɖáyé òŋu ká-ɛ̀ nákó wà náànyì-ɛ̀ɛ si.

Nákó gbàɛ́ dzɔ̀ɔ́, tsí burɔ̃ si néwo fɛ́ɛ.

16 Ire-agbó, ire-atɔ́ ní nákó dzɛ́ tɛ̀ɛ ɛ́.

Nákó nyà ɖíre fɛ́ɛ ní òŋu ní wà gbàɛ́ là á.

Ɔlɔ́dzɔ́ wà dzoyè

1 Ɔlɔ́dzɔ́ wà dzoyè.

Ó mú lílákṹ-ɛ̀ tsàwùwɔ̀ si.

Tsí mú ikpá-ɛ̀ tse ɖíɖì ɖì si.

Ó mú ìtalɛ̀ ɛ́ dzokó si rìgírìgí.

Kò wà mì dzígí.

2 Ò ti tsàntã̀-oyè-ɛ̀ɛ gúlɛ̀ si títí ńǹkpìnkpìlɛ̀.

Títí lɛ́lɛ́ǹlɛ̀lɛ̀ ní ò wà si ɛ́.

3 Óò, Ɔlɔ́dzɔ́!

Oɖò lákṹ ŋa kɔ̃́ si tó bɛ́ɛ̀.

À wà kpa ɖúgbe tsùù,

tsí sɛ̃̀ wà kpa ɖúgbe máa.

4 Ó ɖi, ìwɔ Ɔlɔ́dzɔ́ nɔ́ɔ̀rɔ̃ sã́ŋú sã́ŋú,

ikpá-tɛ̀ɛ láre ɔtsã́-oɖò lákṹ ŋa.

Ikpá-ɛ̀ɛ láre rĩ́rĩ-oɖò lákṹ ŋa.

5 Àkaralé wà ńǹtá-ɛkpa-ɛ̀ɛ yèé ŋa ò tɔ́ si ɛ́.

Iŋɛ́ yèé má á gé ní dzɔ kó gbé ńnɔlé-ɛ̀ɛ

títí lɔ náàrìmáa tã́ á.

Àa kó wà nyɛ Ɔlɔ́dzɔ́, tsí wà gbɔ́ɔ̀lú fúu

1 È fú ká kpèébú-ayè títɛ́ fú Ɔlɔ́dzɔ́.

Àa kó mú ayè títɛ́, tsí ń nyɛ̀ɛ́.

Ó dzɛ́ òkúta lákṹ.

Agbanɛlà-wa ni.

2 Àa kó tìmá Ɔlɔ́dzɔ́,

tsí wà ɖɔ́kpɛ́ fúu.

Àa kó kɔ̃rĩ, tsí wà ń nyɛ̀ɛ́.

3 Iŋɛ́ yèé tse ɛ́,

Ɔlɔ́dzɔ́ ní dzɛ́ Ɔ̀ɖáyé lákṹ kpàtàkìkì ɛ́.

Ó dzɛ́ Ólú lákṹ.

Ó kpeéwo fú iŋɛ ɔ̀kã̀lɔ́ɔ̀kã̀ kpó.

4 Iŋɛ́ ɔ̀kã̀lɔ́ɔ̀kã̀ kpó yèé wà

ńnɔ́-ilɛ̀ lɔ sã́ŋúsã́ŋú ɛ́,

nɔ́wɔ́-ɛ̀ ní à wà á.

Òkè ŋa kpó, tɛ̀ɛ̀ ní à dzɛ́ ɛ́.

5 Àhũ, tɛ̀ɛ̀ ni. Òŋu ní tseé ɛ́.

Ìtalɛ̀ yèé dzokó si rìgírìgí ɛ́,

tɛ̀ɛ̀ ké ni. Ɔwɔ́-tòŋu ká-ɛ̀ ní ó ń tseé ɛ́.

6 Ɛ̀ŋɛ kpó, è wá, tsí àa kó tara-wa bɔlɛ̀,

tsí kálɛ̀, tsí mú erí kãlɛ̀ fú Ɔlɔ́dzɔ́.

Òŋu ní tse wá á.

7 Ó dzɛ́ Ɔ̀ɖáyé-wa,

Àa dzɛ́ ɔ̀nyà-ìlú-ɛ̀ ŋa,

tsí dzɛ́ agbo-ɛ̀, tsí ó wà ró wa.

Ɔlɔ́dzɔ́ ní fee, nɔ́mbɛ́ ɛ́,

bí è wà gbɔ́ òŋu-mi,

8 è máa fetí kpaá

kíbí gbágbóǹgbàgbò-ŋɛ́ ŋa tse ńMèrìbá

nɔ́ɔ̀ɖã̀-Màsà wáa lɔ ɛ́. ^*

9 Ńǹwèrè nyɛ̀ŋɛ̀ ɛ́, à wo afɔ̀ nárũ-mi.

À sì rí iŋɛ́ yèé ŋa kpó ǹ tse ɛ́

tã́ná à tse bá mi bɛ́ɛ̀.

10 Ó ɖi, títí fú ɔɖɔ̃́ ogóodzì ɛ́,

kíbí à wà tse gbà á, à sú mi.

Tsí ǹ ní ɔ̀nyà-ìlú yèé ŋa òŋu, à nɔ̀nà.

À kò ma ɔ̀nà yèé ŋa mà fà á.

11 Ḿbɛ̀ɛ́, inɔ́ bí mi, tsí ǹ lérí-ɛ̀ ní:

Ɛsɛ̀-ŋa méèdzì kpɛ́nlɛ́ɛ́

kàkó wɔ̀ ńǹlú yèé ǹ tɔ́tse si fú ŋa

ní ká lɔ káà míra á.

100

Orĩ-ɔkpɛ́ ɖíɖá fú Ɔlɔ́dzɔ́

1 Ɛ̀ŋɛ ɔ̀nyà-ayé yèé ŋa kpó,

è kpèébú-ayè títɛ́ fú Ɔlɔ́dzɔ́.

2 È sɛ̃ Ɔlɔ́dzɔ́ òŋu ayè títɛ́,

tsí è mú ayè títɛ́,

tsí e wà ń lɔ ńɖɔ̀-ɛ̀.

3 È rí mà ní Ɔlɔ́dzɔ́ dzɛ́ Ɔ̀ɖáyé.

Òŋu ní tse wá á.

Àa dzɛ́ tɛ̀ɛ̀ si.

Àa dzɛ́ ɔ̀nyà-ìlú-ɛ̀ ŋa,

tsí dzɛ́ agbo-ɛ̀, tsí ó wà ró wa.

4 È wɔlé-ɛ̀ òŋu ɔkpɛ́ ɖíɖá,

tsí e wà lɔ ńkpàtá-ɛ̀,

tsí wà kɔ̃rĩ, tsí wà nyɛ̀ɛ́.

È ɖɔ́kpɛ́ fúu, tsí e fɔ̀ fúu ní ɛ́kɔ-ɛ̀ wà fì.

5 Ɔlɔ́dzɔ́ fee, olóore ní ó dzɛ́ ɛ́.

Àmúɖɔ̃̀-ɛ̀ kò nɛ́ ìkpàkũ.

Àkaralé wà ńǹtá-ɛ̀ si

títí lɔ ńǹbìmbí ìrènrè ɔ̀kã̀lɔ́ɔ̀kã̀ kpó.

103

Ǹ wà ɖɔ́kpɛ́ fú Ɔlɔ́dzɔ́

1 Orĩ-Ɖàfíɖì.

Àyɛ̀-mi kó wà ɖɔ́kpɛ́ fú Ɔlɔ́dzɔ́.

Ti ńnɔ́-mi kpó,

ǹ wà ɖɔ́kpɛ́ fú Ɔlɔ́dzɔ́ Olí-Ɛ́kɔ-ire.

2 Àyɛ̀-mi kó wà ɖɔ́kpɛ́ fú Ɔlɔ́dzɔ́.

Kó máa gbàgbé ore tsítse-ɛ̀-kã̀ kpókpó.

3 Iŋɛ́ yèé tse ɛ́, òŋu ní wà mú àbi-mi ŋa tɔrɛ fú mi ɛ́.

Òŋu ké ní náa tse tsí irɔ̃̀ ɔ̀kã̀lɔ́ɔ̀kã̀ kpó náa tù mí ɛ́.

4 Òŋu ké ní náa gbà mí nárũ-ikú, tsí ǹ kà wɔsà á.

Náa tu ore tsítse-ɛ̀ òŋu àmúɖɔ̃̀-ɛ̀ bò mí.

5 Òŋu ké ní wà fú mi ńre-agbó òŋu ire-atɔ́ ɛ́.

Bí ǹ gbó gìɖì gbo ɛ́,

náa mú àmí-àtìlɛ̀nɖe ŋa kò mí si kíbí àtagbà bɛ́.

6 Ɔlɔ́dzɔ́ kà kpɛdzɔ́-òkṹnũ̀ fúnɛ.

Ɛnɛ yèé ŋa à wà dzára fú ɛ́,

Ɔlɔ́dzɔ́ náa dzà gbè fú ŋa.

7 Ó mú ɔ̀nà-ɛ̀ ŋa fífà ɖíre fú Mɔ̀ɔ́sè,

tsí nya itsɛ́ lákṹ lákṹ-ɛ̀ ŋa tsítse ɖíre fú ɔma-Ìsàràyɛ́lì ŋa.

8 Ɔlɔ́dzɔ́ náa rí ànyínɔ́ fúnɛ tó bɛ́ɛ̀,

tsí náa gbɔ́ ɖíɖɔ̃̀ fúnɛ.

Kà yáa bínɔ́, tsí náa tsore fúnɛ tó bɛ́ɛ̀.

9 Ɔlɔ́dzɔ́ kà wà bánɛ fɔ̀ làkóò gé náàrì mí.

Kà bínɔ́ gbo si gé náàrì kɔ inɔ́ bíbí ɛ́ dzɔ̀ɔ́.

10 Kà fɛtí fú wa tó kíbí àa dzàbi gbà á.

Kà tsàtsesã fú àbi yèé ŋa àa dzɛ ɛ́.

11 Ó ɖi, kíbí ìgbèrí bo ìtalɛ̀ si gbà á,

bɛ́ɛ̀ ké ní àmúɖɔ̃̀-Ɔlɔ́dzɔ́ bo

anɛ́ àrísá fúu ŋa si ɛ́.

12 Kíbí òntsà dzɛ̃̀ fú bùkúù tó gbà á,

bɛ́ɛ̀ ké ní náa mú àbi-wa ŋa gbo

taánù lɔ sã́ŋú sã́ŋú ɛ́.

13 Kíbí boba-ɔma kà kɔ àrìmáa rí ànyínɔ́ fú ɔma-ɛ̀ ŋa á,

bɛ́ɛ̀ ké ní Ɔlɔ́dzɔ́ kà kɔ àrìmáa rí ànyínɔ́

fú anɛ́ àrísá fúu ŋa á.

14 Ɔlɔ́dzɔ́ ma iŋɛ́ yèé ó kɛ́, tsí ń tse wá á.

Ó wà tédzú ní ilɛ̀ ní òŋu kɛ́, tsí ń tse wá á.

15 Ayé-ɔ̀nyà kpó fee, ó wà kíbí kóko bɛ́ ni.

Náa tse kíbí kóko ŋa náa tsèbóbó si bɛ́ ɛ́.

16 Bí awu-kã̀ tse gé ná, ìbíbó ɛ́ náa ká ǹɖe.

Bí ó ká ǹɖe bɛ́ɛ̀ tã́,

à kà tì ma ìɖì-ḿbí ó ká ti ɛ́ gìɖì ró.

17 Ó ɖi fee, ore tsítse-Ɔlɔ́dzɔ́ òŋu

náa wà si títí lɔ fú àrìmáa tã́

anɛ́ àrísá fúu ŋa á.

Òtítɔ́-ɛ̀ tsítse náa wà si

fú ɔmalɔ́ma ŋa lɔ ńǹbìmbí ìrènrè.

18 Náa wà si fú atse si ńǹtá-ìmɔ̀lɛ̀-Ɔlɔ́dzɔ́ ŋa.

À náa tédzú,

tsí wà tse si ńǹtá-iŋɛ́ yèé ó fɔ̀ ní ká tse ŋa á.

19 Ɔlɔ́dzɔ́ mú àntã̀-oyè-ɛ̀ si nɔ́ɔ̀rɔ̃.

Ó wà dzoyè náàdzàkáyé ɛ́ kpó.

20 Ɛ̀ŋɛ adzítsɛ́-ɔ̀rɔ̃-Ɔlɔ́dzɔ́ ŋa, è ɖɔ́kpɛ́ fúu.

Ɛ̀ŋɛ adzítsɛ́-ɔ̀rɔ̃ olíkpá lákṹ lákṹ agbɔ́ɔ̀lú fúu ŋa,

atse si ńǹtá-iŋɛ́ yèé ŋa náa fɔ̀ ní ɛ̀ŋɛ kó tse ɛ́, è ɖɔ́kpɛ́ fúu.

21 Ɛ̀ŋɛ adzogu ŋa kpó yèé wà dzítsɛ́ fú Ɔlɔ́dzɔ́ ɛ́,

ɛ̀ŋɛ atse awù-ɛ̀ ŋa, è ɖɔ́kpɛ́ fúu.

22 Ɛ̀ŋɛ kpó òŋu iŋɛ́ kpó yèé ŋa

Ɔlɔ́dzɔ́ mú ɔwɔ́-ɛ̀ tse ɛ́, è ɖɔ́kpɛ́ fúu.

Ńǹɖì ɔ̀kã̀lɔ́ɔ̀kã̀ kpó ḿbí ó wà dzoyè ɛ́, è ɖɔ́kpɛ́ fúu.

Àyɛ̀-mi kó wà ɖɔ́kpɛ́ fú Ɔlɔ́dzɔ́.

110

Ɔlɔ́dzɔ́ tsã̀ ɔ̀nyà-kã̀, tsí ó dzɛ́ ólú,

tsí dzɛ́ atsɛbɔ-Ɔ̀ɖáyé

1 Orĩ-Ɖàfíɖì.

Ɔlɔ́dzɔ́ wí fú Ɔlá-mi ní:

''Wáa dzokó náàwóòtã́-mi,

tsí n mú ɔ̀tɛ̀-ɛ̀ɛ ŋa tsã́lɛ̀,

tsí o mú ɛsɛ̀ lé ńǹtá-ŋa''.

2 Ti ńSìyɔ́nì ní Ɔlɔ́dzɔ́

nákó tse tsí ikpá-oyè-ɛ̀ɛ kó wà fì ɛ́.

Nàa kpɛ̀tsɛ fú ɔ̀tɛ̀-ɛ̀ɛ ŋa kpó.

3 Rí gé! Àmí ko ɔ̀nyà-ìlú-ɛ̀ɛ ŋa si,

tsí à kpérí kpó nyàgã̀ã̀ nɔ́dzɔ́-ogu dzídzɛ.

Àtìlɛ̀nɖe ɔmadzagu ŋa ti ńǹtá-òkè

yèé dzɛ́ ti Ɔ̀ɖáyé akpá akpá, ɛsɛ̀ ɛsɛ̀ ɛ́,

tsí bàa ńɖɔ̀-ɛ̀ɛ kíbí nɛnɛ-àwúrɔ̀ kùtùkùtù bɛ́.

4 Ɔlɔ́dzɔ́ wíìnyɛ̀, tsí ta iŋɛ́ si ńǹtá‐ɛ̀,

tsí kàkó nyí, tsí fɔ afɔ̀-òmírɛ̃̀-kã̀ ró.

Ó ní: ''Nàa dzɛ́ atsɛbɔ-Ɔ̀ɖáyé títí lɔ náàrìtã́

ńǹrɔ́-kíbí Mɛ̀kìsèɖɛ́kì dzɛ́ atsɛbɔ-Ɔ̀ɖáyé gbà á.'' ^*

5 Ɔlɔ́dzɔ́ wà nóòtã́-ɛ̀ɛ si,

tsí nákó ra ólú ŋa kpó bútúbútú nɔ́dzɔ́-inɔ́ bíbí-ɛ̀.

6 Náa kpɛdzɔ́ fú ìlú ŋa si nɛ́kpa-òtítɔ́,

tsí náa mú ólú ŋa tsɛ̀rá kpó,

tsí à náa kú tɛ́lɛ̀ lɔ bilɛ bilɛ si náyé gbaŋgba á.

7 Ḿbɛ̀ɛ́, náa yà lɔ káà mɔmi ńkpalà,

tsí àmí náa kòó, tsí náa dzàdzàbɔ́.

111

Ɔlɔ́dzɔ́ tse iŋɛ́-ikpá lákṹ lákṹ ŋa

1 Ká nyɛ Ɔlɔ́dzɔ́.

Ǹ wà ɖɔ́kpɛ́ fú Ɔlɔ́dzɔ́ ti ńnɔ́-mi kpó

ńǹkpérí-atsòtítɔ́ ŋa òŋu ɔ̀nyà ɛ̀gbɛ̀lɛ́ɛ̀gbɛ̀.

2 Itsɛ́ Ɔlɔ́dzɔ́ ŋa tsítse lákṹ tó bɛ́ɛ̀!

Ó dzɔ ní adzáfɔ̀-ɛ̀ ŋa kó wà kɔ́ŋɛ́ ti nára-ɛ̀.

3 Itsɛ́-ɛ̀ tsítse dzɛ́ àfɛ́ŋú góró,

tsí wówo gbo tó bɛ́ɛ̀.

Òtítɔ́ tsítse-ɛ̀ náa wà si títí lɔ náàrìmáa tã́.

4 Náa tse tsí à náa tédzú iŋɛ́ lákṹ lákṹ-ɛ̀ ŋa tsítse.

Ó dzɛ́ olóre-ɔ̀fɛ́ òŋu arí ànyínɔ́ fúnɛ.

5 Náa fú anɛ́ àrísá fúu ŋa ńdzídzɛ,

tsí kà gbàgbé ìmɔ̀lɛ̀ yèé ó tse si ɛ́ láyé.

6 Ó gba iŋɛ́-ìlú-àledzò ŋa fú ɔ̀nyà-ìlú-ɛ̀ ŋa.

Ḿbɛ̀ɛ́, ó wà ń nyà ɖíre ní

òŋu nɛ́kpá ńnɔ́-itsɛ́-òŋu ŋa tsítse.

7 Òtítɔ́ gé ní náa tse ɛ́. Kà tsòkṹnù.

Àkaralé wà ńǹtá-ɛkpa-ɛ̀ ŋa kpó.

8 À kà kpàrɔ̀ láyé.

Àkaralé wà ńǹtá ŋa.

Tsí à dzɛ́ òtítɔ́ gbo.

9 Ɔlɔ́dzɔ́ gbàlú-ɛ̀ dzɔ̀ɔ́,

tsí ó tse ìmɔ̀lɛ̀ yèé wà si làkóò làkóò ɛ́.

À kà kpe ɛ́kɔ-ɛ̀ tsaréma, tsí ó nódzo tó bɛ́ɛ̀.

10 Bí ò wà wo o nɛ́ ifɛ̀ɛ́nɔ́

nà náàrísá fú Ɔlɔ́dzɔ́ tã́ná. ^*

Arɛ̃̀ si nɛ́kpa-ɛ̀ ŋa náa nɛ́ ifɛ̀ɛ́nɔ́ ìɖéǹɖè.

Ká wà nyɛ Ɔlɔ́dzɔ́ títí lɔ fú àrìmáa tã́.

112

Arɛ̃̀ si nɛ́kpa-Ɔ̀ɖáyé wɛɛ́wo-ire

1 Ká nyɛ Ɔlɔ́dzɔ́.

Anáàrísá fú Ɔlɔ́dzɔ́, ó wɛɛ́wo-ire.

Adzáfɔ̀-ɛ́kpa-ɛ̀ ŋa, ó wɛɛ́wo-ire.

2 Ìbìmbí ìrènrè-ɛ̀ náa nɛ́kpá ńǹtalɛ̀ ɛ́.

Ìbìmbí-afɔ̀títɔ́ ŋa kpó,

Ɔlɔ́dzɔ́ nákó tu kùsɛ̀ɛ̀ fú ŋa.

3 Ɔwɔ́ kà tì wà fúu bɔ̀,

tsí òtítɔ́ tsítse-ɛ̀ náa wà si títí lɔ náàrìmáa tã́.

4 Òkùkù náa ɖi mímá fú ìbìmbí-afɔ̀títɔ́ ŋa.

À dzɛ́ atsore fúnɛ,

tsí dzɛ́ aráànyínɔ́ fúnɛ òŋu atsòtítɔ́.

5 Ɛnɛ yèé dzɛ́ atsore fúnɛ,

tsí náa ŋɛ́ iŋɛ́ fúnɛ ɛ́, ó wɛɛ́wo-ire.

Ɛnɛ yèé kò dzɛ́ atsòkṹnù ńtsɛ́-ɛ̀ tsítse ɛ́,

ó wɛɛ́wo-ire.

6 Náa dzokó si rìgírìgí, kà mì dzígí.

Atsòtítɔ́ fee, kònígbàgbé láyé.

7 Ikɔ̀-àtsubi-kã̀ kà mú ɛ̀ɖɔ̃̀ kà ɖáa.

Kà kíyá. Náa mí kã Ɔlɔ́dzɔ́ si gé ni.

8 Fúlúfúlú-kã̀ kpókpó kà wà nɛ́ɛ̀ɖɔ̃̀-ɛ̀. Ɛ̀ɖɔ̃̀ kà ɖáa.

Ńǹtã̀ntã́-ɛ̀ ɛ́, odzú-àdzàbɔ́ ní náa ń wo ɔ̀tɛ̀ɛ̀ ŋa á.

9 Afú olákèmà ŋa ńŋɛ́ náàrì nyíwò ní ó dzɛ́ ɛ́.

Òtítɔ́-ɛ̀ tsítse náa wà si títí lɔ náàrìmáa tã́.

Náà nɛ́kpá máa òŋu iyì.

10 Atseébàɖí náa ríi,

tsí inɔ́-ɛ̀ náa wà bíi hɛ́hɛ́hɛ́.

Náà dzarũ kpàkpàkpà,

tsí gbɛ̃ si kpandzaa.

Awù-atseébàɖí ŋa kàkó tsɛ láyé.

113

Ɔlɔ́dzɔ́ tókpá ìɖéǹɖè

1 Ká nyɛ Ɔlɔ́dzɔ́.

Àtsìtsɛ́-Ɔlɔ́dzɔ́ ŋa, è nyɛ̀ɛ́.

È nyɛ Ɔlɔ́dzɔ́.

2 Ká nyɛ Ɔlɔ́dzɔ́ ti báàyí títí lɔ náàrìtã́.

3 Ti nóòntsà wáa lɔ ńbùkúù, ká nyɛ Ɔlɔ́dzɔ́.

4 Ɔlɔ́dzɔ́ kpeéwo fú ìlú ŋa kpó náyé gbaŋgba á.

Iyì-ɛ̀ tàkádzá ɔ̀rɔ̃ lɔ sã́ŋú sã́ŋú.

5 Nɛ̀ɛ́ tó Ɔlɔ́dzɔ́ Ɔ̀ɖáyé-wa ná?

Òŋu yèé dzokó si títí ńréŋúréŋú-ɔ̀rɔ̃,

6 tsí wà balɛ̀ kpalɛwo ɔ̀rɔ̃ òŋu ìtalɛ̀ ɛ́.

7 Náa fa kònɛ́kpá ŋa ǹɖe ńrùfù.

Tsí fa olákèmà ŋa ǹɖe ńǹtakìɖì.

8 Tsí mú ŋa lɔ káà dzokó

náàŋírĩ-tɛ̀ɛ̀ ègbènáànyì-ólú ŋa.

9 Náa ɖálé fú àgbàrèbí, tsí sɔɔ́ ɖi olɔ́ma,

tsí náa wɛɛ́wo-ire náàŋírĩ-ɔma-ɛ̀ ŋa.

Ká nyɛ Ɔlɔ́dzɔ́.

114

Ɔ̀ɖáyé-Yákúbà, ó tókpá

1 Ńǹwèrè yèé ɔma-Ìsàràyɛ́lì ŋa

fùɖá ti néÈdzíkpìtì ɛ́,

ńǹwèrè aro-Yákúbà tsíǹɖe ńlɛ̀-àledzò ɛ́,

2 erè-Yùɖéyà ɖi ìɖìsɛ̃̀-Ɔlɔ́dzɔ́,

tsí erè-Ìsàràyɛ́lì ɖi tɛ̀ɛ̀.

3 Àhũ ríi, tsí sá.

tsí oɖò-yòɖánì gbo ríi,

tsí tòkpìnáànyì.

4 Òkè ŋa wà fò kíbí àgbò ŋa bɛ́.

Tsí gègélè ŋa gbo wà fò kíbí ɔma-abó ŋa.

5 Àhũ, kí tse tsí ò ríi, tsí sá ni?

Oɖò-yòɖánì, kí tse tsí ìwɔ gbo,

ò ríi, tsí tòkpìnáànyì ni?

6 Òkè ŋa, kí tse tsí è wà fò kíbí àgbò ŋa bɛ́ɛ̀?

Gègélè ŋa, kí tse tsí ɛ̀ŋɛ gbo,

è wà fò kíbí ɔma-abó ŋa?

7 Ilɛ̀! Mì kpìkpìkpì nódzú-Ɔlɔ́dzɔ́ Ɔ̀ɖáyé-Yákúbà!

8 Òŋu ní náa sɔ òkúta líle tɛ̀rɛ̀ɛ̀ ɖi oɖò,

tsí sɔ òkúta-anyɛ̀rɛ̃̀ ɖi éwo-oɖò ɛ́.

115

Ɔ̀ɖáyé ní dzɛ́ olí-iyì ɛ́

1 Ɔlɔ́dzɔ́, kò tsi àwa ní dzɛ́ olí-iyì ɛ́.

Kò tsi àwa ni.

Ìwɔ ní dzɛ́ olí-iyì ɛ́, iŋɛ́ yèé tse ɛ́,

nà tsore fúnɛ, tsí àkaralé wà ńǹtá-ɛ̀ɛ.

2 Ìlú ŋa wà bèrè ní: Ńbisí Ɔ̀ɖáyé-ŋa á wà ná?

Kí tse tsí à wà bèrè bɛ́ɛ̀ ni?

3 Ɔ̀ɖáyé-wa wà nɔ́ɔ̀rɔ̃ si.

Iŋɛ́ kpó yèé náa wò ɛ́ ní náa tse ɛ́.

4 Irɛ̃ kpipa òŋu siká ní à ń tse iŋɛ-ŋà ŋa á.

Ɔ̀nyà ŋa ní tse iŋɛ ŋa á.

5 Iŋɛ ŋa á nárũ. Ó ɖi, à kà sì wíìnyɛ̀.

À nódzú. Ó ɖi, à kà sì rírã.

6 Etí wà fú ŋa. Ó ɖi, à kà sì gbɔ̃́ɔ̃̀rã̀.

Imɔ́ wà fú ŋa. Ó ɖi, à kà sì gbɔ́mɔ́.

7 À nɛ́ ɔwɔ́. Ó ɖi, à kà sì kɛ́ iŋɛ́-kã̀ kpókpó.

Ɛsɛ̀ wà fú ŋa. Ó ɖi, à kà sì rɛ̃̀.

Oŋù-kã̀ kà bɔ́ ti nárũ-ŋa.

8 Ɛnɛ yèé ŋa tse iŋɛ ŋa á,

tsí wà mí kã̀ ŋá á,

ɛnɛ bɛ́ɛ̀ kpɔ̃ɔ̃́, ɛnɛ bɛ́ɛ̀ súu ŋa ní

àŋa iŋɛ ŋa á méèdzì dzɛ́ si ɛ́.

9 Ɛ̀ŋɛ ɔ̀nyà-aro-Ìsàràyɛ́lì ŋa, è mí kã Ɔlɔ́dzɔ́.

Iŋɛ́ yèé tse ɛ́, ó wà mɔ́wɔ́ gbè fú ŋɛ́,

tsí dzɛ́ àkpó fú ŋɛ́.

10 Ɛ̀ŋɛ ɔmalɔ́ma-Àrɔ̃́nì ŋa, è mí kã Ɔlɔ́dzɔ́.

Iŋɛ́ yèé tse ɛ́, ó wà mɔ́wɔ́ gbè fú ŋɛ́,

tsí dzɛ́ àkpó fú ŋɛ́.

11 Ɛ̀ŋɛ abùɖì si fú Ɔlɔ́dzɔ́ ŋa, è mí kã̀ã́.

Iŋɛ́ yèé tse ɛ́, ó wà mɔ́wɔ́ gbè fú ŋɛ́,

tsí dzɛ́ àkpó fú ŋɛ́.

12 Ɔlɔ́dzɔ́ wà tsèsérè-wa,

Nákó tu kùsɛ̀ɛ̀ fú wa.

Nákó tu kùsɛ̀ɛ̀ fú ìlú-Ìsàràyɛ́lì.

Nákó tu kùsɛ̀ɛ̀ fú kpáfɛ-Àrɔ̃́nì.

13 Nákó tu kùsɛ̀ɛ̀ fú abùɖì si fúu ŋa kpó.

Maɖé gbo, onùgbó gbo,

nákó tu kùsɛ̀ɛ̀ fú ŋa.

14 Ɔlɔ́dzɔ́ kó tse tsí kó sã̀ fú ŋɛ́.

Kó tse tsí kó sã̀ fú ɛ̀ŋɛ-ɔma-ŋɛ́ ŋa méèdzì.

15 Ɔlɔ́dzɔ́ ɛnɛ yèé tse ìgbèrí,

tsí tse ilɛ̀ ɛ́, kó tu kùsɛ̀ɛ̀ fú ŋɛ́.

16 Ɔ̀rɔ̃ ni ti Ɔlɔ́dzɔ́ ni,

tsí ó kɛ́ ìtalɛ̀, tsí ń bɔwɔ́-ɔ̀nyà ŋa.

17 Fee, kò tsi òkú ŋa ní náa nyɛ Ɔlɔ́dzɔ́ ɛ́.

Kò tsi alɔ ńlé-ikú ŋa ní náa nyɛ Ɔlɔ́dzɔ́ ɛ́.

Kò tsi alɔ ḿbí ìɖìkíìɖì náa kpa tiɛ̃tiɛ̃ si kpó ŋa á

ní náa nyɛ̀ɛ́ ɛ́.

18 Àwa òŋu, àa wà nyɛ Ɔlɔ́dzɔ́.

Àa wà nyɛ̀ɛ́ ti báàyí títí lɔ náàrìtã́.

Ká nyɛ Ɔlɔ́dzɔ́.

117

Ìlú ŋa kpó ká wà nyɛ Ɔlɔ́dzɔ́

1 Ìlú ŋa kpó, è nyɛ Ɔlɔ́dzɔ́.

Ɛ̀ŋɛ ɔ̀nyà-ìlú-ɔ̀kã̀lɔ́ɔ̀kã̀ kpó,

è mú lílákṹ-ɛ̀ kɔ̃rĩ.

2 Iŋɛ́ yèé tse ɛ́, ó nɛ́ àmúɖɔ̃̀ fú wa tó bɛ́ɛ̀.

Àkaralé wà ńǹtá-Ɔlɔ́dzɔ́ títí lɔ náàrìtã́ ni.

Ká nyɛ Ɔlɔ́dzɔ́.

119

Ɛkpa-Ɔ̀ɖáyé sã̀

1 Ɛnɛ yèé ŋa à kà rí íbàɖí fɔ̀ nára-ŋa á,

afa ɛkpa-Ɔlɔ́dzɔ́ ŋa, à wɛ éwo-ire.

2 Atse si nóŋù-Ɔlɔ́dzɔ́ tútútú ŋa, à wɛ éwo-ire.

Awòó inɔ́tã̀ã́nyìtã̀ã́ ŋa, à wɛ éwo-ire

3 À kò tsébàɖí. Ɔ̀nà-ɛ̀ ŋa ní à fà á.

4 Ɔlɔ́dzɔ́, ò ɖá iŋɛ́ yèé ò wò ní ká tse ŋa á si,

tsí ká wà tse si ńǹtá-ŋa nɔ́wɔ́ nɔ́wɔ́.

5 Ɔ̀nà-mi fífà kó sã̀ máa, tsí n tse awù-ɛ̀ɛ ŋa.

6 Ḿbɛ̀ɛ́, ǹ kàkó dzanɔ́

bí ǹ wà módzú tó iŋɛ́ yèé nà fɔ̀ ní ká tse ŋa kpó ɛ́.

7 Màa wà nyɛ̀ɛ́, inɔ́tã̀ã́nyìtã́,

tsí màa wà kɔ́ iŋɛ́ yèé nà wò ní ká tse ŋa á.

8 Awù-ɛ̀ɛ ŋa, màa tse ŋá.

Máa kɔ̀ mí dzɔ̀ɔ́ gbárágbárá.

9 Bí àtìlɛ̀nɖe nákó nyáa tse gbà,

tsí wà lìlò-ire ná?

Ó wà ní kó wà rɛ̃̀ si nɛ́kpa-afɔ̀-ɛ̀ɛ.

10 Ǹ wà wòɛ́ inɔ́tã̀ã́nyìtã̀ã́.

Máa tse tsí n sé ɔ̀nà-iŋɛ́ yèé nà fɔ̀ ní ká tse ŋa á lɔ sã́ŋú sã́ŋú.

tsí wà mú éwo kã̀ wérí.

11 Mà mú afɔ̀-ɛ̀ɛ ɖúkù ńnɔ́-mi si,

àtsùgbée n máa dzàbi-ɛ̀ɛ.

12 Ǹ wà ɖɔ́kpɛ́ fɛ́ɛ Ɔlɔ́dzɔ́!

Kɔ́ mi náwù-ɛ̀ɛ ŋa tsítse.

13 Iŋɛ́ kpó yèé nà wò,

tsí fɔ̀ ní ká tse ɛ́,

ǹ fɔ̀ ŋá nɛ́kpa nɛ́kpa.

14 Ká tse si nóŋù-afɔ̀-ɛ̀ɛ tútútú fee,

ǹ rí ayè títɛ́ ńnɛ̀,

tsí ó wà kíbí ire náa tsɔnɛ kũ̀ si bɛ́ ɛ́ ni.

15 Màa wà tédzú ɛkpa-ɛ̀ɛ ŋa,

tsí wà módzú tó ɔ̀nà-ɛ̀ɛ ŋa.

16 Afɔ̀-ɛ̀ɛ náa mú ayè tɛ́ mi tó bɛ́ɛ̀.

Ǹ kà gbàgbé afɔ̀-ɛ̀ɛ.

17 Tsore fú adzítsɛ́-ɛ̀ɛ ɖé!

Màa gbé náàyɛ̀, tsí wà tse si ńǹtá-afɔ̀-ɛ̀ɛ.

18 Tsódzú fú mi, tsí n rí kíbí ɛkpa-ɛ̀ɛ sã̀ tó gbà á.

19 Àledzò ní ǹ dzɛ́ ńǹtalɛ̀ ɛ́.

Máa mú iŋɛ́ yèé ò fɔ̀ ní ká tse ŋa á ɖúkù-mí.

20 Iŋɛ́ nà wò ní ká tse ŋa ńǹwèrè kpó ɛ́,

mà dzáfɔ̀-ŋa tó bɛ́ɛ̀.

21 Ò ɖódzo tse ɔma-èré yèé ŋa wà tse kɛ́rɛ́kɛ́rɛ́,

tsí nɔ̀ lɔ sã́ŋú sã́ŋú si fú iŋɛ́ yèé ò fɔ̀ ní ká tse ŋa á

22 Gbà mí nárũ-èkpè òŋu ká múnɛ kpe kí ŋa ńnɛ̀ɛ́,

iŋɛ́ yèé tse ɛ́, mà tse si nóŋù-afɔ̀-ɛ̀ɛ tútútú.

23 Bí ɔma-ólú ŋa gìɖì kpérí si,

tsí wà fɔ afɔ̀-mi, èmi adzítsɛ́-ɛ̀ɛ

mà wà tédzú awù-ɛ̀ɛ ŋa gé ni.

24 Ká tse si nóŋù-afɔ̀-ɛ̀ɛ ŋa tútútú fee,

náa dzɛ́ ayè títɛ́ fú mi.

Òŋu ní náa wà fú mi ńfɛ̀ɛ́nɔ́ ɛ́.

25 Èmi ní kóko dzɛ́ rùfù yí!

Kíbí ò ti tàlé-ɛ̀ si ɛ́, tse tsí n sɛ̃̀ gbé náàyɛ̀.

26 Ǹ fɔ iŋɛ́ yèé ǹ tse kpó ŋa á fɛ́ɛ.

tsí ò dzɔ́ŋù fú mi.

Kɔ́ mi náwù-ɛ̀ɛ ŋa tsítse.

27 Tse tsí n ɖá ɔ̀nà-ɛkpa-ɛ̀ɛ ŋa mà.

Ḿbɛ̀ɛ́, màa sɛ̃̀ wà tédzú iŋɛ́ lákṹ lákṹ-ɛ̀ɛ ŋa tsítse.

28 Òfò tsítse fɔ́ inyɔ́kṹ si nódzú-mi.

Kɛ́ mi ǹɖe nóŋù-afɔ̀-ɛ̀ɛ.

29 Tse tsí ɔ̀nà-òɖòbò tsítse

kó sɔ́ ǹɖe ńɖɔ̀-mi lɔ sã́ŋúsã́ŋú,

tsí o tsore-ɔ̀fɛ́ fú mi, tsí n ma ɛkpa-ɛ̀ɛ.

30 Ǹ tsã̀ã́ ní màa tsòtítɔ́ fɛ́ɛ,

tsí ǹ tse iŋɛ́ yèé nà wò ní ká tse ŋa á.

31 Ká tse si nóŋù-afɔ̀-ɛ̀ɛ tútútú ɛ́,

ǹ kɛ́ɛ tsɛdzɔ́-ara-mi.

Ɔlɔ́dzɔ́, máa dzɛ́, tsí n dzanɔ́.

32 Mà súré nɔ́ɔ̀nà-iŋɛ́ yèé nà fɔ̀ ní ká tse ŋa á.

iŋɛ́ yèé tse ɛ́, ò tsíìsérè-mi.

33 Ɔlɔ́dzɔ́, ɖíre ɔ̀nà-awù-ɛ̀ɛ ŋa fú mi,

tsí n wà múu tsitsɛ́ tse títí lɔ náàrìtã́.

34 Tse tsí n nɛ́ ìrã̀ã́mà,

tsí n wà rɛ̃̀ si nɛ́kpa-ɛ̀ɛ.

N báa banɛ́ si inɔ́tã̀ã́nyìtã̀ã́.

35 Gbɛ̃́ mi si nɔ́ɔ̀nà-iŋɛ́ yèé nà fɔ̀ ní ká tse ŋa á,

iŋɛ́ yèé tse ɛ́, à náa dzɔdzú-mi.

36 Tse tsí ìsérè-mi kó tsí fú ká tse si nóŋù-afɔ̀-ɛ̀ɛ tútútú.

Ìsérè-mi kó máa tsí fú èrè dzídzɛ.

37 Nya odzú-mi ńnɔ́-iŋɛ́-akpotu ŋa rírí.

Tse tsí n sɛ̃̀ gbé náàyɛ̀ nɔ́ɔ̀nà-ɛ̀ɛ ŋa.

38 Tse tsí iŋɛ́ ò fɔ̀ si ŋa á kó tsɛ fú adzítsɛ́-ɛ̀ɛ, ^*

tsí ká wà nɛ́ àrísá fɛ́ɛ.

39 Èkpèkéèkpè yèé mà wà ɖíìhã̀ŋù fú ɛ́,

kó máa sɔ́má-mi,

iŋɛ́ yèé tse ɛ́, iŋɛ́ yèé nà fɔ̀ ní ká tse ŋa á sã̀.

40 Ɛ̃ɛ̃, mà dzáfɔ̀-ɛkpa-ɛ̀ɛ ŋa.

Òtítɔ́ tsítse-ɛ̀ɛ kó tse tsí n sɛ̃̀ gbé náàyɛ̀.

41 Ɔlɔ́dzɔ́, ore tsítse-ɛ̀ɛ kó rɔ̀ ɖà ńǹtá-mi.

Gbà mí là kíbí ò ti fɔ̀ɔ́ si ɛ́.

42 Ḿbɛ̀ɛ́, màa nyáa nárũ wíìnyɛ̀ fú

anyèkpè nára-mi, iŋɛ́ yèé tse ɛ́,

ǹ wà mí kã afɔ̀-ɛ̀ɛ.

43 Afɔ̀-òtítɔ́ kpó fee,

máa nyàá ǹɖe nárũ-mi,

iŋɛ́ yèé tse ɛ́, odzú-mi wà nɔ́ɔ̀nà si

fú iŋɛ́ yèé nà fɔ̀ ní ká tse ŋa á.

44 Màa wà rɛ̃̀ si nɛ́kpa-ɛ̀ɛ làkóò làkóò gé ni.

45 Màa wà rɛ̃̀ náàrìkíyá-iŋɛ́-kã̀,

iŋɛ́ yèé tse ɛ́, ǹ wà wo ɛkpa-ɛ̀ɛ ŋa.

46 Nódzú-ólú ŋa fee,

màa wà wíìnyɛ̀-ká tse si nóŋù-afɔ̀-ɛ̀ɛ tútútú.

Kàkó tsãnɔ́ fú mi.

47 Ɛkpa-ɛ̀ɛ ŋa náa mú ayè tɛ́ mi,

tsí mà dzáfɔ̀-ŋa tó bɛ́ɛ̀.

48 Mà kɔ́wɔ́-mi ŋa lɔ ńǹgbèrí

fú ɛkpa-ɛ̀ɛ yèé ŋa mà dzáfɔ̀ tó bɛ́ɛ̀ ɛ́,

tsí mà sɛ̃̀ wà tédzú iŋɛ́ yèé nà fɔ̀ ní ká tse ŋa á.

49 Tédzú afɔ̀ yèé ò fɔ̀ si fú adzítsɛ́-ɛ̀ɛ ɛ́.

Afɔ̀ yèé ŋa ò módzú-mi si nɔ́ɔ̀nà si fú ɛ́.

50 Iŋɛ́ yèé náa tunɔ́ fú mi ńǹréré ɛ́ ní dzɛ́ ní:

Àlé yèé ŋa ò ta si ɛ́ nákó tse tsí màa sɛ̃̀ gbé náàyɛ̀.

51 Atse kɛ́rɛ́kɛ́rɛ́ ŋa mú mi tse tó bɛ́ɛ̀.

Ó ɖi, ǹ kò kɔ àrìmáa rɛ̃̀ si nɛ́kpa-ɛ̀ɛ.

52 Ɔlɔ́dzɔ́, mà wà tédzú iŋɛ́ yèé ŋa nà fɔ̀ ní ká tse ɛ́ gé ni,

tsí à náa wà tunɔ́ fú mi.

53 Bí ɔ̀nyà ŋa wà tseébàɖí,

tsí à kò wà rɛ̃̀ si nɛ́kpa-ɛ̀ɛ,

inɔ́ náa sɔ mí tsúù.

54 Ɛ̀wɔ̀-ɛ̀ɛ ŋa ɖi orĩ si fú mi

ḿbí ǹ dzɛ́ ɔma-àrɛ̃̀wá, tsí wà si ɛ́.

55 Ɔlɔ́dzɔ́, mà wà tédzúɛ nóoru,

àtsùgbée n wà rɛ̃̀ si nɛ́kpa-ɛ̀ɛ.

56 Iŋɛ́ yèé dzɛ́ tèmi ɛ́ fee,

òŋu ní dzɛ́ n wà rɛ̃̀ si nɛ́kpa-ɛ̀ɛ ɛ́.

57 Ɔlɔ́dzɔ́, ǹ fɔ̀ɔ́ ní:

Yèé dzɛ́ akpálà-tèmi ńnɛ̀ ɛ́

ní dzɛ́ n wà tse si ńǹtá-afɔ̀-ɛ̀ɛ ɛ́.

58 Ǹ wò ní n dzɔdzúɛ inɔ́tã̀ã́nyìtã̀ã́.

Tsore-ɔ̀fɛ́ fú mi kíbí ò fɔ̀ɔ́ si ɛ́.

59 Ǹ tsèsérè-ìlò-mi,

tsí ǹ nya ɛsɛ̀-ká tse si nóŋù-afɔ̀-ɛ̀ɛ ŋa tútútú.

60 Ǹ kà mú ɛsɛ̀ kpa èkĩ́kɛ̃rɛ̃́

tã́ná mà wà tse si ńǹtá-iŋɛ́ yèé nà fɔ̀ ní ká tse ŋa á.

61 Ǹ kí nókù-kògbɔ́ɔ̀lú fɛ́ɛ ŋa.

Ó ɖi, ɛkpa-ɛ̀ɛ òŋu, ǹ kò gbàgbé-ɛ̀.

62 Ńǹŋàáŋà ogú méedze,

mà ǹɖe, tsí wà nyɛ̀ɛ́, iŋɛ́ yèé tse ɛ́,

Nà kpɛdzɔ́-òtíttɔ́.

63 Anáàrísá fɛ́ɛ ŋa, arɛ̃̀ si nɛ́kpa-ɛ̀ɛ ŋa,

èmi-ŋa méèdzì ní dzɛ́ oláàdzɔ́rɛ̃̀ ɛ́.

64 Ɔlɔ́dzɔ́, àmúɖɔ̀-ɛ̀ɛ gba ìtalɛ̀ ɛ́ kpó.

Kɔ́ mi náwù-ɛ̀ɛ ŋa tsítse.

65 Ɔlɔ́dzɔ́, ò tse tsí adzítsɛ́-ɛ̀ɛ wɛ éwo-ire

kíbí ò fɔ̀ɔ́ si ɛ́.

66 Kɔ́ mi, tsí n wà gbɔ́ɔ̀kpì-iŋɛ́,

tsí n nɛ́ɛ̀rã̀ã́mà, iŋɛ́ yèé tse ɛ́,

ǹ karalé si ńǹtá-iŋɛ́ yèé nà fɔ̀ ní ká tse ŋa á.

67 Tã́ná n ɖi fúfuru ɛ́, ǹ yagbo lɔ ni.

Ó ɖi báàyí ɛ́, ǹ wà tse iŋɛ́ yèé ŋa ò fɔ̀ ní n tse ɛ́.

68 Ò dzɛ́ olóore, tsí nà tsore fúnɛ.

Kɔ́ mi náwù-ɛ̀ɛ ŋa tsítse.

69 Atse kɛ́rɛ́kɛ́rɛ́ ŋa mú òɖòbò,

tsí ń gbɛ̃ɛ̃́rĩ́ mi.

Ó ɖi, mà wà rɛ̃̀ si nɛ́kpa-ɛ̀ɛ ŋa inɔ́tã̀ã́nyìtã̀ã́.

70 Ɛ̀ɖɔ̃̀ kò kã̀ ŋá bɔ̀!

Ó ɖi èmi, ɛkpa-ɛ̀ɛ ŋa náa mú ayè tɛ́ mi.

71 Kíbí à furu mi ɛ́, ó sã̀ fú mi.

Ó tse tsí ǹ kɔ́ awù-ɛ̀ɛ ŋa tsítse.

72 Ɛkpa yèé ò ɖá si ɛ́,

ó sã̀ láre siká òŋu owó ɛ̀gbɛ̀lɛ́ɛ̀gbɛ̀.

73 Ò mɔ́wɔ́ tse mí, tsí banɛ́ mi si.

Tse tsí n nɛ́ ìrã̀ã́mà, tsí n kɔ́ iŋɛ́ yèé nà fɔ̀ ní ká tse ŋa á.

74 Bí anáàrísá fɛ́ɛ ŋa wà rí mi,

ayè náa wà tɛ́ ŋa, iŋɛ́ yèé tse ɛ́,

odzú-mi kò nyà ńǹtá-afɔ̀-ɛ̀ɛ.

75 Ɔlɔ́dzɔ́, ǹ ɖámà ní

ɛdzɔ́ yèé nà kpè ŋa á, à dzɛ́ òtítɔ́.

Tsí kíbí ò furu mí ɛ́, afɔ̀-ɛ̀ɛ dzàre.

76 Àmúɖɔ̃̀-ɛ̀ɛ kó wà tunɔ́ fú mi

kíbí ò ti tàlé-ɛ̀ si fú èmi adzítsɛ́-ɛ̀ɛ ɛ́.

77 Ore tsítse-ɛ̀ɛ kó la ìɖìkíìɖì wɔ̀ nára-mi,

tsí n gbé náàyɛ̀, iŋɛ́ yèé tse ɛ́,

ɛkpa-ɛ̀ɛ náa mú ayè tɛ́ mi.

78 Atse kɛ́rɛ́kɛ́rɛ́ yèé ŋa mú òɖòbò,

tsí ń hákì mí si ɛ́, ká dzanɔ́.

Èmi òŋu, màa sɛ̃̀ wà tédzú ɛkpa-ɛ̀ɛ ŋa.

79 Anáàrísá fɛ́ɛ ŋa ká sɛ̃̀ wá ńɖɔ̀ mi.

À nákó ma kíbí à náa tse si nóŋù-afɔ̀-ɛ̀ɛ tútútú gbà á.

80 Tse tsí n wà tse awù-ɛ̀ɛ ŋa inɔ́tã̀ã́nyìtã̀ã́,

atsùgbée n máa dzanɔ́.

81 Ǹ módzú si nɔ́ɔ̀nà,

tsí odzú-mi ɖi fofo náfɔ̀-o gbà mí là.

Odzú-mi kò sì nyà nɔ́ɔ̀nà fú afɔ̀-ɛ̀ɛ.

82 Odzú-mi ɖi fofo náfɔ̀-n tse si

ńǹtá-iŋɛ́ yèé ò fɔ̀ ní ká tse ɛ́.

Tsí mà fɔ̀ ní: Nɔ́dzɔ́sí nàa ɖè rɛ̀ mí ńǹkɛ̀ɛ́ ná?

83 Ǹ gbɛ̃ si kpaŋdzadzaa

kíbí àkpò-awɔ yèé òwúrɔ̀ nya si ɛ́ bɛ́.

Ó ɖi, ǹ kò gbàgbé awù-ɛ̀ɛ ŋa tsítse.

84 Títí fú ɔdzɔ́ mɛ́ɛló adzítsɛ́-ɛ̀ɛ nákó wà bɛ́ si làkóò ná?

Ńǹwèrè yèésí nàa kpɛdzɔ́ bá atsoró bá mi ŋa ná?

85 Atse kɛ́rɛ́ kɛ́rɛ́ ŋa ɖɛ̃ ɔ̀fɛ̀ si ní èmi kó kí ńnɛ̀.

Kíbí à tse bɛ́ɛ̀ ɛ́, à kò rɛ̃̀ si nɛ́kpa-ɛ̀ɛ.

86 Iŋɛ́ yèé na fɔ̀ ní ká tse ŋa á kpó, à dzɛ́ òtítɔ́.

Atsòɖòbò ŋa wà tsoró bá mi nóòkṹnù gé ni.

Gbà mí ɖé!

87 Ó bɔ́ɖé tsɛ̃́, tsí tèmi má tã́ ńǹtalɛ̀ ɛ́.

Ǹ kò sì kɔ àrìmáa rɛ̃̀ si nɛ́kpa-ɛ̀ɛ ŋa.

88 Kíbí àkaralé wà ńǹtá-ɛ̀ɛ gbà á,

tse tsí n sɛ̃̀ gbé náàyɛ̀.

Ḿbɛ̀ɛ́, màa wà módzú tó oŋù-arũ-ɛ̀ɛ ŋa.

89 Ɔlɔ́dzɔ́, afɔ̀-ɛ̀ɛ tagùgù mú ɔ̀rɔ̃ si.

Kò wà mì dzígí títí lɔ náàrì tã́.

90 Àkaralé wà ńǹtá-ɛ̀ɛ si títí lɔ ńm̀bìmbí ńǹrènrè.

Ìtalɛ̀ ɛ́, ò tseé, tsí ó dzokó si kìrì, kò wà mì dzígí.

91 Kíbí ò fɔ̀ ní iŋɛ́ ŋa á kó wà gbà á,

bɛ́ɛ̀ ní à wà si títí wáa fú òní ɛ́.

Iŋɛ́ yèé tse ɛ́, ayé gbaŋgba á kpó wà tsitsɛ́ fɛ́ɛ ni.

92 Ɛkpa-ɛ̀ɛ kàá wà mú ayè tɛ́ mi,

òfò ní má mú mi tsɛ̀rá á.

93 Ɛkpa-ɛ̀ɛ ŋa fee, kòníìgbàgbé láyé ni.

Àŋa ní tse tsí ǹ sɛ̃̀ gbé náàyɛ̀ si ɛ́.

94 Ǹ bɔ̀ nɔ́wɔ́-ɛ̀ɛ si. Gbà mí là ɖé!

Iŋɛ́ yèé tse ɛ́, ǹ wà wo n rɛ̃̀ si nɛ́kpa-ɛ̀ɛ ŋa.

95 Atseébàɖí ŋa wà wo ɔ̀nà-ká mú mi tsɛ̀rá.

Ó ɖi, èmi òŋu, ká tse si nóŋù-afɔ̀-ɛ̀ɛ tútútú

ní ǹ bɔ̀ si fú ɛ́.

96 Iŋɛ́ yèé ɔ̀nyà rí ní ó sã̀ dzálɛ̀ ɛ́, náa tã́.

Ó ɖi, iŋɛ́ yèé nà fɔ̀ ní ká tse ɛ́ òŋu kà tã́ láyé.

97 Ǹ dzáfɔ̀-ɛkpa-ɛ̀ɛ góró!

Nɔ́dzɔ́ kɔ́dzɔ́, mà sɛ̃̀ wà tédzú-ɛ̀ gé ni.

98 Ɛkpa-ɛ̀ɛ mú mi ɖi olífɛ̀ɛ́nɔ́ láre ɔ̀tɛ̀-mi ŋa.

Mà múu tse tara-mi si gé ni.

99 Ifɛ̀ɛ́nɔ́ ɖé mi si láre akɔ́nɛ-mi ŋa kpó.

Iŋɛ́ yèé tse ɛ́, ká tse si nóŋù-afɔ̀-ɛ̀ɛ tútútú ní mà wà tédzú ɛ́.

100 Iŋɛ́ náa yé mi láre onùgbó ŋa,

iŋɛ́ yèé tse ɛ́, ǹ rɛ̃̀ si nɛ́kpa-ɛ̀ɛ ŋa.

101 Ɔ̀nà-íbàɖí ɔ̀kã̀lɔ́ɔ̀kã̀ kpó tsítse,

ǹ kɔ̀ɔ́ fífà, àtsùgbée n tse si ńǹtá-afɔ̀-ɛ̀ɛ.

102 Ǹ kò kɔ àrìmáa tse iŋɛ́ yèé ŋa nà fɔ̀ ní ká tse ɛ́.

Iŋɛ́ yèé tse ɛ́, ìwɔ ní kɔ́ mi ɛ́.

103 Oŋù-afɔ̀-ɛ̀ɛ ŋa ɖɔ̃̀ ńgɛ̀gɛ̀-mi góró!

À ɖɔ̃̀ láre onyi nárũ-mi gìɖì.

104 Kàá tsi ɛkpa-ɛ̀ɛ ŋa, ǹ kàkó nyáa wà ɖá iŋɛ́ mà.

Ḿbɛ̀ɛ́, ɔ̀nà-òɖòbò ɔ̀kã̀lɔ́ɔ̀kã̀ kpó, ǹ kɔ̀ɔ́ fífà.

105 Afɔ̀-ɛ̀ɛ dzɛ́ kanɖé fú ḿbí mà mú ɛsɛ̀ tɛ̀ ɛ́,

tsí dzɛ́ odzúná fú ɔ̀nà-mi.

106 Ǹ kpe iŋɛ́ si ńǹtá-ɛ̀, tsí le oŋù si ńnɛ̀

ní màa tse si ńǹtá-iŋɛ́ yèé ò bèrè ní n tse,

tsí dzɛ́ òtítɔ́ ɛ́.

107 Ɔlɔ́dzɔ́, ǹ furu si góró.

Tse tsí n sɛ̃̀ gbé náàyɛ̀ kíbí ò ti tàlé-ɛ̀ si ɛ́.

108 Ɔlɔ́dzɔ́, gba ɛbɔ-ìre wúwú-mi ɖé!

Kɔ́ mi, tsí n tse iŋɛ́ yèé nà fɔ̀ ní ká tse ɛ́.

109 Mà mú ikú-mi tà si nɔ́dzɔ́ kɔ́dzɔ́.

Ó ɖi, ǹ kà sì kɔ àrìmáa rɛ̃̀ si nɛ́kpa-ɛ̀ɛ.

110 Atseébàɖí ŋa sɔ àbìtì fú mi bɛ́.

Ó ɖi, ǹ kò yagbo fú n rɛ̃̀ si nɛ́kpa-ɛ̀ɛ ŋa.

111 Ká tse si nóŋù-afɔ̀-ɛ̀ɛ tútútú ní ǹ dzogú si ɛ́.

Òŋu ní mú inɔ́-mi ɖɔ̃̀ si ɛ́.

112 Mà kparagírí si, tsí wà tse awù-ɛ̀ɛ ŋa.

Àŋa ní dzɛ́ èrè-mi títí lɔ ɛ́.

113 Mà nya olínɔ́ méèdzì ŋa kãdzú,

tsí mà dzáfɔ̀-ɛkpa-ɛ̀ɛ.

114 Atsɛ́wébòmí òŋu àkpó-mi ní ò dzɛ́ ɛ́.

Odzú-mi wà nɔ́ɔ̀nà si fú oŋù-afɔ̀-ɛ̀ɛ.

115 Ɛ̀ŋɛ atseébàɖí ŋa, è sɛ̃̀ náànyì-mi,

tsí èmi n tse si ńǹtá-iŋɛ́ yèé Ɔ̀ɖáyé-mi wà fɔ̀ ní n tse ɛ́.

116 Gbà fú mi kíbí ò ti tàlé-ɛ̀ si ɛ́,

tsí n gbé náàyɛ̀.

Máa tse tsí odzú-mi kó wà nɔ́ɔ̀nà si títí kó wáa ɖi fofo.

117 Dzɛ́ àtɛ, tsí gbèɖí-mi, tsí n rí ɔlà,

tsí odzú-mi kó máa nyà ńǹtá-awù-ɛ̀ɛ ŋa tsítse.

118 Ɔ̀nyà kpó yèé ŋa kɔ awù-ɛ̀ɛ ŋa tsítse dzɔ̀ɔ́,

tsí nɔ̀ lɔ si ŋa á, ò kɔ̀ ŋá.

Iŋɛ́ tse ɛ́, òɖòbò gé ní àŋa à bɔ̀ si fú ɛ́.

119 Atseébàɖí ŋa ńǹtalɛ̀ ɛ́,

ò sɔ ŋá ɖi gugurɛ̃́.

Ḿbɛ̀ɛ́, mà dzáfɔ̀-ká tse si nóŋù-afɔ̀-ɛ̀ɛ tútútú.

120 Bí ǹ wà nódzú-ɛ̀ɛ si fee,

dzidzi náa mú otútù wɔ̀ mí si,

tsí ɛdzɔ́ kpíkpè-ɛ̀ɛ ŋa náa nódzo si fú mi.

121 Ǹ kò tse iŋɛ́-òkṹnù, ǹ tsòtítɔ́.

Máa dzɛ́ mú mi bɔwɔ́-atsoró bá mi ŋa.

122 Ire-adzítsɛ́-ɛ̀ɛ bɔ̀ nɔ́wɔ́-ɛ̀ɛ si.

Atsekɛ́rɛ́kɛ́rɛ́ ŋa ká máa tse bá mi.

123 Odzú-mi ɖi fofo kpó náfɔ̀-o gbà mí là

òŋu afɔ̀-òtítɔ́ tsítse-ɛ̀ɛ.

124 Mú àmúɖɔ̃̀-ɛ̀ɛ wòó tse fú èmi, adzítsɛ́-ɛ̀ɛ,

tsí o kɔ́ mi náwù-ɛ̀ɛ ŋa tsítse.

125 Adzítsɛ́-ɛ̀ɛ ní ǹ dzɛ́ ɛ́.

Tse tsí n wà ɖáŋɛ́ mà,

tsí n nyáa ma ká tse si nóŋù-afɔ̀-ɛ̀ɛ tútútú gbo.

126 Ɔlɔ́dzɔ́, ìwèrè-o tse iŋɛ́-kã̀ ní.

À bàdzɛ́ ɛkpa-ɛ̀ɛ.

127 Mà dzáfɔ̀-ɛkpa-ɛ̀ɛ ŋa láre siká tsáɖáɖáá gìɖì.

láre siká olóòdzé yòɖòɖòò gìɖì.

128 Mà rí ní ɛkpa-ɛ̀ɛ ŋa kpó wà ńǹɖì-ɛ̀ tútútú.

Tsí ǹ kà dzáfɔ̀-ɔ̀nà-òɖòbò tsítse.

129 Ká tse si nóŋù-afɔ̀-ɛ̀ɛ tútútú dzɛ́ iŋɛ́-àfɛ́ŋú,

tsí mà mú ara-mi bɔ̀ ńnɛ̀ tsítse.

130 Iŋɛ́ yèé afɔ̀-ɛ̀ɛ ŋa náa nyà ɖíre ɛ́,

náa módzú má, tsí náa tse tsí

ɛnɛ yèé ŋa wà fú ara-ŋa gé ɛ́,

à náa ɖáŋɛ́ mà.

131 Mà tsárũ, tsí mí fùù,

iŋɛ́ yèé tse ɛ́, àŋgbɛ̃-ɛkpa-ɛ̀ɛ ŋa wà gbɛ̃ mí.

132 Nyí wá ńɖɔ̀-mi ɖé,

tsí o rí ànyínɔ́ fú mi

kíbí ò ti fɔ̀ɔ́ si fú ɔ̀nyà kpó yèé wà nɛ́ àmúɖɔ̃̀ fɛ́ɛ ɛ́.

133 Oŋù-afɔ̀-ɛ̀ɛ ŋa kó tse tsí ɛsɛ̀-mi ŋa kó lera ńlɛ̀.

Máa dzɛ́, tsí íbàɖí-kã̀ kpókpó kó nɛ́kpá si ńǹtá-mi.

134 Gbà mí dzɔ̀ɔ́ nɔ́wɔ́-atsoró bánɛ ŋa,

tsí n rɛ̃̀ si nɛ́kpa-ɛ̀ɛ ŋa.

135 Àtɛ̀dzú-ɛ̀ɛ kó wà má kpó ŋàà si ńǹtá-adzítsɛ́-ɛ̀ɛ.

Kɔ́ mi náwù-ɛ̀ɛ ŋa tsítse.

136 Omi-inyɔ́kṹ ní ǹ wà mɔ ɛ́,

iŋɛ́ yèé tse ɛ́, à kò wà rɛ̃̀ si nɛ́kpa-ɛ̀ɛ ró.

137 Ɔlɔ́dzɔ́, ò dzɛ́ atsòtítɔ́,

tsí ɛdzɔ́ kpíkpè-ɛ̀ɛ ŋa

òkṹnù kà wà ńŋa.

138 Kíbí ò tɔ́ɔ si ní ká tse si

nóŋù-afɔ̀-ɛ̀ɛ ŋa gbà tútútú ɛ́,

òtítɔ́ ni, tsí àkaralé wà ńŋa.

139 Ara-mi gboná si kùù ńǹwèrè yèé ɔ̀tɛ̀-mi ŋa

mú afɔ̀-ɛ̀ɛ ŋa tsìgbàgbé ɛ́.

140 Àkaralé wà ńǹtá-afɔ̀-ɛ̀ɛ,

tsí èmi, adzítsɛ́-ɛ̀ɛ, mà dzáfɔ̀-ɛ̀.

141 Ǹ ɖi gã́nyígã́nyí, tsí à kɔ̀ mí kpó.

Ó ɖi, ǹ kà gbàgbé ɛkpa-ɛ̀ɛ ŋa.

142 Òtítɔ́ tsítse-ɛ̀ɛ dzɛ́ òtítɔ́ tsítse lɔ

títí náàrìmáa tã́,

tsí ɛkpa-ɛ̀ɛ gbo dzɛ́ òtítɔ́.

143 Ǹ kí nóòfò, tsí wà kpotsèéré.

Ó ɖi, iŋɛ́ yèé nà fɔ̀ ní ká tse ɛ́ ní náa mú ayè tɛ́ mi ɛ́.

144 Ká tse si nóŋù-afɔ̀-ɛ̀ɛ

wà bɛ́ɛ̀ tútútú títí lɔ náàrìmáa tã́.

Tse tsí n wà ɖáŋɛ́ mà, tsí n gbé náàyɛ̀.

145 Ɔlɔ́dzɔ́, ǹ ɖɔ̃́kpèɛ́ ti ńnɔ́-mi kpó.

Dzɔ́ŋù fú mi. Màa tse awù-ɛ̀ɛ ŋa.

146 Ǹ ɖɔ̃́kpèɛ́, gbà mí là,

tsí n wà tse si nóŋù-afɔ̀-ɛ̀ɛ tútútú.

147 Ilɛ̀ kà má tã́ná mà ti wà ɖɔ̃́kpèɛ́.

Odzú-mi wà nɔ́ɔ̀nà si fú afɔ̀-ɛ̀ɛ ŋa.

148 Mà ti tsúwádzú dzí si,

tsí sɛ̃̀ wà tédzú oŋù-afɔ̀-ɛ̀ɛ ŋa.

149 Ɔlɔ́dzɔ́, nà nɛ́ àmúɖɔ̃̀ fúnɛ.

Gbɔ́ igbe-mi ɖé!

Tse tsí n tse si ńǹtá-iŋɛ́ yèé ò fɔ̀ ɛ́.

150 À sɔ́ tìmá-mi bàa.

Àŋa alé tsítsìíra tsítse bá ŋa,

àŋa yèé kò wà rɛ̃̀ si nɛ́kpa-ɛ̀ɛ ɛ́.

151 Ó ɖi Ɔlɔ́dzɔ́, ìwɔ, ò sɔ́má-mi si,

tsí iŋɛ́ yèé nà fɔ̀ ní ká tse kpó ɛ́ dzɛ́ òtítɔ́.

152 Ká tse si nóŋù-afɔ̀-ɛ̀ɛ tútútú fee,

ò ti tɔ́ɔ si lɛ́lɛ́ǹlɛ̀lɛ̀,

tsí ó wà si títí lɔ náàrìmáa tã́.

153 Rí ìŋàrĩ́-mi, tsí o gbà mí dzɔ̀ɔ́,

iŋɛ́ yèé tse ɛ́, ǹ kò gbàgbé ɛkpa-ɛ̀ɛ.

154 Afɔ̀-mi kó tsɛdzɔ́-ɛ̀ɛ,

tsí o gbogu dzɛ fú mi.

Tse tsí n sɛ̃̀ gbé náàyɛ̀ kíbí ò ti tàlé-ɛ̀ si ɛ́.

155 Atseébàɖí ŋa fee,

àɖã́ kpãŋgo ɖí ŋa fú afɔ̀ ká rí ɔlà,

iŋɛ́ yèé tse ɛ́, awù-ɛ̀ɛ ŋa tsítse kò tsɛdzɔ́-ŋa.

156 Ɔlɔ́dzɔ́, nà rí ànyínɔ́ fúnɛ tó bɛ́ɛ̀.

Tse tsí n tse si ńǹtá-iŋɛ́ yèé ò fɔ̀ ɛ́.

157 Atsoró bá mi ŋa òŋu ɔ̀tɛ̀-mi ŋa kpɔ̀ góró.

Ó ɖi, ǹ kò kɔ àrìmáa tse si nóŋù-afɔ̀-ɛ̀ɛ tútútú.

158 Ǹ rí atanɛ ŋa, tsí iŋɛ́-ŋa nyà nódzú-mi,

iŋɛ́ yèé tse ɛ́, à kò wà tse si ńǹtá-oŋù-afɔ̀-ɛ̀ɛ ŋa.

159 Ɔlɔ́dzɔ́, rí kíbí ǹ dzáfɔ̀-ɛkpa-ɛ̀ɛ ŋa tó gé!

Tse tsí n sɛ̃̀ gbé náàyɛ̀ náàtsùgbé-àmúɖɔ̃̀-ɛ̀ɛ.

160 Afɔ̀-ɛ̀ɛ fee, òtítɔ́ ni.

Tsí ɛdzɔ́ kpíkpè-ɛ̀ɛ ŋa dzɛ́ ɛdzɔ́-òtítɔ́,

tsí náa wà bɛ́ɛ̀ si títí lɔ náàrìmáa tã́.

161 Olíkpá lákṹ ŋa tsoró bá mi nóòkṹnù.

Ó ɖi, afɔ̀-ɛ̀ɛ ŋa gé ní náa módzo tse mí ɛ́.

162 Oŋù-afɔ̀-ɛ̀ɛ ŋa náa mú ayè tɛ́ mi

kíbí ɛnɛ yèé tare iŋɛ́-ɛ̀fɛ́ lákṹ-kã̀ bɛ́ ni.

163 Ǹ kà tsaréma-òɖòbò tsítse.

Ǹ kɔ̀ɔ́. Ɛkpa-ɛ̀ɛ ní mà dzáfɔ̀ ɛ́.

164 Mà nyɛ̀ɛ́ gbà méedze ńnɔ́-ɔdzɔ́-kã̀

iŋɛ́ yèé tse ɛ́, ɛdzɔ́ kpíkpè-ɛ̀ɛ ŋa dzɛ́ òtítɔ́.

165 Ɔ̀nyà kpó yèé wà dzáfɔ̀-ɛkpa-ɛ̀ɛ ɛ́,

náa gbé ńtútùúrɔ̀ lákṹ.

Òkúta-àkɔ̀sɛ̀ kàkó wà ńwádzú fú ŋa ró.

166 Ɔlɔ́dzɔ́, ǹ módzú si nɔ́ɔ̀nà si ní ò bòkó gbà mí là,

iŋɛ́ yèé tse ɛ́, ǹ tse si ńǹtá-iŋɛ́ yèé ŋa ò fɔ̀ ní ká tse ɛ́.

167 Ká tse si nóŋù-afɔ̀-ɛ̀ɛ tútútú ɛ́,

ǹ kò tseé sé. Mà dzáfɔ̀-ɛ̀ ìɖéǹɖè ni.

168 Ǹ rɛ̃̀ si nɛ́kpa-ɛ̀ɛ ŋa

tsí ǹ tse si nóŋù-afɔ̀-ɛ̀ɛ tútútú.

Ɔ̀nà-mi ŋa kpó wà nódzú-ɛ̀ɛ si.

169 Ɔlɔ́dzɔ́, igbe-mi kó tó ńɖɔ̀-ɛ̀ɛ ɖé!

Tse tsí n wà ɖáŋɛ́ mà kíbí ò fɔ̀ɔ́ si ɛ́.

170 Ìkálɛ̀-mi kó tó ńɖɔ̀-ɛ̀ɛ.

Kíbí ò ti tàlé-ɛ̀ si ɛ́, gbà mí dzɔ̀ɔ́ ɖé!

171 Màa tsã́rũ, tsí nyɛ̀ɛ́,

iŋɛ́ yèé tse ɛ́, ò kɔ́ mi náwù-ɛ̀ɛ ŋa tsítse.

172 Arũ-mi kó wà mú oŋù-afɔ̀-ɛ̀ɛ kɔ̃rĩ,

iŋɛ́ yèé tse ɛ́, iŋɛ́ yèé nà fɔ̀ ní ká tse ŋa á dzɛ́ òtítɔ́.

173 Tɔ́wɔ́, tsí o gbà fú mi,

iŋɛ́ yèé tse ɛ́, ǹ tsã ɛkpa-ɛ̀ɛ ŋa.

174 Ɔlɔ́dzɔ́, ǹ wà wo o gbà mí là.

Ɛkpa-ɛ̀ɛ ní wà mú ayè tɛ́ mi ɛ́.

175 Tse tsí n gbé náàyɛ̀, tsí wà nyɛ̀ɛ́.

Tsí ɛdzɔ́ kpíkpè-ɛ̀ɛ ŋa nákó wà mɔ́wɔ́ gbè fú mi.

176 Ǹ wà tála wérí

kíbí ɔma-àgùɖã̀ yèé nɔ̀ lɔ si ɛ́.

Wo adzítsɛ́-ɛ̀ɛ wérí ɖé!

Iŋɛ́ yèé tse ɛ́, ǹ kò gbàgbé iŋɛ́ yèé nà fɔ̀ ní ká tse ŋa á.

120

Ɔ̀tɛ̀-tútùúrɔ̀ ŋa

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Ńǹwèrè yèé òfò bá mi si ɛ́,

ǹ ɖúgbe kpe Ɔlɔ́dzɔ́, tsí ó dzɔ́ŋù fú mi.

2 Ɔlɔ́dzɔ́, gbà mí nɔ́wɔ́-atsòɖòbò ŋa.

Gbà mí nɔ́wɔ́-arúnɛ ŋa.

3 Atsòɖòbò, èrè yèésí wà ńnɛ̀ fɛ́ɛ ni?

Arúnɛ, kí ó bòkó bí máa fɛ́ɛ ni?

4 Òɖòbò wà kíbí ɔfà-ogu yèé ŋa à ń bɔ̀ ńyɛná,

tsí à bɛ hɛ̀ɛ̀ si ɛ́ ni.

5 Èmi kó lɔ káà gbé ńǹlú-Mɛ̀tsɛ́kì

nàmí ńǹlú-Kèɖárìì?

Láyé! Ɛ̀rá mɛ̀ɛ́ kó rá mi tó bɛ́ɛ̀!

6 Ǹ gbé ńɖi-anya tútùúrɔ̀ kãdzú ŋa gbegbé.

7 Afɔ̀-tútùúrɔ̀ ní náa le mí si ɛ́.

Àŋa òŋu, afɔ̀-ogu dzídzɛ ní náa le ŋá si ɛ́.

121

Nɛ̀ɛ́ nákó nyáa gbà fú mi ná?

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Ǹ tsíìkpárè, tsí wo òkè ŋa lɔ.

Ńbisí agbàfúnɛ nákó ti wá fú mi ná?

2 Agbàfúnɛ-mi fee, ńɖi-Ɔlɔ́dzɔ́ ní náa ti ɛ́.

Òŋu ní tse ìgbèrí, tsí tse ilɛ̀ ɛ́.

3 Kàkó dzɛ́, tsí o rɛ̃̀, tsí tsubú.

Ɛnɛ yèé wà ɖèɛ́ ɛ́, kà sɔ̃rũ.

4 Aɖe ìlú-Ìsàràyɛ́lì kà sɔ̃̀rũ̀gbó. Kà sɔ̃rũ.

5 Ɔlɔ́dzɔ́ nákó wà ɖèɛ́,

Nákó dzɛ́ abɛ́tù si nóòtã́-ɛ̀ɛ.

6 Odzúùrɔ̃̀ kàkó tseébàɖí-kã̀ kpókpó báɛ nóòsã́ gãgã.

Òtsùkpá kàkó tseébàɖí-kã̀ kpókpó báɛ nóoru.

7 Ɛ̃ɛ̃, Ɔlɔ́dzɔ́ nákó tsɛ́wé bòɛ́.

Àtsubi-kã̀ kpókpó kàkó báɛ.

Àyɛ̀ɛ nákó wà nɔ́wɔ́-ɛ̀ si.

8 Àtilɔ òŋu àtibɔ̀-ɛ̀ɛ,

Ɔlɔ́dzɔ́ nákó wà náànyì-ɛ̀ɛ si

ti báàyí títí lɔ náàrìtã́.

123

Ɔma-Ɔ̀ɖáyé ŋa wà ɖɔ̃́ kpèé

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Ɔlɔ́dzɔ́, ìwɔ yèé dzokó náàntã̀-oyè-ɛ̀ɛ nɔ́ɔ̀rɔ̃ si ɛ́,

ǹ tsíìkpárè, tsí wà wòɛ́.

2 Ɔlɔ́dzɔ́, Ɔ̀ɖáyé-wa,

kíbí arú ŋa náa tsíìkpárè,

tsí wà wo olówó-ŋa,

tsí ɔnɔbɛ̃̀ɛ̃ àtsìtsɛ́ ŋa gbo náa tsíìkpárè,

tsí wà wo ìnà-ŋa á, bɛ́ɛ̀ ké ní àwa gbo,

àa módzú si nɔ́ɔ̀nà si fɛ́ɛ ní

o wáa mɔ́wɔ́ gbè fú wa á.

3 Ɔlɔ́dzɔ́, inɔ́-wa kó nyɔ́ɛ ɖé!

Inɔ́-wa kó nyɔ́ɛ.

Afɔ̀-ká máa múnɛ kpe iŋɛ́-kã̀ á góró ńǹkɛ̀ɛ́!

4 Anyɔ̀ɔ́ ŋa wà mú wa tse góró.

Atse kɛ́rɛ́kɛ́rɛ́ ŋa kò wà mú wa kpe iŋɛ́-kã̀.

Ó lásì wá.

125

Ɔlɔ́dzɔ́ atsɛ́wé bonɛ

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Amíkã-Ɔlɔ́dzɔ́ ŋa wà kíbí òkè-Sìyɔ́nì bɛ́ ni.

Òkè ɛ́ kà mì dzígí.

Náa dzokó si rìgírìgí títí lɔ náàrímáa tã́.

2 Òkè ŋa wérí Yèrúsàlɛ́mì si.

Bɛ́ɛ̀ ké ní Ɔlɔ́dzɔ́ gbo wérí ɔ̀nyà-ìlú-ɛ̀ ŋa si

títí lɔ náàrìmáa tã́ á.

3 Ɔ̀kpá yèé atseébàɖí wà ń rónɛ ɛ́

kó ró agbɔ́ɔ̀lú fú Ɔ̀ɖáyé ŋaà? Láyé!

Kàkàa bɛ́ɛ̀, nákó sɔ́ ŋa si ńbàɖí tsítse ni.

4 Ɔlɔ́dzɔ́, tsore fú atsore ŋa.

Tsore fú ɛnɛ yèé à ma afɔ̀-arũ-ŋa á.

5 Ó ɖi, agbànà títɔ̃ ŋa fee,

nà lé àŋa atseébàɖí ŋa soko.

Tútùúrɔ̀ fú ìlú-Ìsàràyɛ́lì.

126

Orĩ àbɔ̀wá

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Kíbí Ɔlɔ́dzɔ́ sɛ̃̀ gbɛ̃́ ɛnɛ́ ogu mú lɔ ŋa á bɔ̀ wá ńSìyɔ́nì ɛ́,

ó tsàlá fúnɛ si gé ni.

2 Àa wà ɖáàgbáàrĩ́,

tsí wà nórĩ kíkɔ̃ si bùràà.

Ìlú-àledzò ŋa wà fɔ̀ ní

Ɔlɔ́dzɔ́ tseŋɛ́ lákṹ kirimikirimi ŋa fú wa.

3 Ìɖéǹɖè ni, ó tseŋɛ́ lákṹ kirimikirimi ŋa fú wa,

tsí àa wà náàyè títɛ́ si.

4 Ɔlɔ́dzɔ́, fú tiwa ŋa,

ɛnɛ́ ogu mú lɔ ŋa á náàyɛ̀

kíbí oɖò ŋa náa mú àyɛ̀ wá nɔ́ɔ̀ɖã̀-Nègɛ́bù ɛ́.

5 Amú inyɔ́kṹ gbɛ̃̀dzɛ ŋa fee,

ayè títɛ́ ní à nákó wáa ń kpaɖí-ɛ̀

ńǹwèrè yèé ó kpã́ á.

6 Asɔkṹ ru ìdzɛ lɔ káà gbɛ̃̀ ŋa,

à náa sɛ̃̀ bɔ̀ bàa òŋu igbe-ayètítɛ́

ńǹwèrè yèé à kpaɖí-ɛ̀,

tsí rùú bɔ̀ bàa ńlé ɛ́.

127

Bí Ɔlɔ́dzɔ́ kò wà ńnɔ́-iŋɛ́-kã̀, kà lɔ rere

1 Orĩ ká ń rɛ̃̀ lɔ káà sɛ̃ Ɔ̀ɖáyé. Orĩ-Sàlòmɔ́.

Bí Ɔlɔ́dzɔ́ kò wà malé-kã̀,

àmàlé ŋa wà tsitsɛ́ rá ni.

Bí Ɔlɔ́dzɔ́ kò wà ɖe ìlú-kã̀,

àɖèlú ŋa wà sũ òɖe rá ni.

2 Ìwɔ yèé wà ɖádzá náàtsùgbée iŋɛ́-kã̀ á,

akpotu ni.

Ìwɔ yèé wà wo iŋɛ́ nàa dzɛ

títí ó ɖi ńǹŋàáŋà tã́ná o wáa sũ̀ ɛ́,

akpotu ni.

Ɔlɔ́dzɔ́ òŋu náa fú àrínódzú-ɛ̀ ńdzídzɛ ìrɔ́-bɛ́ɛ̀ ké,

ńǹwèrè yèé náa sũ̀ si gìɖì ɛ́.

3 Ɔma ɔnɔkɛ̃̀ɛ̃ ŋa fee, iŋɛ́-ɛ̀fɛ́-kã̀ ní à dzɛ́,

tsí Ɔlɔ́dzɔ́ náa ń fúnɛ ɛ́.

Ɔma ká bí gbo, èrè-kã̀ ní ó dzɛ́,

tsí náa ti ńɖi-Ɔlɔ́dzɔ́ ɛ́.

4 Ɔma ɔnɔkɛ̃̀ɛ̃ yèé ŋa ɔ̀nyà náa bí náàtìlɛ̀ǹɖe-ɛ̀ ɛ́,

à wà kíbí ɔfà náa gbé nɔ́wɔ́-ɔɖɛ̃ ɛ́.

5 Bí ɔ̀nyà-kã̀ nyáa nɛ́ ɔfà ìrɔ́-bɛ́ɛ̀, tsí ń kɔ̃́ àkɔ̀-ɛ̀,

ɛnɛ nyɛ̀ŋɛ̀ wɛɛ́wo-ire.

Bí ɛnɛ nyɛ̀ŋɛ̀ òŋu ɔ̀tɛ̀ ŋa méèdzì wà ɖũgbã̀-ara-ŋa

ńǹɖì-ɛdzɔ́ ɛ́, kà dzanɔ́.

128

Kùsɛ̀ɛ̀ fú asɛ̃ Ɔ̀ɖáyé ŋa

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Anáàrísá fú Ɔlɔ́dzɔ́ ŋa

òŋu arɛ̃̀ si nɛ́kpa-ɛ̀ ŋa, à wɛɛ́wo-ire.

2 Èrè-itsɛ́-ɔwɔ́-tìwɔ-ká-ɛ̀ɛ ní nàa dzɛ ɛ́.

Ire nákó kɛ̃̀ɛ̃́, tsí iŋɛ́ kpó nákó sã̀ fɛ́ɛ.

3 Ńkpàtá-ɛ̀ɛ fee,

aya-ɛ̀ɛ nákó dzɛ́ olábema si kíbí egi-ɔtí.

Ɔmà-ɛ̀ɛ ŋa nákó wérí-ɛ̀ɛ si

ńǹwèrè yèé ò wà dzɛ̃ŋɛ́ ɛ́

kíbí egi-òlífì ŋa bɛ́.

4 Bɛ́ɛ̀ ní Ɔlɔ́dzɔ́ náa tu kùsɛ̀ɛ̀ fú

anɛ́ àrísá fúu ŋa á ńnɛ̀ɛ́.

5 Ɔlɔ́dzɔ́ nákó tu kùsɛ̀ɛ̀ fɛ́ɛ ti ńSìyɔ́nì,

tsí ire-ilú-Yèrúsàlɛ́mì nákó tɛ ɔwɔ́-ìwɔ gbo

títí lɔ fú ìtã̀ntã́-ayé-ɛ̀ɛ.

6 Odzú-ɛ̀ɛ nákó kã ɔmalɔ́ma-ɛ̀ɛ ŋa ńǹbìmbí ńǹrènrè.

Tútùúrɔ̀ fú ìlú-Ìsàràyɛ́lì.

129

À wà tseébàɖí bá mi góró

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Ìsàràyɛ́lì kó fɔ̀ ní:

''Gbà mɛ́ɛló ɔ̀tɛ̀-mi ŋa

kò wáa ɖé mi má títí náàtìlɛ̀nɖe ná!"

2 À ɖé mi má títí náàtìlɛ̀nɖe tó bɛ́ɛ̀,

tsí à kò sì nyáa tóòsũ̀-mi.

3 À lànyì-mi si tɔ̀rɔ̀tɔ̀rɔ̀ kíbí àtsòko lako lɔ si yí.

4 Ɔlɔ́dzɔ́ atsòtítɔ́,

ó dzá okù yèé atseébàɖí ŋa ń so mí si ɛ́.

5 Ɔ̀tɛ̀-Sìyɔ́nì ŋa kpó ká dzanɔ́.

Ɛ̀sɛ̀ yèé à ń tsúwá á, ká ń ɖáànyì.

6 Ká gbɛ̃ ŋɔ̃́rĩ́ŋɔ́rĩ́ kíbí kóko-ìtalé

náa ti gbɛ̃ si tã́ná ká nyàá ǹɖe ɛ́.

7 Kà kɔ̃́wɔ́ fú akpaɖí ìdzɛ ŋa.

Kà tó kíkó fú aɖìí ŋa gbo.

8 Arɛ̃̀nà ŋa gbo kó máa fɔ̀ fú ŋa ní:

"Ɔlɔ́dzɔ́ kó tu kùsɛ̀ɛ̀ fú ŋa."

Àa tu kùsɛ̀ɛ̀ fú ŋɛ́ nóŋù-ɛ̀tsɛ-Ɔlɔ́dzɔ́.

130

Ɔlɔ́dzɔ́ agbanɛ dzɔ̀ɔ́

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Ɔlɔ́dzɔ́, ǹ wà ɖɔ̃́ kpèɛ́

títí ńfò lákṹ gbògòlòò yèé kò nɛ́ɛ̀kpàkũ ɛ́ ni.

2 Òdzare, gbɔ́ŋù-mi ɖé.

Tsétí, tsí o gbɔ́ŋù-ìkálɛ̀-mi.

3 Ɔlɔ́dzɔ́, ó má dzɛ́ ní

o wà mú íbàɖí-wa ŋa tsitsɛ́ tse fee,

nɛ̀ɛ́ má nyáa gbé náàyɛ̀ si ró ná?

4 Ó ɖi, ò dzɛ́ amútɔrɛ fúnɛ,

àtsùgbée ká náàrísá fɛ́ɛ.

5 Ǹ módzú si nɔ́ɔ̀nà si fú Ɔlɔ́dzɔ́.

Ǹ módzú si nɔ́ɔ̀nà si fúu òŋu àyɛ̀-mi kpó.

Odzú-mi wà nɔ́ɔ̀nà si fú oŋù-afɔ̀-ɛ̀.

6 Odzú-mi wà nɔ́ɔ̀nà si fú Ɔlɔ́dzɔ́

lare aɖòɖe yèé ilɛ̀ kò yaà má fú ɛ́.

Ɛ̃ɛ̃, lare aɖòɖe yèé ilɛ̀ kò yaà má fú ɛ́.

7 Ìsàràyɛ́lì, odzú-ɛ̀ɛ kó máa nyà nɔ́ɔ̀nà fú Ɔlɔ́dzɔ́.

Ó dzɛ́ olóore, tsí ó nɛ́kpá,

tsí kó nyáa gbanɛ dzɔ̀ɔ́.

8 Òŋu ní wà gba Ìsàràyɛ́lì dzɔ̀ɔ́ nɔ́wɔ́-íbàɖí-ɛ̀ ŋa tsítse ɛ́.

131

Máa wà rí ara-ɛ̀ɛ kadzá

1 Orĩ ká ń rɛ̃̀ lɔ káà sɛ̃ Ɔ̀ɖáyé. Orĩ-Ɖàfíɖì.

Ɔlɔ́dzɔ́, ǹ kà tse kɛ́rɛ́kɛ́rɛ́.

Iŋɛ́-odzú gúgù kà tse mí.

Yèé ǹ kò tó bòmbò ɛ́, ǹ kà yɛ́kɛ́,

títí n lɔ káà kɛ́ iŋɛ́ yèé le lárè mí ɛ́.

2 Kàkàa bɛ́ɛ̀ ɛ́, mà kparamá,

tsí wà si túrúú kíbí ɔma náa mú ara má ìná-ɛ̀ si gbà á.

Mà tse si bɛ́ɛ̀ kíbí ɔma tsígíɖí bɛ́ ni.

3 Ìsàràyɛ́lì, odzú-ɛ̀ɛ kó máa nyà nɔ́ɔ̀nà

fú Ɔlɔ́dzɔ́ ti báàyí títí lɔ náàrìmáa tã́.

133

Ó sã̀ ní ká gbé náàdzɔ́

1 Orĩ ká ń rɛ̃̀ lɔ káà sɛ̃ Ɔ̀ɖáyé. Orĩ-Ɖàfíɖì

Ìnàbí ŋa ká gbé má náàdzɔ́ fee,

ó dzɛ́ iŋɛ́-ire, tsí náa nɛ́ aɖɔ̃̀ gbo héŋú.

2 Náa wà kíbí à náa mú àɖɛ̃́ rṹrũ̀ fĩ́rĩ́fĩ́rĩ́,

tsí ń ɖà néwo-Àrɔ̃́nì bɛ́ ɛ́,

tsí náa tsã̀ lɔ ńrɔ̃-ɛ̀ŋgbã̀-ɛ̀ ŋa

títí lɔ nɔ́ɔ̀gɔ̃̀rɔ̃̀-àwù-ɛ̀ ŋa kpó ɛ́.

3 Náa wà kíbí ɔ̀gɛ̃gɛ̃ náa gɛ̃ si ńǹtá-òkè-Hɛ̀rìmɔ́nì bɛ́.

Náa dzò, tsí tsã̀ lɔ ńgègélè-Sìyɔ́nì ŋa.

Ḿbɛ̀ ní Ɔlɔ́dzɔ́ náa mú kùsɛ̀ɛ̀ si ɛ́.

Náa mú àyɛ̀ si bɛ̀ títí lɔ náàrìtã́.

134

È nyɛ Ɔlɔ́dzɔ́

1 Orĩ ká ń rɛ̃̀ lɔ káà sɛ̃ Ɔ̀ɖáyé.

Ɛ̀ŋɛ àtsìtsɛ́-Ɔlɔ́dzɔ́ ŋa, è nyɛ̀ɛ́.

Ɛ̀ŋɛ atsitsɛ́ ńnɔlé-Ɔlɔ́dzɔ́ nóoru na, è nyɛ̀ɛ́.

2 È kɛ́ ɔwɔ́-ŋɛ́ ŋa lɔ́ ńǹgbèrí

nɔ́wɔ́-ḿbí ilé-Ɔlɔ́dzɔ́ wà á, tsí e nyɛ̀ɛ́.

3 Ɔlɔ́dzɔ́, ɛnɛ yèé tse ìgbèrí, tsí tse ilɛ̀ ɛ́,

kó tu kùsɛ̀ɛ̀ fú Sìyɔ́nì.

136

Àmúɖɔ̃̀-Ɔ̀ɖáyé kò nɛ́ ìkpàkũ

1 È ɖɔ́kpɛ́ fú Ɔlɔ́dzɔ́, iŋɛ́ yèé tse ɛ́, náa tsore fúnɛ.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

2 È ɖɔ́kpɛ́ fú Ɔ̀ɖáyé. Ó kpeéwo fú iŋɛ ɔ̀kã̀lɔ́ɔ̀kã̀ kpó.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

3 È ɖɔ́kpɛ́ fú Ɔlɔ́dzɔ́ Ólú yèé kpeéwo fú ólú ŋa kpó ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

4 Òŋu níìkã̀ ní tse iŋɛ́-àwùsì lákṹ lákṹ ŋa á.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

5 Ó lo ifɛ̀ɛ́nɔ́-ɛ̀, tsí ń tse ìgbèrí.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

6 Ó na ìtalɛ̀ ɛ́ si ńǹtá-omi ŋa kpó.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.^*

7 Ó tse iŋɛ́ mímá lákṹ yòɖòɖòò ŋa.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

8 Ó tsodzúùrɔ̃̀, tsí kó dzɛ́ olóòsã́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

9 Ó tsòtsùkpá òŋu àrã̀wo ŋa, tsí ká dzɛ́ ólóòru.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

10 Òŋu ké ní kpa àtsɛ̀rɛ̀bí-ɔma-Èdzíkpítì ŋa nóòkú kpó ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

11 Tsí ó fa ɔma-Ìsàràyɛ́lì ŋa fùɖá ti ńlɛ̀-Èdzíkpítì ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

12 Ikpá-ɛ̀ lákṹ kpàtàkì ɛ́ ní ó ń fà ŋá fùɖá bɛ́ɛ̀ ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

13 Ó kpɛ̃́ Àhũ-sùsú méèdzì.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

14 Ó tse tsí ɔma-Ìsàràyɛ́lì ŋa gbà náàŋírĩ-ɛ̀ fùɖá.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

15 Ó mú Fárɔ̃̀ òŋu olɔ́ɔ̀kpá-ɛ̀ ŋa kpó tsɛ̀rá náÀhũ-sùsú ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.^*

16 Òŋu ké ní gbɛ̃́ ɛnɛ yèé dzɛ́ tɛ̀ɛ̀ ŋa á wérí nɔ́ɔ̀ɖã̀ á.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

17 Òŋu ké ní kpa ólú lákṹ ŋa nóòkú ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

18 Ɛ̃ɛ̃, ó kpa ólú olíkpá ŋa nóòkú.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

19 Ó kpa Sìhónì ólú-ìlú-Àmɔ̀ré ŋa.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

20 Ó kpa Ɔ́gì ólú-ilɛ̀-Bàsã́ gbo.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.^*

21 Òŋu ké ní kɛ́ ilɛ̀-ìlú nyɛ̀ŋɛ̀ ŋa,

tsí ń fú ɔma-Ìsàràyɛ́lì ŋa ní kó ɖi tiŋa á.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

22 Ɔma-Ìsàràyɛ́lì ŋa á, àtsìtsɛ́-ɛ̀ ŋa ni.

Àŋa ní ó kɛ́ ilɛ̀-ìlú ŋa á fú ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

23 Ó tédzú wa ńǹwèrè yèé ɔ̀nyà ŋa tɛ̀ wá mù si ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

24 Òŋu ké ní gbà wá dzɔ̀ɔ́ nɔ́wɔ́-ɛnɛ yèé ŋa nɛ́kpá si ńǹtá-wa á.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

25 Òŋu ké ní dzɛ́ afú ɔ̀nyà ŋa òŋu afúŋɛ́ kpó ńdzídzɛ ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

26 È ɖɔ́kpɛ́ fú Ɔ̀ɖáyé, ɛnɛ yèé wà nɔ́ɔ̀rɔ̃ ɛ́.

Ìɖéǹɖè ni, àmúɖɔ̃̀-ɛ̀ kò nɛ́ ìkpàkũ.

137

Ɔma-Ɔ̀ɖáyé ŋa kɔ̃rĩ náàndzò

1 Àa dzokó nétíɖò-Bàbìlónì ŋa si,

tsí wà mɔmi-inyɔ́kṹ fú ìtédzú-Sìyɔ́nì.

2 Àa mú aɖùrù-wa ŋa rákì négi si bɛ̀.

3 Tsí ɛnɛ́ mógu mú wa lɔ ŋa á ní àa kó kɔ̃rĩ.

Atsoróbánɛ ŋa ní àa kó kɔ̃rĩ-ayè títɛ́.

À ní: ''È kɔ̃rĩ-ìlú-ŋɛ́ ŋa kã̀ŋa fú wa".

4 Ókò! Bí àa má kɔ̃rĩ-Ɔlɔ́dzɔ́ ŋa ńlɛ̀-àledzò fáà!

5 Tsí àa ní: Óò Yèrúsàlɛ́mì,

bí ó dzɛ́ ní fĩ́ĩ́ ǹ gbàgbé-ɛ̀ɛ gé ná,

ni ɔwɔ́-òtã́-mi kó gbɛ̃.

6 Bí ó dzɛ́ ní fĩ́ĩ́ ǹ gbàgbé-ɛ̀ɛ gé ná,

bí kò tsi ìwɔ ní kpàtà lé ńǹtá-ayè títɛ́ kpó fú mi ɛ́ gé,

ni iŋá-mi kó tamá làngàrà.

7 Ɔlɔ́dzɔ́, máa gbàgbé iŋɛ́ yèé Èɖòmítì ŋa tse

nɔ́dzɔ́ yèé ogu ɖé Yèrúsàlɛ́mì ɛ́ oo!

À ní ká fɔ́ Yèrúsàlɛ́mì ɛ́ kpó,

ìɖì-kã̀-ɛ̀ kó máa bɔ̀.

8 Ìwɔ Bàbìlónì yèé à bòkó fɔ́ ɛ́!

Íbàɖí yèé ò tse ɛ́,

atsàtsesã-ɛ̀ ŋa fɛ́ɛ, à wɛɛ́wo-ire.

9 Amú ɔma-ɛ̀ɛ ŋa lɔ káà lɔ̀ ńǹtá-òkúta,

à wɛɛ́wo-ire.

138

Màa ɖɔ́kpɛ́ fú Ɔlɔ́dzɔ́

1 Orĩ-Ɖàfíɖì.

Ɔlɔ́dzɔ́, ǹ tsínɔ́-mi kpó, tsí wà ń ɖɔ́kpɛ́ fɛ́ɛ.

Bí ǹ wà nódzú-iŋɛ ŋa gìɖì si,

màa wà kɔ̃rĩ, tsí wà ɖɔ́kpɛ́ fɛ́ɛ.

2 Ńwádzú-ilé yèé dzɛ́ tɛ̀ɛ akpá akpá, ɛsɛ̀ ɛsɛ̀ ɛ́,

màa kálɛ̀, tsí màa fɔ̀ fɛ́ɛ ní ɛ́kɔ-ɛ̀ɛ wà fì,

náàtsùgbée kíbí nà nɛ́ àmúɖɔ̃̀ fúnɛ ɛ́,

òŋu kíbí àkaralé wà ńǹtá-ɛ̀ɛ ɛ́.

Iŋɛ́ yèé ò tse ɛ́, ó lákṹ láre àlé yèé ò ta si ɛ́.

3 Ńǹwèrè yèé ǹ kpèɛ́ ɛ́, ò dzɛ́ fú mi.

Ò ɖáàmí le mí, tsí tɔ́ mú àmí kò mí máa.

4 Ɔlɔ́dzɔ́, ó wà ní ólú ŋa kpó ńǹtalɛ̀ ɛ́ ká wà ɖɔ́kpɛ́ fɛ́ɛ

ńǹwèrè yèé à kó gbɔ́ oŋù-arũ-ɛ̀ɛ ɛ́.

5 Ḿbɛ̀ɛ́, bí à wà kɔ̃rĩ,

à nákó wà nya itsɛ́-ɔwɔ́-ɛ̀ɛ ŋa ɖíre,

tsí wà fɔ̀ ní: Ɔlɔ́dzɔ́, iyì-ɛ̀ɛ lákṹ tó bɛ́ɛ̀.

6 Ɔlɔ́dzɔ́ wà nɔ́ɔ̀rɔ̃ si.

Odzú-ɛ̀ náa tó atara-ŋa bɔlɛ̀ ŋa.

Náa rí atse kɛ́rɛ́kɛ́rɛ́ ŋa mà ti títí ḿbí ó wà á.

7 Ńǹwèrè yèé òfò náa bá mi ɛ́,

Ɔlɔ́dzɔ́ ní náa tse tsí mà wà náàyɛ̀ si ɛ́.

Bí ɔ̀tɛ̀-mi ŋa bínɔ́ si gìɖì,

Náa na ɔwɔ́-ɛ̀, tsí ikpá-ɛ̀ náa gbà mí là.

8 Ɔlɔ́dzɔ́, iŋɛ́ yèé ò kpé tsítse fú mi ɛ́,

nàa tã́ã kpoŋu gé ní ó dzɛ́ ɛ́.

Ɔlɔ́dzɔ́, àmúɖɔ̃̀-ɛ̀ɛ kò nɛ́ ìkpàkũ.

Fee, ɛnɛ yèé ŋa ìwɔ-ká-ɛ̀ɛ ò mú ɔwɔ́-ɛ̀ɛ tse ɛ́,

máa dzɛ́ kɔ̀ ŋá dzɔ̀ɔ́.

139

Ɔlɔ́dzɔ́, ò mà mí rere

1 Orĩ yèé Ɖàfíɖì tsɔ́ fú agbɛ̃́ ayɔ́rĩkɔ̃ ŋa á. Orĩ ɛ́ ní.

Ɔlɔ́dzɔ́, ò wà rí inɔ́-mi lɔ ńŋɔ́nɔ́ŋɔ́nɔ́-ɛ̀, tsí ò mà mí.

2 Ńǹwèrè yèé mà dzokó si ɛ́, ò màá.

Ńǹwèrè yèé mà ɖóro si ɛ́, ò màá.

Tsí nà ti ma ìsérè-mi ŋa si tsúwádzú.

3 Bí ǹ wà rɛ̃̀, nà mà. Bí ǹ sũ̀ si, nà mà.

Ɔ̀nà ɔ̀kã̀lɔ́ɔ̀kã̀ kpó yèé mà gbà á,

ɔ̀kã̀ kpókpó kò wà ńǹɖúkù fɛ́ɛ.

4 Títí n tsèsérè ní n wíìnyɛ̀-kã̀ á,

Ɔlɔ́dzɔ́, nà ti tsuwádzú màá bɔ̀ fú mi lɛ́lɛ́.

5 Náànyì gbo, ńwádzú gbo, ò wérí mi si kpó,

tsí nà mú ɔwɔ́-ɛ̀ɛ lé ńǹtá-mi si.

6 Iŋɛ́ mímà yèé bɛ́ ɛ́, ó lárè mí.

Ǹ kàkó nyáa tóòsũ̀-ɛ̀ títí màá lɔ ńŋɔ́nɔ́ŋɔ́nɔ́-ɛ̀.

7 Ńbisí màa nyáa lɔ, tsí kó dzɛ̃̀ fú Mímí-Ɔ̀ɖáyé ná?

Ɔlɔ́dzɔ́, ńbisí màa nyáa sá lɔ káà ɖúkù fɛ́ɛ?

8 Bí ǹ lɔ nɔ́ɔ̀rɔ̃, ò wà bɛ̀.

Bí ǹ lɔ káà sũ̀ ńlé-ikú, ò wà bɛ̀.

9 Fee, ìɖádzá gìɖì má wu iká,

tsí ǹ kɛ́ɛ, tsí ń fò lɔ títí náàtàkè-àhũ ŋa,

10 ɔwɔ́-ɛ̀ɛ ní nàa tɔ́ wà ń gbɛ̃́ mi ró ɛ́,

tsí àwóòtã́-ɛ̀ɛ nákó banɛ́ mi si kpó kpãŋu.

11 Bí ǹ ní òkùkù kó sì kù bò mí kpó kpìrìm,

òru náa tédzú ɖi òsã́ kpó ŋàà wérí mi si.

12 Ɔlɔ́dzɔ́, òkùkù náa ɖi mímá fú ìwɔ òŋu ni.

tsí òru gbo náa má fɛ́ɛ si kérékéré kíbí òsã́ gãgã bɛ́ ni.

Òkùkù òŋu mímá kà gbà níìkã̀ fú ìwɔ òŋu.

13 Ìɖì nínɔnɔ̀ ŋɔ́nɔ́ŋɔ́nɔ́ yèé ŋa wà ńnɔ́-mi ɛ́, ìwɔ ní tse ŋá á,

tsí kíbí ìnà-mi kɛ́ efũ̀-mi ɛ́, ìwɔ ké ní ti tse mí si bɛ̀ si ɛ́.

14 Ɔlɔ́dzɔ́, ǹ wà ɖɔ́kpɛ́ fɛ́ɛ, iŋɛ́ yèé tse ɛ́,

ò tse mí, tsí ǹ ɖìirí tó bɛ́ɛ̀.

Iŋɛ́ tsitse-ɛ̀ɛ ŋa náa tsàfɛ́ŋú góró, tsí ǹ ɖá ŋa mà.

15 Ńǹɖúkù ní ò tse mí ɛ́, tsí to iŋɛ́ yèé ŋa wà nára-mi ɛ́

nɛ́kpa nɛ́kpa títí ńŋɔ́nɔ́ŋɔ́nɔ́-ilɛ̀.

Ó ɖi, ara-mi kò dzɛ́ iŋɛ́-ìɖúkù fɛ́ɛ.

16 Ɔlɔ́dzɔ́, ńǹwèrè yèé ǹ dzɛ́ àmbara si ńnɔ́-ìnà-mi ɛ́,

ìwɔ òŋu ò ti wà rí mi.

Ò ti kɔ ìmarũ ɔdzɔ́ yèé ŋa kpó,

ò fú mi ɛ́ si ńǹwé-ɛ̀ɛ si,

tã́ná ɔdzɔ́-tèmi ɔ̀kã̀ntso kó wá.

17 Óò, Ɔ̀ɖáyé! Ìsérè-ɛ̀ɛ ŋa nɔnɔ̀ fú mi góró!

Kò nɛ́ kíkã̀ títí ká màá.

18 Mà wò ní n kã̀ ŋá.

Ó ɖi, ìsérè-ɛ̀ɛ ŋa kpɔ̀ láre ìnyarĩ̀-etí-àhũ.

Bí ǹ dzí gé ná, ńɖɔ̀-ɛ̀ɛ ní mà tɔ́ wà si ró ɛ́.

19 Óò, Ɔ̀ɖáyé! Ò má nyáa ra ɔ̀nyà-íbàɖí ŋa fee,

ó má sã̀. Ɛ̀ŋɛ ɔ̀nyà-kpanɛkpanɛ ŋa, è sɔ́ ǹɖe ńɖɔ̀-mi bí!

20 Ɛ́kɔ-ɛ̀ɛ ní à wà kpè, tsí wà ń tsìtsekíìtse ɛ́,

tsí àŋa yèé ŋa dzɛ́ ɔ̀tɛ̀-ɛ̀ɛ ŋa á,

à náa kpe ɛ́kɔ-ɛ̀ɛ, tsí wà ń rúnɛ.

21 Ɔlɔ́dzɔ́, bí ó tse fáà,

tsí anyɛ̀ɛ́ kãdzú ŋa,

ǹ kàá nyà ŋá kãdzú ná?

Bí ó tse fáà, tsí ǹ kàá kɔ afɔ̀-adzàbɛ́ɛ̀ ŋa ná?

22 Fee, màa nyà ŋá kãdzú kadzá ìɖì-ɛ̀,

tsí fɔ̀ ní ɔ̀tɛ̀-mi ŋa ní à dzɛ́ ɛ́.

23 Óò, Ɔ̀ɖáyé! Rí inɔ́-mi lɔ ńŋɔ́nɔ́ŋɔ́nɔ́-ɛ̀, tsí o mà mí.

Kpa ìsérè-mi ŋa wò, tsí o ma ìrã̀ yèé ŋa wà ɖɔ̃̀ mí ɛ́.

24 Wò mí rere, tsí bí ǹ wà nɔ́ɔ̀nà-íbàɖí si, ni o mà,

tsí o gbɛ̃́ mi si nɔ́ɔ̀nà-ire yèé wà si títí lɔ náàrìtã́ á.

142

Ńɖi-Ɔlɔ́dzɔ́ ní à náa sá ɖúkù ɛ́

1 Orĩ-Ɖàfíɖì. Orĩ ɛ́, ìrewúwú ni.

Ńǹwèrè yèé ó sá lɔ káà ɖúkù ńfò-òkúta si ɛ́,

ní ó wúùre yèé bɛ́ ɛ́. ^*

2 Ɔlɔ́dzɔ́, ǹ wà ɖúgbe kũkũ fɛ́ɛ.

Ǹ wà ɖúgbe kũkũ, tsí wà kpèɛ́.

3 Ǹ wá ńɖɔ̀-ɛ̀ɛ, òŋu àbo rírã́-mi ŋa.

Ǹ wà ɖíre òfò yèé bá mi si ɛ́ fɛ́ɛ.

4 Bí ara kú mi si, nà mà.

Nà ma ḿbí ǹ làkóò ɛ́.

Ḿbí mà gbà á, à sɔ àbìtì si ńnɛ̀ si.

5 Ɔlɔ́dzɔ́, nyí wo òtã́-mi, tsí o rí gé!

Ɔ̀nyà-kã̀ kpókpó kò mà mí ró.

Ǹ kò ma ńbisí màa sá ɖúkù.

Ɔ̀nyà-kã̀ kpókpó kò wà tsã́rũ si ńnɛ̀ fú mi ró.

6 Óò! Ɔlɔ́dzɔ́, ǹ wà ɖúgbe kpèɛ́, tsí wà fɔ̀ ní fee,

ìwɔ ní wà tsɛ́wé bò mí ɛ́.

Ire-mi kpó ní ò dzɛ́ si ńǹtalɛ̀-àwáàyɛ̀ ŋa á.

7 Ò dzàre, rɛ̃tígbè, tsí o gbɔ́ ìkálɛ̀-mi ɖé.

Iŋɛ́-mi tsànyínɔ́ si góró.

Gbà mí nɔ́wɔ́-atseébàɖí bá mi ŋa ɖé.

À le, tsí nɛ́kpá lárè mí.

8 Ɔlɔ́dzɔ́, tsí mi nɛ́ɛ̀ŋà,

tsí n fɔ̀ fɛ́ɛ ní ɛ́kɔ-ɛ̀ɛ wà fì.

Ḿbɛ̀ɛ́, atsòtítɔ́ ŋa nákó sú wérí mi kpó gòròbòtòò.

Iŋɛ́ yèé tse ɛ́, ò tsere fú mi.

146

Ɔlɔ́dzɔ́ agbàfúnɛ

1 Àlèlúyà, è nyɛ Ɔlɔ́dzɔ́!

Màa nyɛ Ɔlɔ́dzɔ́!

2 Náyé-mi kpó, màa wà nyɛ Ɔlɔdzɔ́ gé ni.

Ìmarũ ɔdzɔ́ yèé ŋa bɔ̀ fú mi si ɛ́,

màa wà kɔ̃rĩ, tsí wà nyɛ Ɔlɔ́dzɔ́.

3 È máa karalé si ńǹtá-gbadzúùmà kirim kirim ŋa.

Ɔ̀nyà dzɛ̀kpà dzɛ̀wà gé ní à dzɛ́ ɛ́.

À kàkó nyáa gbanɛ là.

4 Mímí-ŋa bòkó wáa dzilɛ̀,

tsí à kó sɛ̃̀ lɔ ńlɛ̀ ḿbí à ti ɛ́.

Nɔ́dzɔ́ nyɛ̀ŋɛ̀ ɛ́, ètò-ŋà ŋa kpó nákó tsɛ̀rá.

5 Bí Ɔɖáyé-Yákúbà dzɛ́ agbàfúnɛ-ɔ̀nyà-kã̀,

tsí odzú-ɛ̀ wà nɔ́ɔ̀nà si fú Ɔlɔ́dzɔ́ Ɔ̀ɖáyé-ɛ̀,

ɛnɛ nyɛ̀ŋɛ̀ wɛ éwo-ire.

6 Òŋu ɛnɛ yèé tse ìgbèrí, tsí tse ilɛ̀,

tsí tse àhũ òŋu iŋɛ́ kpó yèé wà ńnɔ́-ɛ̀ ɛ́,

òŋu ní dzɛ́ abanɛ́ òtítɔ́ si títí lɔ fú àrìmáa tã́ á.

7 Ɔlɔ́dzɔ́ náa ɖáàre fú olí-ìréré ŋa.

Náa fú ɛnɛ yèé ebi wà kpa ŋa ńdzídzɛ.

Náa tú abɛ̀ŋà yèé à ɖè si ŋa á dzɔ̀ɔ́.

8 Ɔlɔ́dzɔ́ náa tsódzú fú afɔ́dzú ŋa.

Náa kɛ́ ɛnɛ yèé tsubúlɛ̀ ŋa á ǹɖe ɖóro.

Náa dzáfɔ̀-atsòtítɔ́ ŋa.

9 Ɔlɔ́dzɔ́ náa tsɛ́wé bo atsíwérí ŋa.

Kà dzɛ́ ńɖi-ɔma-òkú òŋu okpó.

Ó ɖi, náa ɖíwó ètò-atseébàɖí ŋa òŋu.

10 Ɔlɔ́dzɔ́ nákó dzoyè títí lɔ náàrìmáa tã́.

Sìyɔ́nì, ó dzɛ́ Ɔ̀ɖáyé-ɛ̀ɛ si títí lɔ ńm̀bìmbí ńǹrèŋrè

Àlèlúyà, è nyɛ Ɔlɔ́dzɔ́!

147

Ɔlɔ́dzɔ́ nɛ́kpá ìɖéǹɖè

1 Àlèlúyà, è nyɛ Ɔlɔ́dzɔ́!

Ó sã̀ ní ká kɔ̃rĩ fú Ɔ̀ɖáyé.

Ó dzɛ́ iŋɛ́-ire ní ká nyɛ̀ɛ́.

2 Ɔlɔ́dzɔ́ òŋu yèé sɛ̃̀ ma Yèrúsàlɛ́mì ɛ́,

nákó kpérí ɔma-Ìsàràyɛ́lì yèé ŋa ogu mú lɔ ŋa á.

3 Òŋu ní náa bɔ ɛnɛ́ ìsérè kpa si ŋa á,

tsí náa tɔ́dzú odzudzu-ŋa fú ŋa.

4 Náa kã àrã̀wo ŋa,

tsí sɔ ɛ́kɔ fú ŋa ɔ̀kã̀kã̀ kpó.

5 Ɔlɔ́dzɔ́-wa lákṹ,

tsí nɛ́kpá tó bɛ́ɛ̀.

Ìrã̀ã́mà-ɛ̀ kò nɛ́ɛ̀kpàkũ.

6 Ɔlɔ́dzɔ́ náa kɛ́ atara-nɛ bɔ̀lɛ̀ ŋa ǹɖe.

Ó ɖi, atseébàɖí ŋa òŋu,

náa ɖɛ̀ ŋá bɔ̀ títí à náa kílɛ̀ kãrãã.

7 È kɔ̃rĩ ɔkpɛ́ ɖíɖá fú Ɔlɔ́dzɔ́.

È ta aɖùrù fú Ɔ̀ɖáyé-wa.

8 Ɔlɔ́dzɔ́ ní dzɛ́ amú òdzò tsú ńǹgbèrí,

tsí dzɛ́ akpaɖí òdzò fú ìtalɛ̀,

òŋu amú kóko wù ńǹtá-òkè ŋa á.

9 Ó dzɛ́ afú ɛrã-abètìkpá ŋa ńdzídzɛ,

Náa fú ɔma-àgbákàákàá aɖúgbe ebi hùúyɛ hùúyɛ ŋa ńdzídzɛ.

10 Atsĩ kó tsikpá lɔ kìrìyà kìrìyà, kà dzɔ iŋɛ́-kã̀ fúu

nàmí asúré kó nɛ́ àmí kùntsàtsàà, kà dzɔ iŋɛ́-kã̀ fúu.

11 Ó ɖi, Ɔlɔ́dzɔ́ kà dzɛ́ ńǹɖì-anáàrísá fúu ŋa

òŋu akaralé si ńǹtá-àmúɖɔ̃̀-ɛ̀ ŋa.

12 Yèrúsàlɛ́mì, fɔ òtéé fú Ɔlɔ́dzɔ́!

Sìyɔ́nì, nyɛ Ɔ̀ɖáyé-ɛ̀ɛ!

13 Iŋɛ́ yèé tse ɛ́, ó sɛ̃̀ tɔ́tse irɛ̃ si nárũ-èkũ̀-ɛ̀ɛ ŋa.

Ó tu kùsɛ̀ɛ̀ fú ɔma-ɛ̀ɛ ɔnɔkɛ̃̀ɛ̃ yèé bɔ̀ ŋa á.

14 Òŋu ní tse tsí ilɛ̀-ɛ̀ɛ wà ńtútùúrɔ̀ si ɛ́.

Náa mú bèléè rere, tsí ń tse ayo fɛ́ɛ.

15 Náa fɔ iŋɛ́ yèé ká tse ɛ́ wá ńǹtalɛ̀,

tsí gbòkã́ gé ɛ́, afɔ̀-ɛ̀ náa gba ìɖìkíìɖì.

16 Náa rɔ irì ɖà ńlɛ̀ si kíbí òwú bɛ́,

tsí náa túùnkã́ irì ŋa á si kíbí érú bɛ́.

17 Náa rɔ òdzò-òkúta ɖà lɔ si,

tsí kíbí náa tù tó si ɛ́,

nɛ̀ɛ́ nákó nyáa gbé ńnɛ̀.

18 Náa wíìnyɛ̀, tsí iŋɛ́ ŋa á náa yɔ́ kpó.

Náa mú awu tse, tsí oɖò ŋa náa tsɛ́.

19 Náa nya iŋɛ́ yèé náa fɔ̀ ní

ká tse ŋa á fɔ̀ fú Yákúbà,

tsí náa nyáa ɛkpa-ɛ̀ òŋu ká tse

si nóŋù-ɛ̀ gbo ɖíre fú Ìsàràyɛ́lì.

20 Kò tse iŋɛ́ yèé ŋa nyí fú ìlú òmírɛ̃̀-kã̀ kpókpó,

tsí ìlú-kã̀ kò sì ma ɛkpa-ɛ̀ ŋa gbo.

Àlèlúyà, è nyɛ Ɔlɔ́dzɔ́!

148

Nɔ́ɔ̀rɔ̃ gbo, ńǹtalɛ̀ gbo, ká wà nyɛ Ɔlɔ́dzɔ́

1 È nyɛ Ɔlɔ́dzɔ́. Ɛ̀ŋɛ kpó yèé wà títí nɔ́ɔ̀rɔ̃ ɛ́, è nyɛ̀ɛ́.

Ɛ̀ŋɛ kpó yèé wà ńǹgbèrí lɔ sã́ŋúsã́ŋú ɛ́, è nyɛ̀ɛ́.

2 Ɛ̀ŋɛ adzogu-Ɔlɔ́dzɔ́ ŋa kpó, è nyɛ̀ɛ́.

Iŋɛ́ kpó yèé Ɔlɔ́dzɔ́ ɖá si náàdzàkáyé ɛ́, ká nyɛ̀ɛ́.

3 Òtsùkpá gbo, odzúùrɔ̃̀ gbo, ká nyɛ Ɔlɔ́dzɔ́.

Àrã̀wo mímá yòɖòɖòò ŋa, è nyɛ̀ɛ́.

4 Ɛ̀ŋɛ kpó yèé wà nɔ́ɔ̀rɔ̃ lɔ sã́ŋúsã́ŋú ɛ́, è nyɛ̀ɛ́.

Omi kpó yèé ŋa wà títí ńǹgbèrí ɛ́, è nyɛ Ɔlɔ́dzɔ́.

5 Iŋɛ́ ɔ̀kã̀lɔ́ɔ̀kã̀ kpó kó wà nyɛ Ɔlɔ́dzɔ́.

Iŋɛ́ yèé tse ɛ́, òŋu ká-ɛ̀ ní tsóŋù wíìnyɛ̀,

tsí ń ɖá iŋɛ́ ŋa á kpó ɛ́.

6 Ḿbí ó mú ŋa si ɛ́, ó mú ŋa si bɛ̀ títí lɔ ni.

Ó ɖá ɛkpa fú ŋa, tsí ɛkpa á kò nɛ́ kpíkpàrɔ̀ láyé.

7 Ti ńǹtalɛ̀ ɛ́ kpó, ká wà kɔ̃rĩ, tsí wà nyɛ Ɔlɔ́dzɔ́.

Àhũ gbo, ɛrã lákṹ lákṹ kpó yèé ŋa wà ńnɔ́-Àhũ

òŋu ifò lákṹ gbògòlòò ŋa á,

ká kɔ̃rĩ, tsí wà nyɛ Ɔlɔ́dzɔ́.

8 Iná gbo, òdzò-òkúta gbo, ká nyɛ Ɔlɔ́dzɔ́.

Irì gbo, irì-òkúta gbo, ká nyɛ Ɔlɔ́dzɔ́.

Awu lákṹ lákṹ yèé ŋa náa mú éwo dzó fú Ɔlɔ́dzɔ́ ɛ́ gbo,

àŋa gbo, ká nyɛ ɔlɔ́dzɔ́.

9 Òkè ŋa gbo, gègélè ŋa gbo, ká nyɛ Ɔlɔ́dzɔ́.

Egi síso ŋa gbo, ànyí ŋa gbo kpó, ká nyɛ Ɔlɔ́dzɔ́.

10 Ɛrã-ìgbɛ́ ŋa gbo, ɛrã ɔ̀kã̀lɔ́ɔ̀kã̀ yèé wà ŋa á gbo,

yèé ŋa dzɛ́ afàńlɛ̀ gbo, yèé ŋa wà fò gbo,

àŋa kpó, ká nyɛ Ɔlɔ́dzɔ́.

11 Ólú ŋa gbo náyé gbaŋgba á òŋu ɔ̀nyà-ìlú ŋa kpó,

ká nyɛ Ɔlɔ́dzɔ́.

Ɔ̀gã́-ìlú ŋa gbo òŋu ɔma-ólú ŋa gbo kpó,

àŋa gbo, ká nyɛ Ɔlɔ́dzɔ́.

12 Ɔmɔ̀tsɔ́ ŋa gbo, èkíɖã ŋa gbo, ká nyɛ ɔlɔ́dzɔ́.

Arígbó gbo, arúkà gbo, maɖé gbo, ká nyɛ Ɔlɔ́dzɔ́.

13 È nyɛ Ɔlɔ́dzɔ́, iŋɛ́ yèé tse ɛ́,

ɛ́kɔ tòŋu níìkã̀ntso ní wà fì ɛ́.

Lílákṹ-ɛ̀ kpeéwo fú iŋɛ́ ɔ̀kã̀lɔ́ɔ̀kã̀ kpó

ńǹtalɛ̀ ɛ́ òŋu nɔ́ɔ̀rɔ̃.

14 Ɔlɔ́dzɔ́ fú ɔ̀nyà-ìlú-ɛ̀ ŋa ńkpá máa,

tsí ó wà mú ayè tɛ́ ŋa, àŋa yèé dzɛ́ tɛ̀ɛ̀ ŋa á.

Ó wà mú ayè tɛ́ ɔma-Ìsàràyɛ́lì ŋa,

ɔma-Ìsàràyɛ́lì yèé ŋa dzɛ́ ìlú yèé ti sɔ́má-ɛ̀ si ɛ́.

È nyɛ Ɔlɔ́dzɔ́.

149

Ɔlɔ́dzɔ́ kà dzɛ́ ńɖi-ɔ̀nyà-ìlú-ɛ̀ ŋa

1 Àlèlúyà, è nyɛ Ɔlɔ́dzɔ́!

È kɔ̃rĩ titɔ̃ fúu!

È wà nyɛ̀ɛ́ ńǹkpérí tɛ̀ɛ̀ ŋa!

2 Ìsàràyɛ́lì kó táyè fú ɛnɛ yèé ɖáa á!

Agbé ńSìyɔ́nì ŋa ká wà náyè títɛ́ si fú ólú-ŋa!

3 Ká wà dzídzó ŋa, tsí wà ń nyɛ̀ɛ́!

Ká wà kpàrã̀, tsí wà ta aɖùrù fúu!

4 Iŋɛ́ yèé tse ɛ́, iŋɛ́-tɛ̀ɛ̀ ŋa náa mú ayè tɛ́ɛ.

Náa mú àdzàbɔ́, tsí ń ɖéèlè fú ataranɛ bɔlɛ̀ ŋa.

5 Ɔma-Ɔ̀ɖáyé ŋa ká táyè ìtɛ́kitɛ́,

tsí ká mú iyì bɔwɔ́-Ɔlɔ́dzɔ́.

Ká wà ɖúgbe-ayè títɛ́ ńǹtá-aní-ŋà ŋa,

6 tsí wà tsóŋù kũkũ nyɛ Ɔ̀ɖáyé,

tsí banɛ́ tàsú múmú hɛ́hɛ́hɛ́ si,

7 tsí ká ń tsàtsesã fú ìlú ŋa,

tsí tse bá ɔ̀nyà-ìlú ŋa.

8 Ká mú wɔ̀rɔ̀ ɖe ólú-ŋà ŋa,

tsí mú ɛ̀ŋà si nɛ́sɛ̀ fú gbadzúmà-ŋà ŋa.

9 Tsí ká kpɛdzɔ́ mú ŋa kíbí à ti kɔɔ́ si ɛ́.

Nákó dzɛ́ ní à bu irɔ̃ si néwo fú ɔma-Ɔ̀ɖáyé ŋa.

Àlèlúyà, è nyɛ Ɔlɔ́dzɔ́!

150

È nyɛ Ɔlɔ́dzɔ́

1 È nyɛ Ɔlɔ́dzɔ́.

È nyɛ Ɔ̀ɖáyé ńnɔlé-ɛ̀.

È nyɛ̀ɛ́ ńǹgbèrí ḿbí náa nya ikpá-ɛ̀ ɖíre ti ɛ́.

2 È nyɛ̀ɛ́ fú iŋɛ́-ikpá-ɛ̀ ŋa tsítse.

È nyɛ̀ɛ́ fú ikpá lákṹ-ɛ̀ yèé kò nɛ́ sísàwé ɛ́.

3 È nyɛ̀ɛ́ òŋu ikpè.

È nyɛ̀ɛ́ òŋu aɖùrù ŋa ńǹrɔ́ǹrɔ́.

4 È nyɛ̀ɛ́ òŋu àrã̀, òŋu idzó.

È nyɛ̀ɛ́ òŋu aɖùrù ŋa, òŋu fèrè ŋa.

5 È nyɛ̀ɛ́ òŋu àkàtsà-irɛ̃.

È nyɛ̀ɛ́ òŋu àkàtsà-irɛ̃ aɖúgbe.

6 Iŋɛ́ kpó yèé wà mí gé ɛ́,

kó nyɛ Ɔlɔ́dzɔ́.

È nyɛ Ɔlɔ́dzɔ́.

^*2:7 Hèbérù ŋa 1:5 (Hébreu 2:7)

^*2:7 Ólú yèé Ɔlɔ́dzɔ́ tsã̀ á ní à wà fɔ̀ ḿbíbɛ́ ɛ́.

^*2:12 À kò gbɔ́ òkpì-afɔ̀ yèé bɛ́ ńǹwé-àtsɛ̃̀tsɛ̃̀ ɛ́.

^*4:8 Bèléè ɛ́, ɔma-dzídɛ-kã̀ ni, tsí ó wà kíbí ìmɔ́rĩ̀ bɛ́, tsí à náa lɔ̀ɔ́, tsí náa ɖi ɔkà-kpɔ̃́nɔ́.

^*7:5 À nákó nyáa fɔ̀ gbo ní: Bí ǹ tsàtsesã fú ɔ̀nyà-kã̀.

^*8:1 Òkpì-afɔ̀ yèé bɛ́ ɛ́ gbígbɔ́ le héŋú.

^*14:1 À fɔ̀ ńǹwé-òmírɛ̃̀ ŋa ní: Ɛnɛ́ éwo kò sí fú ŋa á náa fɔ̀ ní: "Ikpá-kã̀ kpókpó kò wà nɔ́wɔ́-Ɔ̀ɖáyé."

^*17:14 À nákó nyáa gbɔ́ òkpì-ɛ̀ gbo ró ní ire tiŋa wà ńǹtalɛ̀ bí gé ni.

^*22:2 Ìwé-Màtéwò 27:46 (Matthieu 27:46); Ìwé-Mákò 15:34 (Marc 15:34)

^*22:19 Ìwé-Màtéwò 27:35 (Matthieu 27:35)

^*26:6 Mà gbákpá gbɛ́sɛ̀ yèé à fɔ̀ ḿbíbɛ́ ɛ́, ńǹlú-Hèbérù ɛ́, à fɔ̀ɔ́ ní mà wɛ ɔwɔ́, tsí ń nyà ɖíre ní tèmi nòkṹnù ni.

^*29:6 Òkè-Sìrìyónì ɛ́ ké ní à náa kpè ní Hɛ̀rìmɔ́nì ɛ́.

^*35:13 À kà mú kotokú wɔ̀ gé! Bí ɔ̀nyà-kã̀ wɔ̀ɔ́ si ɛ́, ɛnɛ nyɛ̀ŋɛ̀ wà nyà ɖíre ní òŋu wà náànyínɔ́ si náàtsùgbée iŋɛ́-kã̀ ni.

^*37:35 Ìwé kã̀ŋa fɔ̀ akpálà-èkéèdzì-kíkã̀ yèé bɛ́ ɛ́ ní: tsí wà gba ìɖì kíbí egi-kã̀ yèé à lɛ́, tsí ara-ɛ̀ tù mɛ̀mɛ̀mɛ̀ si ɛ́.

^*42:1 Ɔmalɔ́ma-Kòré ŋa á, ɛgbɛ́-kã̀ ní à dzɛ́ ɛ́, tsí orĩ kíkɔ̃ ní dzɛ́ itsɛ́ tiŋa ńlé-Ɔ̀ɖáyé ńYèrúsàlɛ́mì ɛ́. È nákó rí afɔ̀ yèé ńǸwé-àtsɛ̃̀tsɛ̃̀-Ɛ̀rɔ́ ŋa nɛ́kpa nɛ́kpa 6:17-22 (1 Chroniques 6:17-22)

^*46:1 È lɔ káà kã afɔ̀ yèé wà ńǹsàlɛ̀-Orĩ 42:1 ti nára-ɔmalɔ́ma-Kòré ŋa á.

^*51:2 È kã 2 Sàmùwɛ́lì 11-12 (2 Samuel 11-12)

^*51:9 Hùsófù ɛ́, ewé-ìrɔ́-kã̀ ní ó dzɛ́ ɛ́. Atsɛbɔ-Ɔ̀ɖáyé náa lòó, tsí ń fúnɛ náàfárá ni.

^*51:16 Afɔ̀ yèé à fɔ̀ ḿbíbɛ́ ɛ́, nákó nyáa dzɛ́ ɔ̀nyà yèé Ɖàfíɖì kpa nóòkú ɛ́ nàmí ó wà tsìkálɛ̀, tsí àtsesã-àbi ɛ́ kó máa wá ńǹtá-ɛ̀.

^*51:20 Sìyɔ́nì ɛ́, ɛkɔ-ìlú-Yèrúsàlɛ́mì ké ni. Nóòkè yèé ŋa à ɖá ìlú-Yèrúsàlɛ́mì si ɛ́, ɔ̀kã̀ wà, tsí à náa kpèé ní òkè-Sìyɔ́nì.

^*53:7 È lɔ káà kã afɔ̀ yèé wà ńǹsàlɛ̀-orĩ 51:20 ti nára-Sìyɔ́nì ɛ́.

^*54:5 Oŋù-àledzò yèé à fɔ̀ ḿbíbɛ́ ɛ́, ìwé-òmírɛ̃̀ ŋa fɔ̀ɔ́ ní atse kɛ́rɛ́kɛ́rɛ́ ŋa.

^*56:3 Atse kɛ́rɛ́kɛ́rɛ́ yèé ŋa à fɔ̀ ḿbíbɛ́ ɛ́, à nákó nyáa gbɔ́ òkpì-ɛ̀ ró ní à wà dzogu bá mi óò Ɔ̀ɖáyé Oléwo nàmí ɔ̀nyà ɛ̀gbɛ̀lɛ́ɛ̀gbɛ̀ wà dzà gbè fú mi.

^*58:2 Òŋu-afɔ̀ yèé à fɔ̀ ḿbíbɛ́ kpó ɛ́, ìwé kã̀ŋa fɔ̀ɔ́ ní: Ɛ̀ŋɛ ikpá-ɔ̀rɔ̃ ŋa, ɛdzɔ́ yèé è wa kpè ɛ́ fee, è wà kpɛdzɔ́-òtítɔ́ ìɖénɖèè?

^*58:8 À nákó nyáa fɔ̀ gbo ní: " Ɔ̀ɖáyé ta ɔfà-ɛ̀ ŋa, tsí àŋa kpó, à tsɛ̀rá "

^*58:10 À nákó nyáa gba kíkã̀ yèé bɛ́ ɛ́ fɔ̀ ró ní: '' Tã́ná ká wáa ɖá agúgú mà ńsùsú ɛ́, bí à tù si nàmí à gbɛ̃ si oo, afífi nákó kɛ́ ŋa lɔ.

^*67:2 Oŋù-afɔ̀-sɛ́là yèé bɛ́ ɛ́, òpkì-ɛ̀ ní dzɛ́ àɖáɖóro nórĩ kíkɔ̃ ɛ́.

^*84:1 È lɔ káà kã afɔ̀ yèé wà ńǹsàlɛ̀-Orĩ 42:1 ti nára-ɔmalɔ́ma-Kòré ŋa á.

^*91:11-12 È lɔ káà kã Ìwé-Màtéwò 4:6 (Matthieu 4:6)

^*95:7-8 È lɔ káà kã Ìwé-Hèbérù 3:15 (Hébreu 3:15)

^*110:4 È kã Ìwé-Ìkpìnkpìlɛ̀-ayé 14:18 (Génèse 14:18)

^*111:10 Ìwé-Òwe ŋa 1:7

^*119:38 Oŋù-afɔ̀ yèé bɛ́ ɛ́, à fɔ̀ɔ́ ńǹwé kã̀ŋa ní: Tse tsí àlé yèé ò ta si fú anɛ́ àrísá fɛ́ɛ ŋa á, kó tsɛ fú èmi adzítsɛ́-ɛ̀ɛ